Read Rade Klei Mmuñ Hđăp 9 Bible Online

Klei Mmuñ Hđăp 9 - Rade bible

Klei Mmuñ Hđăp 9

¹Kơ khua phung mmuñ: djŏ kơ đŏk Mut-Laben. Klei mmuñ hđăp Y-Đawit. Ơ Yêhôwa, kâo srăng bi mni kơ Ih hŏng jih ai tiê kâo; kâo srăng yăl dliê jih jang bruă yuôm bhăn Ih.

²Kâo srăng hơ̆k leh anăn mơak hlăm Ih, kâo srăng mmuñ bi mni kơ anăn Ih, Ơ Pô Ti Dlông Hĭn.

³Tơdah phung roh kâo kdŭn đuĕ, diñu lĕ buh leh anăn rai tuč ti anăp Ih.

⁴Kyuadah Ih brei kâo dưi, kyua klei kâo jing djŏ. Ih dôk ti jhưng mtao leh anăn phat kđi leh hŏng klei kpă.

⁵Ih ƀuah leh phung găp djuê mnuih, Ih bi rai leh phung ƀai; Ih lăm hĕ anăn diñu leh nanao hlŏng lar.

⁶Amâo lŏ mâo phung roh ôh, diñu luč rai leh hlŏng lar; Ih bi rai leh ƀuôn diñu; leh anăn arăng amâo lŏ hdơr kơ diñu ôh.

⁷Ƀiădah Yêhôwa jing mtao kiă kriê nanao hlŏng lar; Ñu mkra leh jhưng Ñu kơ klei phat kđi.

⁸Ñu srăng phat kđi lăn ala hŏng klei kpă, Ñu srăng kiă kriê phung mnuih hŏng klei djŏ.

⁹Yêhôwa jing anôk đuĕ dăp kơ pô arăng ktư̆ juă, anôk kđap hlăm hruê rŭng răng.

¹⁰Phung thâo kral anăn Ih knang kơ Ih; kyuadah Ih amâo tuôm lui ôh phung duah Ih, Ơ Yêhôwa.

¹¹Mmuñ bĕ kơ Yêhôwa, Pô dôk hlăm ƀuôn Siôn! Hưn ti krah phung ƀuôn sang bruă prŏng Ñu ngă!

¹²Kyuadah Pô rŭ ênua kơ êrah hdơr mĭn kơ phung knap mñai; Ñu amâo wơr bĭt ôh klei digơ̆ ur krao.

¹³Pap mñai kơ kâo, Ơ Yêhôwa; dlăng kơ klei knap mñai kâo tŭ mơ̆ng phung bi êmut kơ kâo, pŭ mđuĕ kâo mơ̆ng ƀăng jang klei djiê,

¹⁴čiăng kơ kâo dưi hưn jih klei bi mni kơ Ih, čiăng kơ ti ƀăng jang ƀuôn Siôn kâo dưi hơ̆k mơak hlăm klei Ih bi mtlaih.

¹⁵Phung găp djuê mnuih lĕ hlăm ƀăng êlam diñu klei leh; jơ̆ng diñu djŏ kđông diñu pô ƀêč leh.

¹⁶Yêhôwa bi êdah Ñu pô leh, Ñu phat kđi leh; phung ƀai djŏ ñuăl diñu pô ngă. (Pĕ đĭng buôt. Sêla)

¹⁷Phung ƀai arăng bi kdŭn đuĕ nao kơ Ƀuôn Phung Djiê, jing phung găp djuê wơr bĭt Aê Diê.

¹⁸Kyuadah arăng amâo srăng wơr bĭt nanao ôh phung knap mñai, kăn klei čang hmăng phung ƀun ƀin srăng luč nanao hlŏng lar rei.

¹⁹Kgŭ bĕ, Ơ Yêhôwa! Đăm brei mnuih dưi ôh; brei phung găp djuê mnuih tŭ klei phat kđi ti anăp Ih.

²⁰Bi huĭ diñu, Ơ Yêhôwa! Brei phung găp djuê thâo diñu jing knŏng mnuih! (Sêla)