Read Rade Klei Bi Hriêng 20 Bible Online

Klei Bi Hriêng 20 - Rade bible

Klei Bi Hriêng 20

¹Kpiê brei arăng thâo mưč, kpiê ktang brei arăng ngă hao hao, hlei pô mnăm êgao hnơ̆ng jing pô amâo thâo mĭn ôh.

²Klei mtao ngêñ jing msĕ si klei êmông gu gruh, hlei pô mčhur ai ñu bi luč klei hdĭp pô.

³Jing klei mpŭ kơ mnuih amâo ngă ôh klei bi mneh msao, ƀiădah knŏng mnuih mluk lĕ hlăm klei anăn.

⁴Mnuih alah amâo kai hma djŏ yan, snăn ti yan puôt ñu amâo srăng mâo boh ôh.

⁵Klei mĭn mnuih jing msĕ si êa êlam, ƀiădah mnuih thâo săng thâo djăt mă mơ̆ng anăn.

⁶Lu mnuih hưn ñu pô jing jăk, ƀiădah hlei dưi ƀuh pô sĭt suôr?

⁷Mnuih kpă ênô êbat hlăm klei ênuah, jăk mơak yơh phung anak čô ñu êdei.

⁸Mtao dôk gŭ ti jhưng phat kđi, ñu hdei jih klei jhat hŏng ală ñu dlăng.

⁹Hlei dưi lač, “Kâo djă pioh leh ai tiê kâo doh, kâo doh jăk leh amâo mâo klei soh ôh?”

¹⁰Klei mkă boh ktrŏ soh leh anăn boh dlông soh, jih dua anăn Yêhôwa bi êmut kheh.

¹¹Wăt hđeh bi êdah si ñu jing hŏng klei ñu ngă, thâodah doh amâodah kpă.

¹²Knga pioh hmư̆ leh anăn ală pioh dlăng, Yêhôwa sơăi mjing jih dua.

¹³Đăm khăp pĭt ôh huĭdah ih jing ƀun ƀin, mblang ală ih leh anăn ih srăng mâo djăp mnơ̆ng ƀơ̆ng huă.

¹⁴Pô blei lač dŏ anăn “jhat, jhat”, ƀiădah leh ñu đuĕ nao ñu bi mni kơ ñu pô.

¹⁵Mâo mah leh anăn djăp mta boh tâo yuôm, ƀiădah êlah thâo mĭn jing yuôm bhăn hĭn.

¹⁶Mgơ̆ng čhiăm ao tơdah ñu rơ̆ng kơ mnuih tue, brei ñu bi mâo mnơ̆ng mgơ̆ng tơdah ñu rơ̆ng kơ mniê êgar.

¹⁷Kpŭng mâo hŏng klei soh jing mmih kơ mnuih, ƀiădah êdei ƀăng êgei ñu bŏ hŏng čuah êga.

¹⁸Ngă hdră brei jưh kơ klei kčĕ, ngă klei bi blah brei hmư̆ pô kčĕ đru.

¹⁹Hlei pô yăl dliê djưč pŏk lưk klei hgăm, snăn đăm bi mguôp ôh hŏng pô kreh blŭ lu.

²⁰Tơdah sa čô tăm pah kơ amĭ ama ñu, pui kđen ñu srăng ram ti krah klei mmăt.

²¹Ngăn dưn arăng dưi mâo pral hlăk êlâo amâo srăng bi truh klei jăk jĭn ôh ti knhal tuč.

²²Đăm lač ôh, “Kâo srăng rŭ ênua kơ klei jhat,” dôk guôn bĕ kơ Yêhôwa, leh anăn Ñu srăng bi mtlaih ih.

²³Yêhôwa bi êmut kheh kơ boh ktrŏ amâo djŏ ôh, leh anăn knăng amâo djŏ amâo bi mơak kơ Ñu ôh.

²⁴Yêhôwa yơh atăt gai knhuang mnuih, snăn si mnuih dưi thâo săng êlan ñu pô?

²⁵Jing kđông ƀêč yơh kơ mnuih pral đei ƀuăn brei mnơ̆ng doh jăk, leh anăn lŏ ksiêm êdei kơ klei ñu ƀuăn leh.

²⁶Sa čô mtao knhâo hdei hĕ phung jhat ƀai, leh anăn ñu brei arăng mdar pông êdeh prah mdiê ti dlông phung anăn.

²⁷Mngăt mnuih jing pui kđen Yêhôwa, ñu ksiêm tơl truh ti anôk hgăm hlăm lam ai tiê.

²⁸Klei khăp leh anăn klei sĭt suôr mgang mtao, leh anăn klei jăk krơ̆ng jhưng mtao ñu.

²⁹Klei ktang phung êkei hlăk ai jing klei guh kơang diñu, ƀiădah ƀŭk kô̆ jing kdrăp kơ phung mduôn.

³⁰Klei brăm êka keh bi doh klei jhat ƀai, leh anăn klei čăm bi doh anôk hgăm hlăm lam ai tiê.