Read Rade Khua Pô Mtô 10 Bible Online

Khua Pô Mtô 10 - Rade bible

Khua Pô Mtô 10

¹Ruê djiê leh brei êa ƀâo mngưi ƀâo brŭ; msĕ snăn mơh klei mluk ƀiă dưi bi luč klei thâo mĭn leh anăn klei mpŭ.

²Ai tiê sa čô mnuih thâo mĭn klĭng phă klei djŏ, ƀiădah ai tiê sa čô mluk klĭng phă klei čhuai.

³Wăt tơdah pô mluk êbat ti êlan, ñu kƀah klei mĭn leh anăn ñu bi êdah kơ grăp čô ñu jing pô mluk.

⁴Tơdah pô kiă kriê đĭ ai ngêñ kơ ih, đăm ih đuĕ ôh mơ̆ng anôk ih, kyuadah klei gưt kơ ñu srăng bi hlao klei soh prŏng.

⁵Mâo sa klei jhat kâo ƀuh leh ti gŭ yang hruê, klei sa čô khua kiă kriê ngă klei čhuai.

⁶Pô mluk dôk gŭ ti anôk dlông, leh anăn phung mdrŏng dôk ti gŭ.

⁷Kâo tuôm ƀuh leh phung hlŭn đĭ aseh, leh anăn phung khua êbat jơ̆ng msĕ si hlŭn.

⁸Hlei pô klei ƀăng srăng lĕ hlăm ƀăng anăn, leh anăn sa drei ala srăng kĕ pô ƀoh mtih.

⁹Hlei pô krah boh tâo srăng êka hŏng boh tâo, leh anăn pô blah kyâo mâo klei jŭ jhat mơ̆ng kyâo anăn.

¹⁰Tơdah mta jông băl leh, leh anăn arăng amâo asah ñu ôh, arăng srăng yua klei ktang lu hĭn; ƀiădah klei thâo mĭn đru arăng mâo klei dưi.

¹¹Tơdah ala kĕ êlâo arăng bi ƀlum ñu, pô bi ƀlum amâo jing yuôm ôh.

¹²Klei sa čô thâo mĭn blŭ bi truh klei arăng pap kơ ñu, ƀiădah êlah sa čô mnuih mluk bi rai ñu pô.

¹³Tal êlâo kơ klei ñu blŭ jing mluk, leh anăn klei knhal tuč kơ klei ñu blŭ jing klei khŏ.

¹⁴Sa čô mnuih mluk blŭ lu, amâo mâo sa čô mnuih ôh thâo ya srăng truh, leh anăn hlei pô dưi hưn kơ ñu klei srăng truh kơ ñu êdei?

¹⁵Bruă sa čô mluk bi êmăn ñu pô, ñu amâo thâo bĭt êlan nao kơ ƀuôn prŏng ôh.

¹⁶Knap mñai yơh kơ ih, Ơ čar, tơdah mtao ih jing sa čô hđeh, leh anăn phung khua ih mâo klei huă mnăm prŏng jih hruê!

¹⁷Mơak yơh kơ ih, Ơ čar, tơdah mtao ih jing anak phung arăng mpŭ, leh anăn phung khua ih mâo klei huă mnăm djŏ mông, čiăng mâo klei ktang, amâo djŏ ôh čiăng kơ kpiê ruă!

¹⁸Kyua klei alah čuôr sang dlưh, leh anăn kyua klei dôk mang sang ƀrôč.

¹⁹Arăng mkra mnơ̆ng ƀơ̆ng huă pioh kơ klei tlao, kpiê bi mơak klei hdĭp arăng, leh anăn prăk đru jih klei arăng čiăng.

²⁰Wăt hlăm klei mĭn ih, đăm tăm pah mtao ôh, kăn tăm pah rei kơ mnuih mdrŏng hlăm adŭ ih pĭt, kyuadah sa drei čĭm hlăm êwa srăng djă ba asăp ih, amâodah sa drei mnơ̆ng mâo siap srăng hưn klei anăn.