Read Rade Klei Bi Hriêng 15 Bible Online

Klei Bi Hriêng 15 - Rade bible

Klei Bi Hriêng 15

¹Klei lŏ wĭt lač êdu bi hlai klei ngêñ, ƀiădah klei blŭ khăng bi mčhur klei ăl.

²Êlah phung thâo mĭn blŭ klei thâo săng, ƀiădah ƀăng êgei phung mluk bi kbiă klei mluk.

³Ală Yêhôwa dlăng tar ƀar anôk, kăp dlăng phung ƀai leh anăn phung jăk.

⁴Êlah êdu êun jing sa ƀĕ ana kyâo klei hdĭp, ƀiădah êlah wê bi mčah ai tiê.

⁵Mnuih mluk bi êmut kơ klei ama ñu mkra, ƀiădah hlei pô mă tŭ klei ƀuah mkra jing pô thâo mĭn.

⁶Mâo ngăn drăp lu hlăm sang mnuih kpă ênô, ƀiădah mnơ̆ng mnuih ƀai mâo bi truh klei rŭng răng.

⁷Êlah phung thâo mĭn bi lar klei thâo săng, ƀiădah klei mĭn phung mluk amâo ngă snăn ôh.

⁸Yêhôwa bi êmut kheh kơ mnơ̆ng phung ƀai ngă yang, ƀiădah klei phung kpă wah lač bi mơak kơ Ñu.

⁹Yêhôwa bi êmut kheh kơ êlan mnuih ƀai, ƀiădah Ñu khăp kơ pô tui hlue klei kpă ênô.

¹⁰Hlei pô lui êlan kpă srăng tŭ klei mkra ktang, hlei pô bi êmut kơ klei ƀuah srăng djiê.

¹¹Tơdah Yêhôwa ƀuh leh jih jang mnơ̆ng hlăm Ƀuôn Phung Djiê leh anăn Ƀăng Êlam, kdlưn hĭn kơ anăn, Ñu thâo kral leh ai tiê phung mnuih!

¹²Mnuih kreh mưč amâo khăp ôh arăng ƀuah ñu, ñu amâo nao êmuh ôh kơ phung thâo mĭn.

¹³Ai tiê hơ̆k mơak bi êdah ti ƀô̆ mta, ƀiădah ai tiê ênguôt bi ktrŏ mngăt.

¹⁴Ai tiê pô thâo săng duah klei thâo mĭn, ƀiădah ƀăng êgei phung mluk duah klei mluk.

¹⁵Hŏng mnuih knap mñai jih jang hruê jing jhat nanao, ƀiădah ai tiê hơ̆k mâo klei huă mnăm nanao.

¹⁶Jăk hĭn mâo mnơ̆ng ƀiă mbĭt hŏng klei huĭ mpŭ kơ Yêhôwa, hŏng mâo lu ngăn drăp mbĭt hŏng klei rŭng răng.

¹⁷Ti anôk mâo klei khăp, ƀơ̆ng knŏng djam rơ̆k dưn jing jăk hĭn kơ ƀơ̆ng sa drei êmô êmŏng mbĭt hŏng klei bi êmut.

¹⁸Sa čô mnuih djăl ăl bi mčhur klei bi mneh msao, ƀiădah hlei pô gĭr bi hlai klei anăn.

¹⁹Êlan mnuih alah bŏ hŏng êruê, ƀiădah êlan mnuih kpă jing prŏng leh anăn dap.

²⁰Sa čô anak êkei thâo mĭn bi mơak kơ ama ñu, ƀiădah sa čô mluk bi êmut kơ amĭ ñu.

²¹Klei mluk jing klei hơ̆k mơak kơ pô amâo mâo klei thâo mĭn ôh, ƀiădah sa čô mnuih thâo săng êbat hŏng klei kpă.

²²Tơdah amâo mâo klei trông čhai, hdră ih čiăng ngă srăng luč, ƀiădah tơdah mâo lu mnuih kčĕ hdră ih srăng dưi.

²³Klei lŏ wĭt lač djŏ bi mơak kơ arăng, leh anăn klei blŭ ti mông găl jing jăk snăk.

²⁴Êlan mnuih thâo mĭn atăt phă dlông kơ klei hdĭp, čiăng kơ ñu tlaih mơ̆ng Ƀuôn Phung Djiê ti gŭ.

²⁵Yêhôwa bi klưh sang phung mgao, ƀiădah Ñu mgang knông lăn mniê djiê ung.

²⁶Yêhôwa bi êmut kheh kơ klei mĭn phung ƀai, ƀiădah klei phung doh jăk blŭ bi mơak kơ Ñu.

²⁷Hlei pô ră ƀơ̆ng ngăn soh bi rŭng sang ñu pô, ƀiădah hlei pô bi êmut kơ ngăn sun srăng dôk hdĭp.

²⁸Mnuih kpă ênô ksiêm mĭn si klei lŏ wĭt lač, ƀiădah ƀăng êgei mnuih ƀai blŭ bi lar klei soh.

²⁹Yêhôwa dôk kbưi mơ̆ng phung ƀai, ƀiădah Ñu dôk hmư̆ klei phung kpă wah lač.

³⁰Ƀô̆ mta hơ̆k bi mơak kơ ai tiê, klei mrâo mrang jăk lŏ bi mơai asei mlei.

³¹Hlei pô mđing knga kơ klei mkra, srăng dôk hdĭp mbĭt hŏng phung thâo mĭn.

³²Hlei pô hngah klei mkra bi êmut kơ mngăt ñu pô, ƀiădah hlei pô dôk hmư̆ klei mkra mă tŭ klei thâo săng.

³³Klei huĭ mpŭ kơ Yêhôwa bi hriăm mnuih mâo klei thâo mĭn, leh anăn klei luă gŭ nao êlâo kơ klei mpŭ.