Read Rade Klei Bi Hriêng 29 Bible Online

Klei Bi Hriêng 29 - Rade bible

Klei Bi Hriêng 29

¹Sa čô mnuih arăng ƀuah jêñ jêñ ƀiădah ăt ngă khăng kŏ, srăng rai tuč bhiâo riâo rit, amâo lŏ mâo êlan dưi mdrao ôh.

²Tơdah phung kpă đĭ kyar phung ƀuôn sang hơ̆k mơak, ƀiădah tơdah phung ƀai kiă kriê, phung ƀuôn sang ur krao.

³Hlei pô khăp kơ klei thâo mĭn bi mơak kơ ama ñu, ƀiădah pô dôk hŏng phung mniê knhông bi luč ngăn drăp ñu.

⁴Hŏng klei kpă sa čô mtao bi kjăp čar ñu, ƀiădah hlei pô mă tŭ ngăn sun bi rai čar.

⁵Sa čô mnuih blŭ myâo mă kơ pô riêng gah ñu dăng ñuăl kơ jơ̆ng ñu pô.

⁶Mnuih ƀai djŏ ñuăl klei soh ñu pô, ƀiădah mnuih kpă mmuñ leh anăn hơ̆k mơak.

⁷Mnuih kpă ênô duah klei djŏ kơ phung ƀun ƀin, ƀiădah mnuih ƀai amâo thâo săng klei anăn ôh.

⁸Phung kreh mưč ƀhur pui hlăm ƀuôn prŏng, ƀiădah phung thâo mĭn bi hlai klei ngêñ.

⁹Tơdah sa čô thâo mĭn mâo klei bi mgăl hŏng sa čô mnuih mluk, mnuih mluk knŏng ăl amâodah tlao, amâo mâo klei êđăp ênang ôh.

¹⁰Phung khăp tuh êrah bi êmut kơ mnuih amâo mâo soh ôh, ƀiădah phung kpă ênô srăng mgang klei hdĭp gơ̆.

¹¹Mnuih mluk bi êdah jih klei ñu ngêñ, ƀiădah mnuih thâo mĭn kơ̆ng klei ñu ăl.

¹²Tơdah khua kiă kriê mđing knga kơ klei blŭ luar, jih jang phung dĭng buăl ñu srăng jing ƀai.

¹³Mnuih ƀun ƀin leh anăn pô ktư̆ juă mâo sa klei mbĭt: Yêhôwa bi mngač ală jih dua diñu.

¹⁴Tơdah sa čô mtao phat kđi phung ƀun ƀin hŏng klei kpă, jhưng mtao ñu srăng dôk kjăp nanao.

¹⁵Giê hnuăt leh anăn klei ƀuah mkra brei klei thâo mĭn, ƀiădah anak ngă tui si ñu pô čiăng bi hêñ amĭ ñu.

¹⁶Tơdah phung ƀai đĭ kyar klei soh bi lar msĕ mơh, ƀiădah phung kpă ênô srăng ƀuh klei diñu lĕ.

¹⁷Mkra bĕ anak ih, leh anăn ñu srăng bi juh ih, ñu srăng bi mơak mngăt ih.

¹⁸Tơdah amâo mâo klei bi êdah ôh, phung ƀuôn sang êngiê ngă soh, ƀiădah jăk mơak yơh pô djă pioh klei bhiăn.

¹⁹Amâo djŏ knŏng hŏng klei blŭ ôh arăng dưi mkra sa čô dĭng buăl, kyuadah wăt tơdah ñu thâo săng dưn, ñu amâo srăng gưt ôh.

²⁰Ih ƀuh mơ̆ sa čô mnuih ruăt blŭ? Sa čô mluk mâo klei čang hmăng hĭn kơ pô anăn.

²¹Hlei phung ngă jăk đei kơ phung dĭng buăl diñu mơ̆ng hđeh, hruê êdei digơ̆ srăng mĭn digơ̆ pô jing anak sang anăn.

²²Mnuih krêñ mčhur klei bi mneh msao, leh anăn sa čô mnuih ngêñ ngă lu klei soh.

²³Klei mnuih mgao srăng mdlưh ñu pô, ƀiădah hlei pô thâo luă gŭ srăng mâo klei arăng mpŭ.

²⁴Hlei pô bi mguôp hŏng sa čô mnuih knĕ jing roh hŏng mngăt ñu pô, arăng srăng bi kmhal ñu tơdah ñu hưn klei sĭt hlăm sang phat kđi leh anăn Aê Diê srăng tăm pah ñu tơdah ñu amâo hưn ôh.

²⁵Klei huĭ kơ mnuih jing kđông ƀêč, ƀiădah hlei pô knang kơ Yêhôwa mâo klei hơĭt.

²⁶Lu mnuih tui duah klei pap mơ̆ng khua kiă kriê, ƀiădah mơ̆ng Yêhôwa yơh mnuih srăng mă tŭ klei djŏ.

²⁷Phung kpă bi êmut kheh kơ mnuih wê, ƀiădah phung wê bi êmut kheh kơ pô êbat hlăm êlan kpă.