Read Rade Klei Mmuñ Hđăp 94 Bible Online

Klei Mmuñ Hđăp 94 - Rade bible

Klei Mmuñ Hđăp 94

¹Ơ Yêhôwa, Ih jing Aê Diê Pô rŭ ênua, Ơ Aê Diê Pô rŭ ênua, bi êdah bĕ Ih pô.

²Kgŭ bĕ, Ơ Khua Phat Kđi kơ lăn ala, bi wĭt bĕ kơ phung mgao tui si diñu năng.

³Dŭm boh sui, Ơ Yêhôwa, dŭm boh sui phung ƀai srăng mâo klei hơ̆k mơak?

⁴Diñu blŭ nanao hŏng klei mgao; jih jang phung ngă klei wê bi mni kơ diñu pô.

⁵Ơ Yêhôwa, diñu juă lin phung ƀuôn sang Ih, leh anăn diñu ktư̆ juă phung jing ngăn dưn Ih.

⁶Diñu bi mdjiê mniê djiê ung leh anăn pô tue; diñu bi mdjiê phung anak êrĭt.

⁷Leh anăn diñu lač, Yêhôwa amâo ƀuh ôh, Aê Diê phung Yakôp kăn thâo rei.

⁸Răng bĕ, Ơ phung mluk, Ơ phung mgu, hbĭl diih srăng mâo klei thâo mĭn?

⁹Pô hrih leh knga, Ñu amâo srăng hmư̆ hĕ? Pô mjing leh ală, Ñu amâo srăng ƀuh hĕ?

¹⁰Pô mkra phung găp djuê mnuih amâo srăng bi kmhal mơ̆? Pô mtô kơ phung mnuih kƀah klei thâo mĭn mơ̆?

¹¹Yêhôwa thâo kral klei mĭn mnuih; Ñu thâo klei mĭn digơ̆ jing hơăi mang.

¹²Jăk mơak yơh mnuih Ih mkra mjuăt, Ơ Yêhôwa, leh anăn mtô klei bhiăn Ih kơ gơ̆;

¹³čiăng brei kơ gơ̆ klei mdei êjai hruê jhat, tơl arăng klei leh ƀăng êlam kơ phung ƀai.

¹⁴Kyuadah Yêhôwa amâo srăng lui ôh phung ƀuôn sang Ñu; Ñu amâo srăng hngah ôh phung jing ngăn dưn Ñu.

¹⁵Kyuadah arăng srăng lŏ brei klei phat kđi kpă kơ phung kpă ênô; leh anăn jih jang phung mâo ai tiê kpă srăng tui hlue klei anăn.

¹⁶Hlei srăng kgŭ brei kơ kâo čiăng ngă kơ phung ƀai? Hlei pô srăng mgang kâo ngă kơ phung tui klei wê?

¹⁷Tơdah Yêhôwa amâo đru kâo ôh, kâo dôk leh hlăm msat anôk ñăt kriêp.

¹⁸Tơdah kâo lač leh, jơ̆ng kâo ksak, klei khăp Ih, Ơ Yêhôwa, krơ̆ng kâo leh.

¹⁹Tơdah kâo mâo lu klei ênguôt ktrŏ, klei Ih bi juh bi mơak kơ mngăt kâo.

²⁰Phung mtao ƀai bi truh klei ênguôt êjai mjing klei bhiăn soh Dưi mơ̆ phung mtao ƀai bi mguôp hŏng Ih?

²¹Diñu bi mguôp mbĭt čiăng ngă kơ mnuih kpă, leh anăn bi kmhal bi mdjiê pô amâo soh ôh.

²²Ƀiădah Yêhôwa jing leh kđông mgang kâo, Aê Diê kâo jing leh boh tâo anôk kâo đuĕ dăp.

²³Ñu brei klei wê digơ̆ lŏ lĕ kơ digơ̆ pô, leh anăn bi rai hĕ digơ̆ kyuadah klei ƀai digơ̆; Yêhôwa, Aê Diê drei, srăng bi luč hĕ digơ̆.