Read Rade Klei Bi Hriêng 2 Bible Online

Klei Bi Hriêng 2 - Rade bible

Klei Bi Hriêng 2

¹Anak kâo, tơdah ih mă tŭ klei kâo blŭ, leh anăn djă pioh klei kâo mtă,

²mđing knga kơ klei knhâo, leh anăn mâo ai tiê čiăng thâo săng;

³sĭt yơh, tơdah ih duah ksiêm bi nik, leh anăn tơdah ih akâo kơ klei thâo săng,

⁴tơdah ih duah gơ̆ msĕ si prăk, leh anăn tiŏ gơ̆ msĕ si ngăn drăp mdăp leh,

⁵hlăk anăn ih srăng thâo săng klei huĭ mpŭ kơ Yêhôwa, leh anăn truh kơ klei thâo kral Aê Diê.

⁶Kyuadah Yêhôwa brei klei knhâo; mơ̆ng ƀăng êgei Ñu kbiă hriê klei thâo mĭn leh anăn klei thâo săng.

⁷Ñu pioh klei knhâo kơ mnuih kpă, Ñu jing khil kơ phung êbat hlăm klei djŏ.

⁸Ñu mgang êlan klei kpă, leh anăn kiă kriê êlan phung doh jăk Ñu.

⁹Hlăk anăn ih srăng thâo săng klei kpă, klei djŏ, klei ênuah ênô, leh anăn jih jang êlan jăk.

¹⁰Kyuadah klei knhâo srăng mŭt hlăm ai tiê ih, leh anăn klei thâo mĭn srăng bi mơak kơ mngăt ih.

¹¹Klei ih thâo ksiêm srăng răng kriê ih, klei thâo săng srăng mgang ih,

¹²čiăng bi mtlaih ih mơ̆ng êlan jhat, mơ̆ng mnuih blŭ klei wê.

¹³Phung anăn lui êlan klei kpă ênô čiăng êbat hlăm êlan mmăt.

¹⁴Diñu mơak ngă klei jhat, diñu hơ̆k hŏng klei ƀai.

¹⁵Diñu tui hlue êlan wê, leh anăn ngă mnêč hŏng klei mplư.

¹⁶Snăn ih srăng tlaih mơ̆ng mniê knhông, pô duah mplư ih hŏng klei blŭ myâo mă,

¹⁷pô lui ung ñu mâo mơ̆ng ênuk ñu hlăk ai, leh anăn wơr bĭt klei bi mguôp hŏng Aê Diê ñu.

¹⁸Kyuadah sang ñu klĭng phă klei djiê, leh anăn êlan ñu atăt kơ anôk phung djiê dôk.

¹⁹Phung nao kơ ñu amâo tuôm lŏ wĭt ôh, kăn diñu lŏ truh rei kơ êlan klei hdĭp.

²⁰Snăn ih srăng êbat hlăm êlan phung mnuih jăk, leh anăn tui êlan phung kpă ênô.

²¹Kyuadah phung kpă srăng dưn čar, leh anăn phung ênuah srăng dôk tinăn.

²²Ƀiădah arăng srăng bi rai hĕ phung măk ƀai mơ̆ng čar, leh anăn arăng srăng buč hĕ phung lhiăr.