Read Rade Khua Pô Mtô 1 Bible Online

Khua Pô Mtô 1 - Rade bible

Khua Pô Mtô 1

¹Klei khua pô mtô, anak êkei Y-Đawit, mtao ƀuôn Yêrusalem blŭ.

²“Klei hơăi mang hĭn kơ klei hơăi mang,” khua pô mtô lač, “Klei hơăi mang kơ klei hơăi mang! Jih jang mnơ̆ng jing hơăi mang sơăi.”

³Ya boh tŭ dưn mnuih mâo mơ̆ng jih klei suăi mơ̆ng bruă ñu mă ti gŭ yang hruê?

⁴Sa ênuk mnuih êgao tuč leh anăn sa ênuk mnuih mkăn truh, ƀiădah lăn ala ăt dôk nanao.

⁵Yang hruê ƀlĕ, yang hruê lĕ, leh anăn ruăt lŏ nao kơ anôk ñu ƀlĕ.

⁶Angĭn thut phă dhŭng, leh anăn dar phă dưr; angĭn dar nanao, wir mơ̆ng anôk ñu dơ̆ng lŏ wĭt kơ anôk ñu dơ̆ng mơh.

⁷Jih jang hnoh êa đoh kơ êa ksĭ, ƀiădah êa ksĭ amâo bŏ ôh; mơ̆ng anôk hnoh êa đoh leh, tinăn yơh ñu lŏ truh.

⁸Jih jang mnơ̆ng bŏ hŏng klei bi êmăn arăng; anak mnuih amâo dưi yăl dliê ôh; ală amâo thâo hrăp dlăng ôh, knga kăn thâo hrăp hmư̆ rei.

⁹Ya klei truh leh srăng lŏ truh, ya klei ngă leh, srăng lŏ ngă mơh; amâo mâo klei mrâo ôh ti gŭ yang hruê.

¹⁰Mâo mơ̆ sa klei arăng srăng lač, “Nĕ anei, jing klei mrâo!” Klei anăn truh leh, ñu truh leh ênuk êlâo kơ drei.

¹¹Arăng amâo lŏ hdơr ôh kơ phung ênuk hđăp, kăn arăng srăng hdơr rei kơ klei srăng truh ti krah phung ênuk êdei.

¹²Kâo gơ̆, Khua Pô Mtô jing leh mtao čar Israel ti ƀuôn Yêrusalem.

¹³Kâo pioh leh klei mĭn kâo čiăng ksiêm leh anăn duah hŏng klei thâo mĭn jih jang klei arăng ngă ti gŭ adiê; jing bruă amâo mơak ôh Aê Diê brei leh kơ phung anak mnuih ngă.

¹⁴Kâo ƀuh leh djăp mta klei arăng ngă leh ti gŭ yang hruê, nĕ anei, jih jang jing klei hơăi mang leh anăn klei tiŏ angĭn.

¹⁵Ya mnơ̆ng jing wê amâo dưi bi kpă ôh, leh anăn ya mnơ̆ng kƀah amâo dưi yap ôh.

¹⁶Kâo lač kơ kâo pô, “Kâo mă tŭ leh lu klei thâo mĭn, kdlưn hĭn kơ jih jang phung kiă kriê ƀuôn Yêrusalem êlâo kơ kâo; kâo mâo lu klei thâo mĭn leh anăn klei thâo săng kyua klei truh leh kơ kâo.”

¹⁷Kâo pioh leh klei mĭn kâo čiăng thâo kral klei thâo mĭn leh anăn čiăng thâo klei khŏ leh anăn klei mluk. Kâo ƀuh klei anăn msĕ mơh jing klei tiŏ angĭn.

¹⁸Kyuadah hŏng lu klei thâo mĭn mâo lu klei ênguôt, leh anăn hlei pô bi mđĭ klei thâo săng bi mđĭ klei bi ruă ai mơh.