Read Rade Klei Bi Hriêng 31 Bible Online

Klei Bi Hriêng 31 - Rade bible

Klei Bi Hriêng 31

¹Klei mtao Y-Lemuêl blŭ; klei bi hriêng amĭ ñu bi hriăm ñu.

²Ya kâo srăng lač kơ ih, Ơ anak êkei kâo? Ya kâo srăng lač kơ ih, Ơ anak êkei mơ̆ng tian prôč kâo pô? Ya kâo srăng lač kơ ih, Ơ anak êkei kâo, pô kâo wah lač akâo?

³Đăm bi luč ôh klei mơai ih hŏng phung mniê, amâodah ngă mbĭt hŏng phung bi rai hĕ phung mtao.

⁴Ơ Y-Lemuêl, amâo jăk ôh kơ phung mtao mnăm kpiê, kăn jăk rei kơ phung khua kiă kriê duah kpiê ktang,

⁵huĭdah êjai mnăm diñu wơr bĭt klei mtă, leh anăn bi msoh klei phat kđi kơ phung knap mñai.

⁶Brei kpiê ktang kơ phung dơ̆ng djiê leh, leh anăn kpiê kơ phung mâo klei ênguôt snăk.

⁷Brei diñu mnăm leh anăn wơr bĭt hĕ klei diñu ƀun ƀin, leh anăn amâo lŏ hdơr ôh kơ klei knap diñu.

⁸Ha ƀăng êgei ih blŭ brei kơ mnuih kmlô, čiăng ngă klei djŏ kơ phung amâo mâo pô đru ôh.

⁹Ha ƀăng êgei ih blŭ kđi hŏng klei kpă mgang klei djŏ kơ phung knap mñai leh anăn ƀun ƀin.

¹⁰Hlei dưi duah sa čô mniê năng mpŭ? Ñu jing yuôm hĭn kơ boh tâo mngač.

¹¹Ai tiê ung ñu knang kơ ñu, leh anăn gơ̆ amâo srăng kƀah boh mnga ôh.

¹²Ñu ngă jăk kơ gơ̆, amâo djŏ klei jhat ôh, jih jang hruê ñu dôk hdĭp.

¹³Ñu duah mrai mlâo biăp leh anăn mrai kbuă, leh anăn kriăng mă bruă hŏng kngan.

¹⁴Ñu jing msĕ si kŭmpăn phung mblei mnia, ba mnơ̆ng ƀơ̆ng huă ñu mơ̆ng kbưi.

¹⁵Ñu kgŭ pĭt êjai adiê ăt dôk mmăt, leh anăn brei mnơ̆ng ƀơ̆ng huă kơ phung hlăm sang ñu, leh anăn bi mbha mnơ̆ng ƀơ̆ng huă kơ phung dĭng buăl mniê ñu.

¹⁶Ñu dlăng kơ sa boh hma leh anăn blei hma anăn; hŏng boh mnga mơ̆ng bruă ñu ngă, ñu pla đang boh kriăk ƀâo.

¹⁷Ñu hyuă kơiêng leh anăn kriăng mă bruă, păl ñu ktang dưi ngă bruă.

¹⁸Ñu ƀuh mnơ̆ng ñu čhĭ mâo klei tŭ dưn, ñu amâo bi mdjiê ôh pui kđen ñu êjai mlam.

¹⁹Ñu êwei mrai, leh anăn mñam čhiăm.

²⁰Ñu brei mnơ̆ng pap kơ phung knap mñai, leh anăn ñu yơr brei mơh kơ phung ƀun ƀin.

²¹Ñu amâo huĭ ôh kơ pliêr ngă kơ phung hlăm sang ñu, kyuadah jih jang digơ̆ hơô leh čhiăm ao mlâo biăp.

²²Ñu ngă lu blah abăn, čhiăm ao ñu hơô ngă leh hŏng kbuă điêt aruăt leh anăn hŏng čhiăm hrah piơk.

²³Arăng thâo kral ung ñu ti ƀăng jang ƀuôn, tơdah gơ̆ dôk gŭ mbĭt hŏng phung khua mduôn hlăm čar.

²⁴Ñu mñam ao, čhĭ ao anăn, leh anăn ñu čhĭ hdrăng kơiêng kơ pô mnia.

²⁵Ñu mâo klei ktang leh anăn klei arăng mpŭ; leh anăn dưi tlao amâo huĭ ôh kơ klei truh hruê êdei.

²⁶Ñu ha ƀăng êgei ñu blŭ hŏng klei thâo mĭn, leh anăn ñu mtô hŏng klei êmhač.

²⁷Ñu răng kriê kơ phung hlăm sang ñu, leh anăn ñu amâo alah ôh.

²⁸Phung anak ñu kgŭ leh anăn hưn klei digơ̆ hdơr knga, wăt ung ñu msĕ mơh bi mni kơ ñu lač:

²⁹“Mâo lu phung mniê ngă jăk snăk năng mpŭ, ƀiădah ih êgao hĭn kơ jih jang diñu.”

³⁰Klei kƀăt jing klei mplư, leh anăn klei siam dưi luč; ƀiădah sa čô mniê thâo huĭ mpŭ kơ Yêhôwa srăng mâo klei bi mni.

³¹Brei kơ ñu klei mưn năng kơ bruă kngan ñu ngă, leh anăn brei bruă ñu bi mni kơ ñu ti ƀăng jang ti anăp phung ƀuôn sang.