Read Rade Klei Mmuñ Siam Hĭn 5 Bible Online

Klei Mmuñ Siam Hĭn 5 - Rade bible

Klei Mmuñ Siam Hĭn 5

¹Ơ adei kâo, mô̆ kâo, kâo hriê kơ war djam kâo, kâo pĕ êa mir wăt mnơ̆ng ƀâo mngưi kâo, kâo ƀơ̆ng ksing hnuê wăt êa hnuê kâo, kâo mnăm kpiê kâo wăt êa ksâo êmô kâo. Phung găp Ơ phung mah jiăng hmei, ƀơ̆ng leh anăn mnăm bĕ; Ơ phung bi khăp, mnăm bĕ bi hrăp!

²Kâo pĭt leh, ƀiădah ai tiê kâo ăt dôk krŏng. Hmư̆ bĕ! Pô kâo khăp dôk khŏk. “Pŏk bĕ kơ kâo, Ơ adei kâo, pô kâo khăp, mgăm kâo, pô siam klă; kyuadah boh kŏ kâo msah hŏng êa nguôm, ƀŭk kâo msah hŏng êa nguôm êjai mlam.”

³Kâo toh hĕ leh čhiăm ao kâo, snăn si kâo dưi lŏ hơô lĕ? Kâo rao leh jơ̆ng kâo, snăn si kâo dưi lŏ bi čhŏ diñu lĕ?

⁴Pô kâo khăp djă leh ti kliăng ƀăng bhă, leh anăn ai tiê kâo kdjhưng mgei.

⁵Kâo kgŭ čiăng pŏk brei kơ pô kâo khăp, leh anăn êa mir rôč ti kngan kâo, bi msah kđiêng kâo, êjai dôk djă ti kliăng ƀăng bhă.

⁶Kâo pŏk leh kơ pô kâo khăp, ƀiădah pô kâo khăp wir đuĕ leh. Ai tiê kâo duah ñu êjai ñu blŭ. Kâo duah ñu, ƀiădah amâo ƀuh ñu ôh, kâo iêô ñu, ƀiădah ñu amâo hơŭt ôh.

⁷Phung gak bi tuôm hŏng kâo, êjai diñu hiu hlăm ƀuôn; diñu čăm kâo, bi êka kâo, phung gak ti mnư̆ mă mđuĕ ao jhung kâo.

⁸Kâo mtă kơ diih, Ơ phung anak mniê ƀuôn Yêrusalem, tơdah diih ƀuh pô kâo khăp, hưn brei kơ ñu kâo hwăt leh kyua klei kâo khăp đei.

⁹Si pô ih khăp jing kdlưn hĭn kơ pô arăng mkăn khăp, Ơ pô siam hĭn kơ phung mniê mkăn? Si pô ih khăp jing kdlưn hĭn kơ pô arăng mkăn khăp, tơl ih mtă kơ hmei msĕ snăn?

¹⁰Pô kâo khăp jing siam leh anăn kô̆ hrah, kdlưn hĭn ti krah phung pluh êbâo čô.

¹¹Boh kŏ ñu jing msĕ si mah yuôm hĭn, ƀŭk ñu kprêñ, jŭ msĕ si ak.

¹²Ală ñu msĕ si mgăm dôk giăm akŏ êa, rao leh hŏng êa ksâo êmô, ală ñu dôk djŏ anôk.

¹³Miêng ñu jing msĕ si đang mnơ̆ng ƀâo mngưi, bi đung mnâo ƀâo mngưi. Kƀông ñu jing msĕ si mnga lili, bi rôč êa mir.

¹⁴Păl ñu msĕ si klŏ mah hgăl, mƀlir hŏng boh tâo yuôm. Asei mlei ñu msĕ si mnơ̆ng arăng ngă hŏng mla, mƀlir hŏng boh tâo saphir.

¹⁵Jơ̆ng ñu msĕ si kmeh boh tâo marbrơ, arăng mdơ̆ng ti dlông tur mah. Arăng dlăng kơ ñu jing msĕ si čar Liƀan, jăk msĕ si kyâo sêdar.

¹⁶Klei ñu blŭ jing mơak hĭn hmư̆, leh anăn arăng khăp snăk kơ ñu. Anăn yơh jing pô kâo khăp leh anăn mah jiăng kâo, Ơ phung anak mniê ƀuôn Yêrusalem.