Read Rade Khua Pô Mtô 3 Bible Online

Khua Pô Mtô 3 - Rade bible

Khua Pô Mtô 3

¹Mâo hruê kơ jih jang mnơ̆ng leh anăn yan kơ jih bruă ti gŭ adiê:

²hlăk arăng kkiêng kơ ñu, leh anăn hlăk ñu djiê, hlăk pioh pla, leh anăn hlăk pioh buč ya mnơ̆ng pla leh,

³hlăk bi mdjiê, leh anăn hlăk bi hlao, hlăk ruh sang, leh anăn hlăk mdơ̆ng sang,

⁴hlăk hia, leh anăn hlăk tlao, hlăk kơŭ kyăm, leh anăn hlăk kdŏ,

⁵hlăk hwiê boh tâo, leh anăn hlăk bi kƀĭn boh tâo, hlăk kmiêk, leh anăn hlăk amâo kmiêk ôh,

⁶hlăk duah mnơ̆ng, leh anăn hlăk luč mnơ̆ng, hlăk pioh mnơ̆ng, leh anăn hlăk hwiê hĕ mnơ̆ng anăn,

⁷hlăk hiêk, leh anăn hlăk jhĭt, hlăk dôk kriêp, leh anăn hlăk blŭ,

⁸hlăk bi khăp, leh anăn hlăk bi êmut, hlăk bi blah, leh anăn hlăk mâo klei êđăp ênang.

⁹Ya boh tŭ dưn kơ pô mă bruă hŏng klei suăi ñu?

¹⁰Kâo ƀuh leh bruă ktrŏ Aê Diê jao leh kơ phung anak mnuih ngă.

¹¹Aê Diê mjing leh djăp mta mnơ̆ng siam tui si yan ñu; msĕ mơh Ñu brei kơ mnuih mĭn kơ ênuk hlŏng lar, ƀiădah ăt Ñu amâo brei mnuih dưi thâo săng ôh ya Aê Diê ngă leh mơ̆ng phŭn truh kơ knhal tuč.

¹²Kâo thâo amâo mâo klei jăk hĭn ôh kơ diñu, knŏng tơdah diñu jing hơ̆k leh anăn mơak êjai jih hruê diñu dôk hdĭp;

¹³msĕ mơh Aê Diê brei kơ grăp čô mnuih dưi huă ƀơ̆ng mnăm leh anăn mơak hŏng jih bruă suăi ñu.

¹⁴Kâo thâo ya bruă Aê Diê ngă dôk hlŏng lar; arăng amâo dưi thiăm, kăn dưi bi hrŏ rei. Aê Diê mjing leh klei msĕ snăn, čiăng kơ phung mnuih dưi huĭ mpŭ kơ Ñu.

¹⁵Klei jing ară anei hin tuôm jing leh êlâo, klei srăng truh tuôm truh leh êlâo, leh anăn Aê Diê lŏ brei jing ya mnơ̆ng êgao leh.

¹⁶Êbeh hĭn kơ klei anăn kâo ƀuh leh ti gŭ yang hruê: wăt mâo klei wê dôk hlăm anôk năng kơ klei kpă, leh anăn hlăm anôk kpă ênô, mâo wăt klei wê mơh.

¹⁷Kâo lač hlăm ai tiê kâo, Aê Diê srăng phat kđi pô kpă leh anăn pô wê, kyuadah Ñu bi kčah leh sa ênuk kơ jih jang klei, leh anăn kơ jih jang bruă.

¹⁸Kâo lač hlăm ai tiê kâo djŏ kơ klei hŏng phung anak mnuih, Aê Diê lông dlăng digơ̆ čiăng bi êdah kơ digơ̆ thâo digơ̆ jing knŏng msĕ si hlô mnơ̆ng.

¹⁹Kyuadah klei knhal tuč kơ phung anak mnuih leh anăn knhal tuč kơ hlô mnơ̆ng jing msĕ; msĕ si sa čô mnuih djiê, hlô mnơ̆ng djiê msĕ snăn mơh. Jih jang diñu mâo êwa msĕ, leh anăn mnuih amâo mâo klei jăk hĭn kơ hlô mnơ̆ng ôh, kyuadah jih jang jing klei hơăi mang.

²⁰Jih jang nao kơ sa bĭt anôk; jih jang kbiă leh mơ̆ng ƀruih lăn, leh anăn jih jang srăng lŏ wĭt kơ ƀruih lăn mơh.

²¹Hlei thâo thâodah mngăt mnuih đĭ phă dlông leh anăn mngăt hlô mnơ̆ng trŭn phă gŭ lăn ala?

²²Snăn kâo ƀuh leh amâo mâo klei jăk hĭn ôh knŏng tơdah sa čô mnuih srăng mơak hŏng bruă ñu, kyuadah klei anăn pioh kơ ñu. Hlei dưi brei ñu ƀuh ya klei srăng truh êdei kơ ñu?