Read Rade Klei Bi Hriêng 27 Bible Online

Klei Bi Hriêng 27 - Rade bible

Klei Bi Hriêng 27

¹Đăm bi mni kơ hruê mgi ôh, kyuadah ih amâo thâo ôh ya srăng truh grăp hruê.

²Brei pô mkăn bi mni kơ ih, leh anăn amâo djŏ ƀăng êgei ih pô ôh, sa čô tue, amâo djŏ êlah ih pô ôh.

³Boh tâo jing ktrŏ leh anăn čuah jing ktrŏ mơh, ƀiădah klei mnuih mluk ngêñ jing ktrŏ hĭn kơ jih dua.

⁴Klei ngêñ jing jhat ƀai, leh anăn klei ăl jing msĕ si êa kluh, ƀiădah hlei pô dưi tŭ klei nač?

⁵Klei ƀuah ti anăp jing yuôm hĭn kơ klei khăp mdăp.

⁶Klei sa čô mah jiăng bi êka jing năng knang hĭn, kơ êbâo klei pô roh čŭm.

⁷Hlei pô trei leh juă êa hnuê ti gŭ jơ̆ng, ƀiădah kơ hlei pô êpa wăt mnơ̆ng phĭ jing mmih kơ ñu.

⁸Msĕ si čĭm đuĕ kbưi mơ̆ng hruh ñu, msĕ snăn mơh mnuih hiu rưng mơ̆ng sang ñu.

⁹Êa ƀâo mngưi leh anăn mnơ̆ng ƀâo mngưi čuh bi mơak kơ ai tiê, msĕ snăn mơh klei mah jiăng bi kčĕ.

¹⁰Đăm lui ôh mah jiăng ih leh anăn mah jiăng ama ih, leh anăn đăm nao ôh kơ sang ayŏng adei ih êjai ih mâo klei rŭng răng. Sa čô riêng gah dôk giăm jing jăk hĭn kơ ayŏng adei dôk kbưi.

¹¹Ơ anak kâo, brei ih mâo klei thâo mĭn, leh anăn bi mơak kơ ai tiê kâo, snăn kâo dưi lŏ wĭt lač kơ hlei pô ƀuah kâo.

¹²Mnuih thâo răng ƀuh klei jhat leh anăn đuĕ dăp, ƀiădah phung mluk hlŏng nao phă anăp leh anăn tŭ klei knap mñai.

¹³Djă pioh čhiăm ao sa čô tue čiăng ngă klei rơ̆ng, leh anăn brei ñu mâo mnơ̆ng mgơ̆ng mơ̆ng pô rơ̆ng kơ mniê tue.

¹⁴Hlei pô mdih aguah ưm čiăng hơêč hmưi klei jăk jĭn kơ mah jiăng ñu hŏng asăp kraih ktang, arăng srăng yap jing pô tăm pah.

¹⁵Sa čô mô̆ kreh mneh msao jing msĕ si ênai êa rôč nanao êjai hjan.

¹⁶Hlei pô čiăng ghă gơ̆ jing msĕ si ghă angĭn amâodah djă êa prăi ôliwơ hlăm kngan.

¹⁷Msei asah mgoh msei, msĕ snăn mơh sa čô mnuih mjuăt mnuih mkăn.

¹⁸Hlei pô kiă ana boh hra srăng ƀơ̆ng boh gơ̆, leh anăn hlei pô mgang khua ñu srăng mâo klei mpŭ.

¹⁹Msĕ si dlăng ƀô̆ mta hlăm êa, snăn mơh ai tiê mnuih bi êdah si knuih ñu jing.

²⁰Ƀuôn Phung Djiê leh anăn Ƀăng Êlam amâo tuôm thâo trei ôh, msĕ snăn mơh ală mnuih kăn tuôm thâo hrăp rei.

²¹Anôk bi lik pioh kơ prăk, kpur pui pioh kơ mah, ƀiădah arăng ksiêm sa čô mnuih tui si klei arăng bi mni kơ ñu.

²²Tơdah ih yua hlâo leh anăn tlê mnuih mluk hlăm êsŭng, bi lŭk hŏng braih, klei mluk ñu amâo srăng kbiă đuĕ mơ̆ng ñu ôh.

²³Brei ih thâo kral si biăp ih jing, brei ih răng kriê bi jăk êmô ih.

²⁴Kyuadah klei mdrŏng amâo dôk nanao ôh, kăn klei jing mtao srăng dôk hlŏng lar rei.

²⁵Rơ̆k krô đung đuĕ leh, rơ̆k mda bi êdah leh, leh anăn rơ̆k hlăm čư̆ arăng wiă ba,

²⁶êđai biăp srăng brei čhiăm ao kơ ih, leh anăn hŏng bê knô ih dưi blei hma.

²⁷Ih srăng mâo êa ksâo bê djăp kơ mnơ̆ng ih ƀơ̆ng huă, wăt kơ phung mnuih hlăm sang ih, leh anăn kơ phung dĭng buăl mniê ih.