Read Rade Klei Mmuñ Siam Hĭn 2 Bible Online

Klei Mmuñ Siam Hĭn 2 - Rade bible

Klei Mmuñ Siam Hĭn 2

¹Kâo jing mnga rôs tlung Sarôn, sa mnga lili hlăm tlung.

²Msĕ si mnga lili ti krah adhan êruê, msĕ snăn mơh pô kâo khăp ti krah phung mniê êra.

³Msĕ si sa ƀĕ ana boh pom ti krah kmrơ̆ng, msĕ snăn mơh pô kâo khăp ti krah phung êkei hlăk ai. Hŏng klei mơak snăk kâo dôk gŭ ti êyui ñu, leh anăn boh ñu jing mmih tơdah kâo ƀơ̆ng.

⁴Ñu atăt kâo kơ sang mâo klei huă mnăm prŏng, leh anăn ñu yơr čhiăm gru klei khăp ti dlông kâo.

⁵Lŏ bi mơai kâo bĕ hŏng boh kriăk ƀâo, bi ktang kâo hŏng boh pom; kyuadah kâo hwăt leh kyua klei kâo khăp đei.

⁶Ơ čiăng kơ kngan điâo ñu jing dŏ boh kŏ kâo đal, leh anăn brei kngan hnuă ñu kmiêk kâo!

⁷Ơ phung anak mniê ƀuôn Yêrusalem, kâo mtă kơ diih, hŏng anăn ktŏng leh anăn hlô rang ana hlăm dliê, đăm mčhur amâodah bi êrâo klei khăp ôh êlâo djŏ mông.

⁸Hmư̆ bĕ asăp pô kâo khăp! Nĕ anei, ñu hriê, êjai kdăt ti dlông čư̆, leh anăn kdưt ti dlông kbuôn.

⁹Pô kâo khăp jing msĕ si sa drei ktŏng, amâodah sa drei hlô rang knô êdam. Nĕ anei, ñu dôk dơ̆ng ti tluôn mtih sang hmei, ñu iêp ti ƀăng bhă điêt leh anăn dlăng ti mrang ƀăng bhă.

¹⁰Pô kâo khăp blŭ leh anăn lač kơ kâo: “Kgŭ bĕ, Ơ pô kâo khăp, pô siam kâo, leh anăn nao bĕ drei,

¹¹kyuadah nĕ anei, yan puih êgao leh, leh anăn adiê hjan không leh.

¹²Mnga blang ti lăn ala, truh leh mông mmuñ, leh anăn arăng hmư̆ leh asăp ktrâo kŭt ku hlăm lăn čar drei.

¹³Ana boh hra mboh, leh anăn ana boh kriăk ƀâo bi mnga, leh anăn arăng ƀâo mnâo jăk diñu. Kgŭ bĕ, Ơ pô kâo khăp, pô siam kâo, leh anăn nao bĕ drei.”

¹⁴Ơ mgăm kâo, hlăm anôk ƀăng kđang boh tâo, leh anăn ti ping čư̆ dơ̆ng, brei kâo ƀuh ƀô̆ mta ih, brei kâo hmư̆ asăp ih, kyuadah asăp ih blŭ jing mơak mơưr, leh anăn ƀô̆ mta ih siam sĭn.

¹⁵Mă hĕ phung mja, phung êđai mja dôk bi rai đang boh kriăk ƀâo, kyuadah ana boh kriăk ƀâo drei dôk bi mnga.

¹⁶Pô kâo khăp jing dŏ kâo, leh anăn kâo jing dŏ ñu, ñu atăt phung biăp ñu ti krah mnga lili.

¹⁷Tơl mông aguah ưm bi êdah leh anăn êyui đuĕ jih, Ơ pô kâo khăp, lŏ hriê bĕ, msĕ si sa drei ktŏng, msĕ si sa drei hlô rang knô êdam ti dlông čư̆.