Read Rade Klei Mmuñ Hđăp 95 Bible Online

Klei Mmuñ Hđăp 95 - Rade bible

Klei Mmuñ Hđăp 95

¹Hriê bĕ drei mmuñ kơ Yêhôwa; brei drei ur hơ̆k kơ Boh Tâo Pô bi mtlaih drei.

²Brei drei nao ti anăp Ñu hŏng klei bi mni; brei drei mmuñ hơ̆k kơ Ñu hŏng klei mmuñ bi mni!

³Kyuadah Yêhôwa jing Aê Diê prŏng; Ñu jing Mtao prŏng ti dlông hĭn kơ jih jang yang.

⁴Anôk êlam hlăm lăn ala dôk hlăm kngan Ñu; leh anăn čŏng čư̆ jing dŏ Ñu.

⁵Êa ksĭ jing dŏ Ñu, kyuadah Ñu mjing gơ̆; kngan Ñu mkra lăn thu msĕ mơh.

⁶Bơ drei buôn leh anăn kkuh mpŭ; brei drei čuôn kơŭt ti anăp Yêhôwa, Pô hrih drei.

⁷Kyuadah Ñu jing Aê Diê drei, drei jing phung ƀuôn sang hlăm kdrăn rơ̆k mda Ñu, phung biăp kngan Ñu atăt. Hruê anei tơdah diih hmư̆ asăp Ñu,

⁸đăm bi khăng ai tiê diih ôh msĕ si ti Mêriba, msĕ si ti hruê diih dôk ti Masa hlăm kdrăn tač.

⁹Hlăk anăn phung aê diih lông dlăng kâo leh; diñu lông dlăng kâo wăt tơdah diñu ƀuh leh bruă kâo ngă.

¹⁰Êjai pă pluh thŭn kâo bi êmut kơ phung găp djuê ênuk anăn, leh anăn kâo lač, Diñu jing sa phung ƀuôn sang mâo ai tiê klah đuĕ; diñu amâo uêñ kơ êlan kâo ôh.

¹¹Kyuanăn kâo kat asei leh hŏng klei kâo ngêñ, Diñu amâo srăng mŭt hlăm klei mdei kâo ôh.