Read Rade Klei Bi Hriêng 12 Bible Online

Klei Bi Hriêng 12 - Rade bible

Klei Bi Hriêng 12

¹Hlei pô khăp kơ klei mkra khăp kơ klei thâo săng, ƀiădah hlei pô bi êmut kơ klei ƀuah jing mluk mgu yơh.

²Mnuih jăk mă tŭ klei pap mơ̆ng Yêhôwa, ƀiădah Yêhôwa bi kmhal pô ngă ƀai.

³Mnuih amâo jing kjăp ôh kyua klei măk ƀai, ƀiădah agha phung kpă arăng amâo dưi buč ôh.

⁴Sa mô̆ jăk jing msĕ si đuôn mtao kơ ung ñu, ƀiădah sa mô̆ bi hêñ gơ̆ jing msĕ si iêng ƀơ̆ng klang.

⁵Hdră phung kpă ênô jing djŏ, klei phung ƀai kčĕ knŏng čiăng mplư.

⁶Klei phung ƀai blŭ kăp tuh êrah, ƀiădah ƀăng êgei phung kpă bi mtlaih mnuih.

⁷Arăng mdlưh phung ƀai leh anăn amâo lŏ mâo diñu ôh, ƀiădah sang phung kpă ênô srăng dôk kjăp.

⁸Hlei pô mâo klei thâo mĭn arăng bi mni, ƀiădah hlei pô mâo ai tiê wê arăng bi êmut.

⁹Jăk hĭn jing sa čô luă gŭ leh anăn mâo sa čô dĭng buăl, hŏng mgưt jing sa čô prŏng leh anăn kƀah mnơ̆ng ƀơ̆ng huă.

¹⁰Mnuih kpă ênô răng kriê kơ hlô mnơ̆ng ñu rông, ƀiădah klei phung ƀai ngă jăk ăt jing jhat mơh.

¹¹Hlei pô kriăng mă bruă hlăm hma ñu srăng mâo lu mnơ̆ng ƀơ̆ng huă, ƀiădah hlei pô tui duah klei amâo yuôm jing mnuih amâo thâo săng ôh.

¹²Phung ƀai tluh kơ mnơ̆ng phung jhat plah mă, ƀiădah agha phung kpă ênô srăng mboh lu.

¹³Sa čô mnuih ƀai djŏ ñuăl ñu pô dăng hŏng klei ñu blŭ soh, ƀiădah mnuih kpă ênô srăng tlaih mơ̆ng klei rŭng răng.

¹⁴Arăng mâo klei mưn jăk tui si klei ñu blŭ, leh anăn grăp čô mă tŭ tui si bruă kngan ñu ngă.

¹⁵Mnuih mluk yap êlan ñu pô jing kpă, ƀiădah mnuih thâo mĭn kăp hmư̆ klei kčĕ.

¹⁶Sa čô mnuih mluk bi êdah mtam klei ñu ngêñ, ƀiădah mnuih thâo mĭn amâo uêñ ôh kơ klei arăng dlao wač.

¹⁷Pô hưn klei sĭt blŭ klei sĭt, ƀiădah mnuih hưn luar blŭ klei mplư.

¹⁸Klei mnuih blŭ amâo răng ôh jing msĕ si đao gưm tlŏ, ƀiădah êlah phung thâo mĭn thâo bi hlao.

¹⁹Ƀăng êgei blŭ klei sĭt nik dôk kjăp hlŏng lar, ƀiădah êlah blŭ luar dôk knŏng bhiâo.

²⁰Klei mplư dôk hlăm ai tiê phung trông čhai kơ klei jhat, ƀiădah klei pô trông čhai kơ klei êđăp ênang mâo klei hơ̆k mơak.

²¹Amâo mâo sa mta klei jhat truh kơ mnuih kpă ênô ôh, ƀiădah phung ƀai bŏ hŏng klei rŭng răng.

²²Yêhôwa bi êmut kheh kơ êlah blŭ klei luar, ƀiădah Ñu mơak hŏng phung blŭ klei sĭt.

²³Mnuih thâo răng mdăp klei ñu thâo mĭn, ƀiădah phung mluk hưn mdah klei mluk diñu.

²⁴Kngan mnuih kriăng srăng kiă kriê, ƀiădah phung alah srăng jing hlŭn.

²⁵Klei ênguôt ai tiê mnuih bi ktrŏ gơ̆, ƀiădah klei blŭ jăk bi mơak kơ gơ̆.

²⁶Phung kpă atăt gai phung riêng gah diñu, ƀiădah êlan phung ƀai bi klah đuĕ digơ̆.

²⁷Phung alah amâo atŭk mkra ôh mnơ̆ng diñu hiu mnah ôh, ƀiădah phung kriăng khăp kơ ngăn drăp diñu.

²⁸Hlăm êlan klei kpă ênô mâo klei hdĭp, hlăm êlan anăn amâo mâo ôh klei djiê.