Read Rade Klei Bi Hriêng 26 Bible Online

Klei Bi Hriêng 26 - Rade bible

Klei Bi Hriêng 26

¹Msĕ si pliêr hlăm yan bhang amâodah hjan hlăm yan puôt, msĕ snăn klei mpŭ amâo năng ôh kơ sa čô mluk.

²Msĕ si čĭm hrai leh anăn čĭm iăt phiơr đuĕ, msĕ snăn mơh klei tăm pah amâo mâo klei amâo srăng truh ôh.

³Giê êwĭng pioh kơ aseh, msei khơp pioh kơ aseh dliê, leh anăn giê hnuăt pioh kơ rŏng phung mluk!

⁴Đăm lŏ wĭt lač kơ mnuih mluk tui si klei mluk ñu ôh, huĭdah ih pô jing hĕ msĕ si ñu.

⁵Lŏ wĭt lač bĕ kơ mnuih mluk tui si klei mluk ñu, huĭdah ñu yap ñu pô jing thâo mĭn.

⁶Hlei pô knang kơ mnuih mluk ba klei hưn kơ arăng jing msĕ si khăt jơ̆ng ñu pô leh anăn mnăm klei bi rai.

⁷Klei blŭ bi hriêng hlăm ƀăng êgei phung mluk jing msĕ si jơ̆ng đŏng dlơt awăt amâo thâo êbat ôh.

⁸Hlei pô mpŭ kơ sa čô mluk jing msĕ si sa čô kă asăr boh tâo ti klei ksu bhĭr.

⁹Klei blŭ bi hriêng hlăm ƀăng êgei phung mluk jing msĕ si êruê tlŏ kngan sa čô mnuih kpiê ruă.

¹⁰Hlei pô mưn mnuih mluk leh anăn phung hiu găn gao jing msĕ si sa čô mnah hna bi êka jih jang mnuih.

¹¹Sa čô mnuih mluk lŏ ngă klei mluk jing msĕ si sa drei asâo lŏ wĭt ƀơ̆ng mnơ̆ng ñu ô̆ leh.

¹²Tơdah ih ƀuh sa čô mnuih yap ñu pô jing mnuih thâo mĭn, mnuih mluk jing yuôm hĭn kơ ñu.

¹³Mnuih alah lač, “Mâo sa drei êmông gu ti êlan, mâo sa drei êmông gu hiu hlăm êlan dơ̆ng!”

¹⁴Msĕ si ƀăng bhă dar ti kliăng bi đuôm ñu, snăn mơh mnuih alah ngă ti jhưng pĭt ñu.

¹⁵Mnuih alah đrŭt kngan ñu hlăm jam, leh anăn alah đei lŏ ba gơ̆ kơ ƀăng êgei.

¹⁶Mnuih alah yap ñu pô thâo mĭn hĭn kơ kjuh čô mnuih dưi lŏ wĭt lač hŏng klei găl.

¹⁷Pô hiu găn gao ngêñ hĕ kơ klei bi msao amâo djŏ hŏng ñu ôh jing msĕ si mnuih ktŭng mă asâo ti knga.

¹⁸Msĕ si sa čô khŏ bhĭr kluč pui, ƀrăm, leh anăn klei djiê,

¹⁹msĕ snăn yơh mnuih mplư pô riêng gah ñu, leh anăn lač, “Knŏng kâo hlăp!”

²⁰Kyuadah kƀah djuh pui djiê ram, leh anăn tơdah amâo mâo mnuih yăl dliê djưč klei bi mneh msao ram.

²¹Msĕ si anghar pui ƀơ̆ng hdăng leh anăn pui ƀơ̆ng djuh, msĕ snăn mơh mnuih kreh bi msao mčhur klei bi tăng.

²²Klei pô yăl dliê djưč blŭ jing msĕ si mnơ̆ng ƀơ̆ng huă jăk, ñu kma truh ti prôč êhŭng.

²³Msĕ si čeh lăn siam êbhơr ti tač, msĕ snăn mơh klei blŭ siam mơ̆ng ai tiê jhat.

²⁴Hlei pô bi êmut mgưt blŭ klei siam, ƀiădah mdăp klei mplư hlăm ai tiê ñu.

²⁵Tơdah ñu blŭ hŏng klei mmih, đăm đăo kơ ñu ôh, kyuadah mâo kjuh mta klei bi êmut kheh hlăm ai tiê ñu.

²⁶Wăt tơdah ñu mdăp klei bi êmut hŏng klei mplư, klei jhat ƀai ñu srăng êdah hlăm phung bi kƀĭn.

²⁷Hlei pô klei ƀăng srăng lĕ hlăm ƀăng anăn, leh anăn boh tâo srăng lŏ wĭt djŏ kơ pô bi klŭng gơ̆.

²⁸Êlah luar bi êmut kơ phung ñu dlao wač, leh anăn ƀăng êgei blŭ klei myâo mă ngă klei bi rai.