Read Rade Klei Mmuñ Siam Hĭn 1 Bible Online

Klei Mmuñ Siam Hĭn 1 - Rade bible

Klei Mmuñ Siam Hĭn 1

¹Klei mmuñ siam hĭn kơ jih klei mmuñ, jing klei Y-Salômôn mmuñ.

²Ơ čiăng kơ ih čŭm kâo hŏng ƀăng kƀông ih! Kyuadah klei ih khăp jing jăk hĭn kơ kpiê,

³êa mñak ih ƀâo mngưi, anăn ih jing msĕ si êa ƀâo mngưi arăng trôč; kyuanăn yơh phung mniê êra hrông khăp kơ ih.

⁴Atăt ba kâo mbĭt hŏng ih, brei drei ruăt bĕ. Mtao atăt kâo leh kơ adŭ ñu pĭt. Hmei srăng mơak leh anăn hơ̆k kyua ih, hmei srăng bi mni kơ klei ih khăp lu hĭn kơ kpiê. Jing djŏ yơh arăng khăp kơ ih.

⁵Kâo jing jŭ dưn mơh, ƀiădah kâo kƀăt, Ơ phung anak mniê ƀuôn Yêrusalem, jŭ msĕ si sang čhiăm phung Kêdar, msĕ si sang čhiăm păng mtao Y-Salômôn.

⁶Đăm dlăng kơ kâo kyua klĭt kâo jŭ ôh, kyuadah mđiă bi jŭ leh kâo. Phung anak êkei amĭ kâo ăl kơ kâo, diñu brei kâo jing pô kiă đang boh kriăk ƀâo; ƀiădah đang boh kriăk ƀâo kâo pô, kâo amâo răng kriê ôh!

⁷Ơ pô kâo khăp, hưn bĕ kơ kâo, ti anôk ih kiă biăp ih, ti anôk ih brei biăp ih đih êjai yang hruê dơ̆ng? Kyuadah ya yuôm kâo jing msĕ si sa čô mniê guôm ƀô̆ dôk mbĭt hŏng phung biăp phung găp ih?

⁸Tơdah ih amâo thâo ôh, Ơ mniê siam hĭn kơ phung mniê mkăn, tui bĕ kru biăp, leh anăn čiêm bĕ phung êđai bê ih giăm sang čhiăm phung mgăt biăp.

⁹Ơ pô kâo khăp, kâo bi msĕ ih hŏng sa drei aseh ana đoh êdeh Pharaôn.

¹⁰Miêng ih jing siam hŏng buê ti knga, kkuê ih siam mơh hŏng băk boh tâo yuôm.

¹¹Hmei srăng mkra kơ ih buê mah, mƀlir asăr prăk mbĭt.

¹²Êjai mtao dôk đih ti jhưng ñu, êa mñak kâo hŭl mnâo ƀâo mngưi.

¹³Pô kâo khăp jing kơ kâo msĕ si sa anŭng mnơ̆ng ƀâo mngưi, dôk ti plah wah ksâo kâo.

¹⁴Pô kâo khăp jing kơ kâo msĕ si sa čăp mnga hêna ti phŭn boh kriăk ƀâo Êngêdi.

¹⁵Nĕ anei, ih jing siam, Ơ pô kâo khăp, nĕ anei, ih jing siam êdi yơh; ală ih jing msĕ si mgăm.

¹⁶Nĕ anei, ih jing siam, Ơ pô kâo khăp, ih kƀăt êdi. Jhưng pĭt drei jing rơ̆k mtah;

¹⁷êda sang drei ngă hŏng kyâo sêdar, leh anăn kkal jing kyâo hngô.