Read Rade Klei Bi Hriêng 28 Bible Online

Klei Bi Hriêng 28 - Rade bible

Klei Bi Hriêng 28

¹Mnuih ƀai đuĕ wăt tơdah amâo mâo pô tiŏ ñu ôh, ƀiădah phung kpă dôk jhŏng msĕ si êmông gu.

²Hlăm čar mâo klei bi kdơ̆ng mâo lu phung khua kiă kriê mdê mdê, ƀiădah hŏng mnuih thâo mĭn leh anăn thâo săng čar srăng dôk kjăp sui.

³Sa čô ƀun ƀin ktư̆ juă phung ƀun ƀin jing msĕ si êa hjan ktang bi rai jih mnơ̆ng pla.

⁴Phung amâo gưt klei bhiăn ôh bi mni kơ phung ƀai, ƀiădah phung tui hlue klei bhiăn bi kdơ̆ng hŏng anăn.

⁵Phung ƀai amâo thâo săng ôh klei djŏ, ƀiădah phung duah Yêhôwa thâo săng jih.

⁶Mnuih ƀun ƀin êbat hlăm klei ênuah ênô jing jăk hĭn kơ pô mdrŏng êbat hlăm êlan soh.

⁷Hlei pô djă pioh klei bhiăn jing sa čô anak thâo mĭn, ƀiădah hlei pô bi mguôp hŏng phung pliă plia bi hêñ ama ñu.

⁸Hlei pô bi mđĭ klei mdrŏng ñu hŏng klei ƀơ̆ng mnga êgao hnơ̆ng, prăk anăn srăng lĕ kơ hlei pô pap kơ phung ƀun ƀin.

⁹Hlei pô kăt ƀăng knga ñu amâo čiăng hmư̆ klei bhiăn ôh, wăt klei ñu wah lač jing klei Yêhôwa bi êmut kheh.

¹⁰Hlei pô bi klah đuĕ mnuih kpă brei tui êlan soh srăng lĕ hlăm ƀăng ñu pô klei leh, ƀiădah phung amâo mâo soh ôh srăng dưn mnơ̆ng jăk.

¹¹Mnuih mdrŏng yap ñu pô jing mnuih thâo mĭn, ƀiădah mnuih ƀun ƀin mâo klei thâo săng srăng thâo sĭt si anăn jing.

¹²Tơdah phung kpă dưi, mâo klei hơ̆k mơak prŏng snăk, ƀiădah tơdah phung ƀai dưi jih jang mnuih đuĕ dăp.

¹³Hlei pô mdăp klei soh ñu amâo srăng mâo klei đĭ kyar ôh, ƀiădah hlei pô hưn leh anăn lui klei soh anăn srăng mâo klei pap.

¹⁴Jăk mơak yơh hlei pô huĭ mpŭ kơ Yêhôwa nanao, ƀiădah hlei pô bi khăng ai tiê ñu srăng mâo klei knap mñai.

¹⁵Sa čô mnuih ƀai kiă kriê phung ƀuôn sang ƀun ƀin jing msĕ si sa drei êmông gu dôk gruh amâodah sa drei kgâo dôk tiŏ.

¹⁶Sa čô khua kiă kriê jing pô ktư̆ juă kƀah klei thâo săng, ƀiădah hlei pô bi êmut kơ klei ƀơ̆ng đĭ hŏng klei soh srăng dôk hdĭp sui.

¹⁷Sa čô mnuih tuh êrah mnuih mkăn srăng đuĕ nanao tơl djiê; đăm brei arăng kơ̆ng ñu ôh.

¹⁸Hlei pô êbat hlăm klei ênuah ênô srăng mâo klei bi mtlaih, ƀiădah pô tui hlue êlan wê srăng lĕ bhiâo riâo rit.

¹⁹Hlei pô ngă hma srăng mâo djăp mnơ̆ng ƀơ̆ng huă, ƀiădah hlei pô tui tiŏ klei hơăi mang srăng jing ƀun ƀin.

²⁰Mnuih sĭt suôr srăng bŏ hŏng klei jăk jĭn, ƀiădah hlei pô ruăt čiăng jing mdrŏng amâo srăng tlaih kơ klei bi kmhal ôh.

²¹Amâo jăk ôh dlăng mnuih mdê mdê, ƀiădah wăt knŏng čiăng mâo sa klŏ kpŭng ăt arăng dưi ngă soh mơh.

²²Sa čô klih ruăt čiăng jing mdrŏng, ñu amâo thâo ôh klei kƀah srăng truh kơ ñu.

²³Hlei pô ƀuah arăng, êdei srăng mâo klei pap lu hĭn kơ pô blŭ klei myâo mă.

²⁴Hlei pô tlĕ dŏ amĭ ama ñu, leh anăn lač, “Klei anăn amâo soh ôh,” jing ƀĭng găp hŏng pô bi rai.

²⁵Hlei pô kčưn kơ dŏ dô arăng mčhur klei bi mneh msao, ƀiădah hlei pô knang kơ Yêhôwa srăng đĭ kyar.

²⁶Hlei pô knang kơ klei mĭn ñu pô jing mnuih mluk, ƀiădah hlei pô êbat hlăm klei thâo mĭn srăng mâo klei êđăp ênang.

²⁷Hlei pô brei kơ phung ƀun ƀin amâo srăng kƀah ôh, ƀiădah hlei pô amâo thâo pap kơ digơ̆ srăng mâo klei tăm pah lu.

²⁸Tơdah phung ƀai đĭ kiă kriê, jih jang mnuih đuĕ dăp, ƀiădah tơdah diñu djiê, phung kpă ênô jing lar.