Read Rade Klei Bi Hriêng 25 Bible Online

Klei Bi Hriêng 25 - Rade bible

Klei Bi Hriêng 25

¹Anei msĕ mơh jing klei bi hriêng Y-Salômôn, phung dĭng buăl Y-Hêsêkia mtao phung Yuđa lŏ tui čih:

²klei Aê Diê mdăp sa klei yuôm hgăm jing klei guh kơang kơ Ñu, klei phung mtao ksiêm duah čiăng thâo săng klei anăn jing klei guh kơang kơ digơ̆.

³Msĕ si boh dlông phung adiê leh anăn boh êlam lăn ala, msĕ snăn mơh arăng amâo dưi ksiêm ôh ai tiê phung mtao.

⁴Mă hĕ eh prăk leh anăn pô tuh mâo mnơ̆ng yua ngă hmăm.

⁵Mă hĕ phung ƀai mơ̆ng anăp mtao, leh anăn jhưng mtao ñu srăng jing kjăp hŏng klei kpă ênô.

⁶Đăm mđĭ ih pô ôh ti anăp mtao, đăm dôk ôh hlăm anôk phung hing ang;

⁷kyuadah jăk hĭn tơdah ñu lač kơ ih, “Đĭ bĕ tinei,” hŏng klei ñu bi mtrŭn ih ti anăp sa čô khua. Ya klei ih ƀuh leh hŏng ală ih pô

⁸đăm ruăt hưn kơ khua phat kđi ôh, kyuadah ti knhal tuč ya ih srăng ngă tơdah pô riêng gah ih hưn bi sĭt klei mkăn leh anăn bi hêñ ih?

⁹Tơdah ih bi mgăl klei ih hŏng pô riêng gah ih, đăm bi êdah klei hgăm sa čô mkăn ôh,

¹⁰huĭdah pô hmư̆ klei ih blŭ bi hêñ ih, leh anăn klei hing ang jhat ih arăng hdơr nanao.

¹¹Klei blŭ găl djŏ mông jing msĕ si boh mah mƀlir hlăm prăk.

¹²Klei pô thâo mĭn ƀuah kơ pô dôk hmư̆, jing msĕ si krah mah, amâodah kdrăp ngă hŏng mah.

¹³Pô arăng tiŏ nao sĭt suôr hŏng pô tiŏ nao ñu, jing msĕ si klei êđăp mơ̆ng pliêr hlăm hruê yan puôt, kyuadah ñu bi mơak mngăt khua ñu.

¹⁴Phung ƀuăn mnơ̆ng brei ƀiădah amâo brei ôh jing msĕ si knam mâo angĭn amâo mâo êa hjan ôh.

¹⁵Hŏng klei gĭr arăng dưi mă ai tiê khua kiă kriê, leh anăn êlah blŭ êdu êun dưi bi joh klang.

¹⁶Tơdah ih ƀuh êa hnuê, knŏng ƀơ̆ng man hrăp, huĭdah ih ƀơ̆ng lu đei leh anăn ƀlĕ ô̆.

¹⁷Đăm êrô đei kơ sang pô riêng gah ih ôh, huĭdah ih bi êmăn ñu, leh anăn ñu bi êmut kơ ih.

¹⁸Mnuih blŭ mčeh kơ pô riêng gah ñu jing msĕ si kmŭt, đao gưm, amâodah ƀrăm knur.

¹⁹Klei knang kơ pô lhiăr êjai hruê rŭng răng jing msĕ si sa boh êgei joh amâodah sa ƀĕ jơ̆ng ksak.

²⁰Hlei pô mmuñ kơ mnuih mâo ai tiê ênguôt jing msĕ si pô mă mđuĕ hĕ ao kpal êjai hruê êăt, leh anăn tuh êa msăm ti anôk êka.

²¹Tơdah pô roh ih êpa, brei kơ ñu mnơ̆ng ƀơ̆ng huă, leh anăn tơdah ñu mhao, brei kơ ñu êa mnăm.

²²Snăn ih srăng mkăm hdăng ngur ti dlông boh kŏ ñu, leh anăn Yêhôwa srăng brei klei mưn kơ ih.

²³Msĕ si angĭn mơ̆ng dưr brei adiê hjan, msĕ snăn mơh êlah blŭ êkŭt brei arăng ăl.

²⁴Jăk hĭn dôk ti kiêng čuôr sang hŏng dôk hlăm sang mbĭt hŏng sa čô mô̆ kreh bi mneh msao.

²⁵Klei mrâo mrang jăk mơ̆ng čar kbưi jing msĕ si êa êđăp kơ sa čô mnuih mhao.

²⁶Mnuih kpă lĕ hlăm klei mnuih ƀai mplư jing msĕ si kbăng êa êkăl amâodah akŏ êa arăng bi čhŏ.

²⁷Amâo jăk ôh ƀơ̆ng lu đei êa hnuê, msĕ snăn mơh tơdah mnuih duah bi mni kơ pô.

²⁸Sa čô mnuih amâo thâo kiă kriê ai tiê ñu pô jing msĕ si sa boh ƀuôn prŏng arăng bi klưh leh mnư̆.