Read Rade Klei Bi Hriêng 19 Bible Online

Klei Bi Hriêng 19 - Rade bible

Klei Bi Hriêng 19

¹Mnuih ƀun ƀin dôk dơ̆ng ƀơ̆ng huă ênuah ênô jing jăk hĭn kơ sa čô mnuih mluk blŭ luar.

²Amâo jăk ôh sa čô mnuih mâo klei hur har ƀiădah kƀah klei thâo săng, leh anăn hlei pô ruăt nao srăng wơr êlan.

³Klei mluk sa čô mnuih bi rai klei hdĭp ñu, ƀiădah lĕ ai tiê ñu ngêñ kơ Yêhôwa.

⁴Klei mdrŏng lŏ thiăm lu mah jiăng, sa čô ƀun ƀin, ƀiădah mah jiăng lui hĕ.

⁵Pô hưn soh hlăm sang phat kđi amâo srăng tlaih ôh kơ klei bi kmhal, leh anăn hlei pô blŭ luar kăn srăng tlaih ôh.

⁶Lu mnuih srăng tluñ ai pap mnuih kmah, leh anăn jih jang mnuih jing mah jiăng kơ pô mđup myơr.

⁷Jih jang ayŏng adei mnuih ƀun ƀin bi êmut kơ gơ̆, ƀai hĭn phung mah jiăng gơ̆ đuĕ kbưi mơ̆ng gơ̆! Gơ̆ blŭ kwưh kơ diñu, ƀiădah diñu đuĕ.

⁸Hlei pô duah klei thâo mĭn khăp kơ mngăt ñu pô, hlei pô djă pioh klei thâo săng srăng đĭ kyar.

⁹Pô hưn luar amâo srăng tlaih ôh mơ̆ng klei bi kmhal, leh anăn hlei pô blŭ luar srăng rai tuč.

¹⁰Amâo guôp ôh sa čô mluk dôk hdĭp hlăm klei mdrŏng sah, amâodah sa čô hlŭn jing khua kơ phung anak mtao.

¹¹Mnuih mâo klei thâo mĭn jing pô amâo djăl ăl, leh anăn jing klei guh kơang kơ ñu amâo yap ôh klei arăng bi msoh kơ ñu.

¹²Klei mtao ngêñ jing msĕ si klei êmông gu gruh, ƀiădah klei ñu pap jing msĕ si êa nguôm ti rơ̆k.

¹³Sa čô anak êkei mluk jing klei bi rai kơ ama ñu, leh anăn klei mô̆ bi mneh msao jing msĕ si êa hjan rôč nanao.

¹⁴Arăng dưi dưn sang leh anăn klei mdrŏng mơ̆ng amĭ ama, ƀiădah mô̆ mâo klei thâo săng jing mnơ̆ng Yêhôwa brei.

¹⁵Klei alah bi pĭt arăng, leh anăn mnuih dôk mang srăng ư̆ êpa.

¹⁶Hlei pô djă pioh klei Yêhôwa mtă srăng hdĭp sui, ƀiădah hlei pô amâo gưt ôh srăng djiê.

¹⁷Hlei pô brei pap kơ mnuih ƀun ƀin jing brei Yêhôwa čan, leh anăn Yêhôwa srăng lŏ bi wĭt kơ ñu tui si bruă jăk ñu ngă leh.

¹⁸Mkra bĕ anak ih êjai ăt mâo klei čang hmăng, ƀiădah đăm čăm ôh tơl ñu djiê.

¹⁹Hlei pô djăl ngêñ srăng tŭ klei bi kmhal, tơdah ih bi mtlaih ñu sa blư̆, ih srăng ngă nanao yơh.

²⁰Dôk hmư̆ bĕ klei kčĕ leh anăn mă tŭ bĕ klei bi hriăm, snăn ih dưi mâo klei thâo mĭn mơ̆ng anei kơ anăp.

²¹Ai tiê mnuih mâo lu hdră čiăng ngă, ƀiădah klei Yêhôwa čuăn srăng dưi.

²²Klei arăng čiăng ƀuh hlăm sa čô mnuih jing klei sĭt suôr, leh anăn klei jing ƀun ƀin jăk hĭn kơ mnuih luar.

²³Klei huĭ mpŭ kơ Yêhôwa atăt kơ klei hdĭp, hlei pô mâo klei anăn srăng mơak, klei rŭng răng amâo srăng truh kơ ñu ôh.

²⁴Mnuih alah đrŭt kngan ñu hlăm jam, leh anăn amâo lŏ ba kơ ƀăng êgei ñu ôh.

²⁵Čăm mnuih mưč leh anăn mnuih mluk srăng hriăm klei thâo mĭn, ƀuah mnuih mâo klei thâo săng, leh anăn ñu srăng thiăm klei thâo mĭn lu.

²⁶Hlei pô ngă jhat kơ ama ñu leh anăn suôt amĭ ñu, mơ̆ng sang, jing sa čô anak mâo klei hêñ.

²⁷Ơ Anak kâo, tơdah ih mdei hĕ dôk hmư̆ klei mtô lač, ih srăng wơr bĭt jih klei ih thâo leh.

²⁸Pô hưn soh mưč kơ klei kpă, leh anăn mnuih ƀai bi lar klei wê.

²⁹Arăng mkra leh klei phat kđi kơ phung mưč, leh anăn klei čăm hŏng giê hnuăt pioh kơ rŏng phung mluk.