Read Rade Klei Bi Hriêng 22 Bible Online

Klei Bi Hriêng 22 - Rade bible

Klei Bi Hriêng 22

¹Klei hing ang jăk jing yuôm hĭn kơ lu ngăn drăp, klei arăng khăp hơiêng jing yuôm hĭn kơ prăk leh anăn mah.

²Phung mdrŏng leh anăn phung ƀun ƀin bi mâo sa klei mbĭt: Yêhôwa mjing jih diñu dua.

³Mnuih thâo mĭn ƀuh klei jŭ jhat leh anăn đuĕ dăp, ƀiădah mnuih mluk hlŏng nao phă anăp leh anăn tŭ klei knap mñai.

⁴Klei mưn kơ klei luă gŭ leh anăn klei huĭ mpŭ kơ Yêhôwa jing klei mdrŏng, klei arăng mpŭ, leh anăn klei hdĭp.

⁵Mâo êruê leh anăn kđông ti êlan mnuih ƀai, hlei pô mgang mngăt ñu pô srăng đuĕ kbưi mơ̆ng êlan anăn.

⁶Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn.

⁷Mnuih mdrŏng jing khua kơ phung ƀun ƀin, leh anăn hlei pô čan jing hlŭn kơ pô brei čan.

⁸Hlei pô rah klei amâo kpă srăng wiă klei knap mñai, leh anăn giê hnuăt klei ñu ngêñ srăng joh hĕ.

⁹Mnuih thâo pap srăng mâo klei jăk jĭn, kyuadah ñu bi mbha brei mnơ̆ng ƀơ̆ng huă ñu kơ phung ƀun ƀin.

¹⁰Suôt hĕ mnuih kreh mưč leh anăn klei bi mneh msao srăng ruê̆, klei bi tăng leh anăn klei dlao wač srăng tuč.

¹¹Mtao srăng ngă mah jiăng hŏng hlei pô khăp kơ ai tiê êngeh leh anăn blŭ hŏng klei pap.

¹²Ală Yêhôwa mgang klei thâo mĭn, ƀiădah Ñu bi luč klei phung lhiăr blŭ.

¹³Mnuih alah lač, “Mâo sa drei êmông gu ti tač! Tơdah kâo kbiă, ñu srăng bi mdjiê kâo ti êlan.”

¹⁴Ƀăng êgei mniê knhông jing ƀăng êlam snăk, pô Yêhôwa ngêñ srăng lĕ hlăm ƀăng anăn.

¹⁵Ai tiê hđeh bŏ hŏng klei mluk, ƀiădah klei mkra hŏng giê srăng bi kbưi klei mluk anăn.

¹⁶Hlei pô ktư̆ juă mnuih ƀun ƀin čiăng bi mdrŏng ñu pô, leh anăn hlei pô brei ngăn sun kơ mnuih mdrŏng jih dua srăng truh kơ klei kƀah sơăi.

¹⁷Mđing knga leh anăn dôk hmư̆ klei phung thâo mĭn blŭ, hriăm bĕ klei kâo mtô.

¹⁸Kyuadah srăng jing mơak tơdah ih djă pioh klei anăn hlăm ai tiê ih, leh anăn tơdah ih dưi lŏ răk klei anăn.

¹⁹Kâo bi êdah leh klei anăn kơ ih hruê anei čiăng kơ ih thâo knang kơ Yêhôwa.

²⁰Amâo djŏ hĕ kâo čih leh kơ ih tlâo pluh klei blŭ djŏ kơ klei bi hriăm leh anăn klei thâo mĭn,

²¹čiăng hưn kơ ih klei djŏ leh anăn klei sĭt nik, čiăng kơ ih dưi lŏ wĭt lač hŏng klei sĭt nik kơ pô tiŏ nao ih?

²²Đăm tlĕ ôh dŏ dô pô ƀun ƀin kyuadah gơ̆ jing pô ƀun ƀin, leh anăn đăm ktư̆ juă ôh pô knap mñai ti ƀăng jang.

²³Kyuadah Yêhôwa srăng mgang klei digơ̆, leh anăn Ñu srăng plah mă mnơ̆ng phung plah mă leh dŏ dô digơ̆.

²⁴Đăm ngă mah jiăng ôh hŏng mnuih krêñ, kăn nao rei mbĭt hŏng mnuih djăl ăl,

²⁵huĭdah ih hriăm tui êlan ñu, leh anăn mngăt ih djŏ kđông.

²⁶Đăm jing ôh phung ƀuăn ngă klei bi mguôp amâodah đăm jing pô rơ̆ng kơ nư arăng ôh,

²⁷Tơdah ih amâo mâo mnơ̆ng dưi tla, ya yuôm ih luč jhưng pĭt ih?

²⁸Đăm bi mlih ôh knông lăn hđăp phung aê ih bi kčah leh.

²⁹Ih ƀuh mơ̆ sa čô mnuih mbruă? Ñu srăng dôk ti anăp phung mtao, ñu amâo srăng dôk ôh ti anăp phung ƀuôn sang.