Read Rade Klei Bi Hriêng 11 Bible Online

Klei Bi Hriêng 11 - Rade bible

Klei Bi Hriêng 11

¹Yêhôwa bi êmut kheh kơ knăng mkă soh, ƀiădah Ñu mơak hŏng knăng mkă djŏ.

²Tơdah klei mgao truh, klei hêñ truh mơh; ƀiădah klei thâo mĭn dôk mbĭt hŏng phung luă gŭ.

³Klei ênuah ênô phung kpă ênô atăt gai digơ̆, ƀiădah klei mdêč mdar phung lhiăr bi rai diñu pô.

⁴Ngăn drăp amâo yuôm ôh ti hruê klei ngêñ, ƀiădah klei kpă ênô bi mtlaih arăng mơ̆ng klei djiê.

⁵Klei kpă ênô mnuih kpă srăng bi kpă êlan ñu, ƀiădah mnuih ƀai srăng êbuh kyua klei ƀai ñu pô.

⁶Klei kpă ênô phung kpă srăng bi mtlaih digơ̆, ƀiădah phung lhiăr djŏ ƀưi klei tluh diñu pô.

⁷Tơdah mnuih ƀai djiê, klei ñu čang hmăng rai luč, leh anăn klei mnuih wê čang guôn amâo truh ôh.

⁸Arăng bi mtlaih mnuih kpă ênô mơ̆ng klei rŭng răng, ƀiădah klei rŭng răng anăn truh kơ mnuih ƀai.

⁹Sa čô mnuih ƀai čiăng bi rai pô riêng gah ñu hŏng klei ñu blŭ, ƀiădah hŏng klei thâo mĭn mnuih kpă ênô srăng tlaih.

¹⁰Tơdah phung kpă ênô mâo klei jăk jĭn, jih ƀuôn dôk hơ̆k mơak, leh anăn tơdah phung ƀai rai luč, arăng driâo hơ̆k.

¹¹Hŏng klei jăk jĭn phung kpă ênuah ƀuôn mâo klei đĭ kyar, ƀiădah phung ƀai mdlưh ƀuôn hŏng klei diñu blŭ.

¹²Pô mưč kơ riêng gah ñu kƀah klei thâo mĭn, ƀiădah mnuih mâo klei thâo săng dôk ñăt.

¹³Pô kreh yăl dliê bi êdah klei hgăm, ƀiădah hlei pô mâo ai tiê sĭt suôr amâo bi êdah klei hgăm ôh.

¹⁴Tơdah amâo mâo klei atăt gai ôh phung ƀuôn sang srăng lĕ, ƀiădah mâo klei hơĭt tơdah mâo lu mnuih đru kčĕ.

¹⁵Hlei pô rơ̆ng kơ sa čô tue srăng mâo klei luh liê kyua klei anăn, ƀiădah hlei pô bi êmut kơ klei rơ̆ng anăn mâo klei hnŭk ênang.

¹⁶Arăng srăng mpŭ kơ mniê mâo knuih jăk, ƀiădah phung êkei jhŏng ƀai mâo knŏng klei mdrŏng.

¹⁷Mnuih jăk ngă jăk kơ mngăt ñu pô, ƀiădah mnuih jhŏng ƀai bi rŭng kđeh ñu pô.

¹⁸Mnuih ƀai ƀơ̆ng ênoh hŏng klei mplư, ƀiădah hlei pô ngă klei kpă ênô srăng mâo klei mưn sĭt nik.

¹⁹Hlei pô dôk kjăp hlăm klei kpă ênô srăng hdĭp, ƀiădah hlei pô duah ngă klei ƀai srăng djiê.

²⁰Yêhôwa bi êmut phung mâo klei mĭn wê, ƀiădah phung amâo mâo klei soh ôh bi mơak kơ Ñu.

²¹Brei ih thâo sĭt mnuih soh amâo srăng tlaih kơ klei bi kmhal ôh, ƀiădah phung kpă ênô srăng tlaih.

²²Msĕ si sa boh kông mah ti adŭng ŭn, msĕ snăn mơh mniê siam amâo mâo klei thâo mĭn ôh.

²³Klei phung kpă ênô čiăng knŏng bi truh klei jăk, klei phung ƀai čiăng bi truh klei ngêñ.

²⁴Sa čô mnuih brei hŏng klei kmah, ƀiădah ăt đĭ mdrŏng hĭn, sa čô mnuih mkăn amâo brei ênŭm tui si klei djŏ ôh, ƀiădah ăt mâo klei kƀah.

²⁵Sa čô kmah srăng đĭ mdrŏng hĭn, leh anăn hlei pô đru arăng, arăng srăng đru ñu msĕ mơh.

²⁶Phung ƀuôn sang tăm pah kơ pô pioh mdiê ƀlê kơ ñu pô, ƀiădah hlei pô čhĭ gơ̆ srăng mâo klei jăk jĭn.

²⁷Hlei pô tui duah klei jăk mâo klei pap, ƀiădah hlei pô tui duah klei jhat srăng mâo klei jhat.

²⁸Hlei pô knang kơ klei mdrŏng ñu pô srăng lĕ, ƀiădah phung kpă ênô srăng đĭ kyar msĕ si hla kyâo mtah.

²⁹Hlei pô bi rŭng sang ñu pô srăng dưn angĭn, leh anăn mnuih mluk srăng jing hlŭn kơ mnuih thâo mĭn.

³⁰Boh mnuih kpă ênô jing sa ƀĕ ana kyâo klei hdĭp, leh anăn pô atăt phung mnuih kơ klei đăo jing pô thâo mĭn.

³¹Tơdah arăng bi wĭt klei djŏ kơ mnuih kpă ênô ti lăn ala anei, kdlưn hĭn arăng srăng bi wĭt ya klei djŏ kơ pô ƀai leh anăn pô soh.