Read Rade Klei Bi Hriêng 17 Bible Online

Klei Bi Hriêng 17 - Rade bible

Klei Bi Hriêng 17

¹Sa klŏ kpŭng krô hŏng klei êđăp ênang jing jăk hĭn kơ sa boh sang bŏ hŏng mnơ̆ng ƀơ̆ng huă mâo klei bi mneh msao.

²Sa čô hlŭn thâo mĭn srăng jing khua kơ anak êkei ngă klei hêñ, leh anăn ñu srăng dưn ngăn mdŭm hŏng sa čô ayŏng adei hlăm găp djuê.

³Anôk bi lik pioh kơ prăk leh anăn kpur pioh kơ mah, ƀiădah Yêhôwa jing Pô lông dlăng ai tiê.

⁴Mnuih ƀai mđing knga kơ êlah blŭ klei ƀai, mnuih luar gưt kơ êlah blŭ klei jhat.

⁵Hlei pô mưč kơ mnuih ƀun ƀin dlao wač kơ Pô Mjing gơ̆, hlei pô mơak kyua klei knap mñai truh amâo srăng tlaih kơ klei bi kmhal ôh.

⁶Phung čô čĕ jing đuôn mtao kơ phung mduôn, leh anăn amĭ ama jing klei guh kơang kơ phung anak diñu.

⁷Klei blŭ siam amâo năng ôh kơ sa čô mluk, kdlưn hĭn kơ anăn klei blŭ luar amâo năng ôh kơ sa čô khua kiă kriê.

⁸Ngăn sun jing msĕ si drao kơ pô yua gơ̆, ti anôk ñu nao, ñu mâo klei dưi.

⁹Hlei pô pap brei klei soh duah klei khăp hdăng găp ƀiădah hlei pô bi hdơr klei soh luč mah jiăng.

¹⁰Sa klei ƀuah kma êlam hĭn hlăm mnuih mâo klei thâo săng, hŏng sa êtuh blư̆ čăm mnuih mluk.

¹¹Mnuih ƀai knŏng duah klei bi kdơ̆ng, leh anăn arăng srăng tiŏ nao sa čô dĭng ktang ƀai nao ngă kơ ñu.

¹²Jăk hĭn bi tuôm hŏng sa drei kgâo ana arăng tlĕ leh êđai, hŏng bi tuôm hŏng mnuih mluk êjai ñu ngă klei mluk.

¹³Tơdah sa čô mnuih bi wĭt klei jhat kơ klei jăk, klei knap mñai amâo srăng đuĕ mơ̆ng sang ñu ôh.

¹⁴Klei kčưm kơ klei bi mneh msao jing msĕ si bi hluh anôk arăng bư̆ êa, snăn mdei hĕ êlâo kơ mâo klei bi mneh msao.

¹⁵Pô yap mnuih soh kpă leh anăn pô bi kmhal mnuih kpă, Yêhôwa bi êmut kơ jih dua diñu.

¹⁶Ya yuôm mnuih mluk mâo prăk, čiăng blei klei thâo mĭn, ƀiădah ñu pô amâo čiăng hriăm ôh?

¹⁷Sa čô mah jiăng khăp nanao, leh anăn mâo ayŏng adei čiăng bi đru êjai mâo klei knap mñai.

¹⁸Hlei pô amâo mâo klei thâo mĭn ngă klei bi kuôl rơ̆ng, ñu rơ̆ng kơ mnuih ti anăp pô riêng gah ñu.

¹⁹Hlei pô khăp kơ klei soh khăp kơ klei rŭng răng, hlei pô ngă ƀăng bhă dlông tui duah klei bi rai.

²⁰Sa čô mâo klei mĭn wê amâo mâo klei đĭ kyar ôh, leh anăn hlei pô mâo êlah soh lĕ hlăm klei knap mñai.

²¹Sa čô anak êkei mluk bi ênguôt kơ ama ñu, ama sa čô mnuih mluk amâo mâo klei mơak ôh.

²²Ai tiê hơ̆k mơak jing sa mta êa drao jăk, ƀiădah klei êdu ai bi thu krô klang.

²³Mnuih ƀai mă tŭ ngăn sun hŏng klei hgăm, čiăng bi msoh klei kpă.

²⁴Mnuih thâo săng ƀuh klei knhâo ti anăp ñu, ƀiădah ală mnuih mluk dlăng kơ knhal lăn ala.

²⁵Sa čô anak êkei mluk bi ênguôt ama ñu, leh anăn brei klei phĭ kơ mniê kkiêng kơ ñu leh.

²⁶Amâo jăk ôh brei mnuih kpă ba kđi, kăn jăk rei čăm phung khua kyua klei kpă diñu.

²⁷Hlei pô răng kơ klei ñu blŭ mâo klei thâo mĭn lu, leh anăn hlei pô mâo klei mĭn êđăp ênang jing sa čô mnuih thâo săng.

²⁸Arăng yap mnuih mluk jing mnuih thâo mĭn tơdah ñu dôk ñăt, tơdah ñu kđhĭp kƀông ñu arăng yap ñu mnuih thâo săng.