Read Rade Klei Mmuñ Hđăp 92 Bible Online

Klei Mmuñ Hđăp 92 - Rade bible

Klei Mmuñ Hđăp 92

¹Klei mmuñ hđăp. Klei mmuñ pioh kơ hruê sabat. Jing jăk êdi yơh bi mni kơ Yêhôwa, leh anăn mmuñ bi mni kơ anăn Ih, Ơ Pô Ti Dlông Hĭn;

²čiăng hưn klei khăp Ih ti aguah, leh anăn klei sĭt suôr Ih ti tlam,

³hŏng brô̆ pluh aruăt klei, wăt hŏng đĭng kliă êjai pĕ brô̆.

⁴Ơ Yêhôwa, Ih bi mơak kâo leh hŏng bruă Ih; kâo mmuñ hŏng klei hơ̆k kyua bruă kngan Ih.

⁵Ơ Yêhôwa, bruă Ih prŏng êdi! Klei mĭn Ih êlam êdi.

⁶Mnuih mluk amâo dưi thâo kral ôh klei anei; kăn mnuih mgu dưi thâo săng rei.

⁷Wăt tơdah phung ƀai čăt msĕ si rơ̆k, leh anăn jih jang phung ngă ƀai čăt đĭ, arăng pioh diñu kơ klei bi rai hlŏng lar.

⁸Ƀiădah Ih, Ơ Yêhôwa, Pô ti dlông hĭn hlŏng lar.

⁹Sĭt nik phung roh Ih, Ơ Yêhôwa, sĭt nik, phung roh Ih srăng rai tuč; jih jang phung ngă klei wê srăng bra đuĕ mdê mdê.

¹⁰Ƀiădah Ih brei kâo jing ktang msĕ si êmô dliê; Ih trôč kâo leh hŏng êa ƀâo mngưi mrâo.

¹¹Ală kâo ƀuh leh klei phung roh kâo luč, knga kâo hmư̆ leh kơ klei phung bi kdơ̆ng hŏng kâo rai tuč.

¹²Phung kpă ênô hriê kơ prŏng msĕ si ana guôl; prŏng msĕ si ana kyâo sêdar ti čar Liƀan.

¹³Arăng pla diñu hlăm sang Yêhôwa; diñu srăng hriê kơ prŏng ti wăl sang Aê Diê drei.

¹⁴Ana kyâo anăn ăt mboh wăt tơdah dôk sui thŭn leh; diñu bŏ hŏng ktăk leh anăn mtah nanao,

¹⁵čiăng bi êdah kơ Yêhôwa jing kpă. Ñu jing Boh Tâo kâo, leh anăn amâo mâo sa mta klei wê hlăm Ñu ôh.