Read Rade Klei Bi Hriêng 13 Bible Online

Klei Bi Hriêng 13 - Rade bible

Klei Bi Hriêng 13

¹Phung anak thâo mĭn dôk hmư̆ klei ama diñu bi hriăm, ƀiădah phung mnuih mưč amâo dôk hmư̆ ôh klei arăng ƀuah.

²Mnuih jăk ƀơ̆ng klei jăk tui si klei ñu blŭ, ƀiădah phung lhiăr tluh ngă klei măk ƀai.

³Hlei pô răng kriê kơ ƀăng êgei ñu kiă kriê klei hdĭp ñu, hlei pô ha prŏng ƀăng êgei ñu nao kơ klei rai luč.

⁴Mnuih alah mâo klei tluh ƀiădah amâo mâo mnơ̆ng ôh, ƀiădah phung mnuih kriăng mâo djăp mta mnơ̆ng.

⁵Mnuih kpă ênô bi êmut kơ klei luar, ƀiădah mnuih ƀai ngă klei arăng bi êmut leh anăn bŏ hŏng klei hêñ.

⁶Klei kpă mgang hlei pô êbat êlan ênuah ênô, ƀiădah klei soh mdlưh phung ƀai.

⁷Mâo pô mgưt ngă mdrŏng, ƀiădah amâo mâo sa mta mnơ̆ng ôh, mâo pô mkăn mgưt ngă ƀun ƀin, ƀiădah mâo lu ngăn drăp.

⁸Klei mdrŏng sa čô mnuih jing mnơ̆ng bi tui kơ klei hdĭp ñu, ƀiădah mnuih ƀun ƀin amâo huĭ klei arăng arưp aram ôh.

⁹Klei mngač phung kpă ênô mtrang mngač nanao, ƀiădah pui kđen phung ƀai djăl ram.

¹⁰Klei mgao knŏng bi truh klei bi mneh msao, ƀiădah klei thâo mĭn dôk mbĭt hŏng phung dôk hmư̆ klei kčĕ.

¹¹Ngăn drăp mâo hŏng klei wê srăng luč ƀrư̆ ƀrư̆, ƀiădah ngăn drăp mkăm pioh ƀrư̆ ƀrư̆ srăng đĭ hĭn nanao.

¹²Klei bi kdung klei čang hmăng bi ruă ai tiê, ƀiădah klei čang hmăng truh leh jing sa ƀĕ kyâo klei hdĭp.

¹³Hlei pô bi êmut klei bi hriăm bi luč ñu pô, ƀiădah hlei pô mpŭ kơ klei mtă srăng mâo klei mưn.

¹⁴Klei sa čô thâo mĭn bi hriăm jing akŏ êa klei hdĭp, čiăng bi mtlaih arăng mơ̆ng kđông klei djiê.

¹⁵Klei thâo săng jăk bi truh klei pap, ƀiădah êlan phung wê jing dleh.

¹⁶Mnuih thâo răng ngă jih bruă hŏng klei thâo mĭn, ƀiădah mnuih mluk bi êdah klei mluk ñu.

¹⁷Mnuih ba klei mrâo mrang jhat bi truh klei rŭng răng, ƀiădah dĭng ktang sĭt suôr bi truh klei bi hlao.

¹⁸Hlei pô hngah klei mjuăt srăng jing ƀun ƀin leh anăn hêñ, ƀiădah hlei pô tŭ klei mkra srăng mâo klei mpŭ.

¹⁹Sa klei čiăng truh leh jing mmih kơ mngăt, ƀiădah phung mluk amâo čiăng đuĕ mơ̆ng klei ngă ƀai ôh.

²⁰Hlei pô dôk hŏng phung thâo mĭn srăng jing thâo mĭn, ƀiădah hlei pô jing găp hŏng phung mluk srăng tŭ klei jhat.

²¹Klei knap mñai tiŏ phung ngă soh, ƀiădah klei đĭ kyar jing klei mưn kơ phung kpă ênô.

²²Mnuih jăk brei ngăn dưn kơ phung anak čô ñu, ƀiădah ngăn dŏ mnuih soh pioh kơ phung kpă ênô.

²³Hma mnuih ƀun ƀin dưi mâo mnơ̆ng ƀơ̆ng huă êbeh dlai, ƀiădah mnơ̆ng anăn luč hĕ kyua arăng amâo ngă kpă ôh.

²⁴Hlei pô amâo čăm mkra anak êkei ñu hŏng giê bi êmut kơ gơ̆ yơh, ƀiădah hlei pô khăp kơ gơ̆ kriăng mkra gơ̆.

²⁵Mnuih kpă ênô mâo mnơ̆ng ƀơ̆ng huă djăp kơ ñu pô, ƀiădah tian phung ƀai srăng mâo klei kƀah.