Read Rade Klei Bi Hriêng 1 Bible Online

Klei Bi Hriêng 1 - Rade bible

Klei Bi Hriêng 1

¹Klei bi hriêng Y-Salômôn anak êkei Y-Đawit mtao phung Israel:

²Čiăng kơ mnuih dưi truh kơ klei thâo mĭn leh anăn klei hriăm, thâo kiă kriê pô, čiăng thâo săng klei blŭ êlam,

³čiăng mă tŭ klei mtô mơ̆ng klei knhâo čiăng ngă klei kpă, klei djŏ, leh anăn klei ênuah,

⁴čiăng brei klei thâo tĭng ksiêm kơ phung mluk, klei thâo mĭn leh anăn klei knhâo kơ êkei hlăk ai.

⁵Wăt pô thâo mĭn dưi dôk hmư̆ msĕ mơh, leh anăn hriăm čiăng thâo mĭn hĭn; leh anăn pô thâo săng dưi mâo klei knhâo knhăk.

⁶Čiăng thâo săng klei bi hriêng leh anăn klei bi hmô, klei phung thâo mĭn blŭ leh anăn mđăo.

⁷Klei huĭ mpŭ kơ Yêhôwa jing klei kčưm kơ klei thâo săng; phung mluk bi êmut kơ klei thâo mĭn leh anăn klei bi hriăm.

⁸Anak kâo, dôk hmư̆ bĕ klei ama ih bi hriăm ih, leh anăn đăm hngah hĕ ôh klei amĭ ih mtô;

⁹kyuadah klei anăn jing kwang mnga siam kơ boh kŏ ih, leh anăn klei băk siam ti kkuê ih.

¹⁰Anak kâo, tơdah phung soh čiăng mplư ih, đăm ih gưt ôh.

¹¹Tơdah diñu lač, “Hriê mbĭt hŏng hmei; brei drei kăp tuh êrah, brei drei ngă ênap kăp ngă kơ pô amâo mâo soh ôh.

¹²Msĕ si Ƀuôn Phung Djiê brei drei lun ƀơ̆ng diñu hdĭp kluôm, msĕ si phung trŭn kơ Ƀăng Êlam.

¹³Drei srăng ƀuh djăp mta ngăn yuôm, drei srăng bi bŏ sang drei hŏng dŏ dô drei plah mă.

¹⁴Bi mguôp bĕ mbĭt hŏng hmei, jih jang drei srăng mâo knŏng sa kdŭng prăk.”

¹⁵Anak kâo, đăm êbat mbĭt hŏng diñu ôh, kơ̆ng hĕ jơ̆ng ih đăm tui hlue êlan diñu ôh.

¹⁶Kyuadah jơ̆ng diñu êran čiăng ngă klei jhat, leh anăn diñu ruăt tuh êrah.

¹⁷Kyuadah hơăi mang yơh dăng ñuăl ti anăp ală čĭm čap ƀuh hĕ leh.

¹⁸Ƀiădah phung anei dôk kăp čiăng tuh êrah diñu pô, diñu ngă ênap mă klei hdĭp diñu pô.

¹⁹Msĕ snăn yơh klei knhal tuč kơ jih jang phung ngă klei jhat čiăng ƀơ̆ng ngăn; klei khăp kơ dŏ dô srăng bi luč klei hdĭp phung jao diñu pô kơ klei anăn.

²⁰Klei knhâo ur kraih hlăm êlan dơ̆ng, ñu ur ti krah sang mnia.

²¹Ñu iêô ti anôk êlan bi kkuh mâo lu mnuih; ñu blŭ ti ƀăng jang ƀuôn prŏng:

²²“Ơ phung mluk, dŭm boh sui diih srăng khăp jing mluk? Dŭm boh sui phung mưč srăng mơak hŏng klei diñu mưč, leh anăn phung mluk bi êmut kơ klei thâo mĭn?

²³Dôk hmư̆ klei kâo ƀuah, nĕ anei, kâo srăng tuh Mngăt Myang kâo kơ diih, kâo srăng brei diih thâo klei kâo blŭ.

²⁴Kyuadah kâo iêô leh anăn diih hngah, amâo čiăng hmư̆ ôh; kâo pưi kngan jak leh anăn amâo mâo pô uêñ kơ klei anăn ôh.

²⁵Ƀiădah diih hngah hĕ jih jang klei kâo kčĕ, leh anăn amâo tŭ ôh klei kâo ƀuah.

²⁶Kâo msĕ mơh srăng tlao tơdah diih mâo klei knap mñai; kâo srăng mưč tơdah klei bi huĭ truh kơ diih,

²⁷tơdah klei bi huĭ truh kơ diih msĕ si angĭn êbŭ, leh anăn klei knap mñai srăng truh kơ diih msĕ si angĭn đrŭng, tơdah klei rŭng răng leh anăn klei ênguôt truh kơ diih.

²⁸Hlăk anăn diih srăng iêô kâo, ƀiădah kâo amâo srăng lŏ wĭt lač ôh; diih srăng duah kâo hŏng jih ai tiê, ƀiădah diih amâo srăng ƀuh kâo ôh.

²⁹Kyuadah diih bi êmut leh kơ klei thâo mĭn, leh anăn amâo ruah ôh klei huĭ mpŭ kơ Yêhôwa,

³⁰amâo tŭ ôh klei kâo kčĕ leh anăn bi êmut kơ jih klei kâo ƀuah.

³¹Kyuanăn diih srăng ƀơ̆ng boh tui si êlan diih tui, leh anăn trei hŏng klei diih mnêč.

³²Phung mluk djiê kyuadah diñu tui êlan wê, leh anăn klei diñu amâo uêñ ôh srăng bi rai diñu.

³³Ƀiădah hlei pô dôk hmư̆ kâo srăng dôk hơĭt, leh anăn srăng dôk êđăp ênang, amâo huĭ kơ klei jhat ôh.”