Read Rade Klei Mmuñ Hđăp 91 Bible Online

Klei Mmuñ Hđăp 91 - Rade bible

Klei Mmuñ Hđăp 91

¹Hlei pô dôk hlăm anôk hgăm Pô Ti Dlông Hĭn srăng mdei ti êyui Pô Mâo Jih Klei Myang.

²Kâo srăng lač kơ Yêhôwa, “Ih jing anôk kâo đuĕ dăp leh anăn kđông mgang kâo, Aê Diê kâo, Pô kâo knang”.

³Ñu yơh srăng bi mtlaih ih mơ̆ng ñuăl pô wăk čĭm, leh anăn mơ̆ng klei ruă tưp bi mdjiê.

⁴Ñu srăng guôm ih hŏng siap Ñu, leh anăn ih srăng đuĕ dăp ti gŭ siap Ñu; klei sĭt suôr Ñu jing khil prŏng leh anăn kđông mgang.

⁵Ih amâo srăng huĭ ôh kơ klei jŭ jhat êjai mlam, kăn huĭ kơ ƀrăm phiơr êjai hruê rei;

⁶Kăn huĭ kơ klei ruă tưp bi mdjiê truh êjai mmăt, kăn huĭ kơ klei bi rai ngă êjai yang hruê dơ̆ng rei.

⁷Sa êbâo čô dưi lĕ êbuh ti djiêô ih, leh anăn pluh êbâo čô tĭng hnuă ih; ƀiădah klei anăn amâo srăng truh kơ ih ôh.

⁸Ih srăng dlăng hŏng ală ih, leh anăn ƀuh knŏng klei bi kmhal djŏ kơ phung ƀai.

⁹Tơdah ih brei leh Yêhôwa jing anôk ih đuĕ dăp, ih mjing leh Pô Ti Dlông Hĭn anôk ih dôk,

¹⁰Amâo mâo sa mta klei jhat srăng truh kơ ih ôh, kăn srăng mâo sa mta klei ruă tưp nao giăm sang čhiăm ih rei.

¹¹Kyuadah Ñu srăng mtă kơ phung dĭng buăl jăk Ñu mgang ih hlăm jih jang êlan ih hiu.

¹²Diñu srăng pŭ ih hlăm kngan diñu, huĭdah jơ̆ng ih sô̆ hŏng boh tâo.

¹³Ih srăng juă ti dlông êmông gu leh anăn ala kpơ̆ng; ih srăng juă lin êđai êmông gu leh anăn ala.

¹⁴Aê Diê lač, “Kyuadah hlei pô khăp kơ Kâo, Kâo srăng bi mtlaih ñu; Kâo srăng mgang ñu, kyuadah ñu thâo kral anăn Kâo.

¹⁵Ñu srăng iêô wah lač kơ Kâo, Kâo srăng lŏ wĭt lač kơ ñu; Kâo srăng dôk mbĭt hŏng ñu hlăm klei rŭng răng; Kâo srăng bi mtlaih ñu leh anăn mpŭ kơ ñu.

¹⁶Kâo srăng bi mơak kơ ñu hŏng klei brei ñu dôk hdĭp sui, leh anăn bi êdah klei Kâo bi mtlaih kơ ñu”.