Read Rade Klei Mmuñ Siam Hĭn 7 Bible Online

Klei Mmuñ Siam Hĭn 7 - Rade bible

Klei Mmuñ Siam Hĭn 7

¹Ơ anak mniê mtao, guôp snăk dlăng kơ jơ̆ng ih čŭt klĭt juă! Pha ih wĭl msĕ si boh tâo yuôm, jing bruă sa čô pô krah bruă mbruă.

²Phŭn msăt ih jing msĕ si sa boh êlŭ điêt wĭl amâo tuôm kƀah ôh kpiê. Tian ih jing msĕ si sa kăm mdiê ƀlê, mnga lili kwang jŭm dar.

³Ksâo ih jing msĕ si dua drei êđai hlô rang, msĕ si êđai ktŏng mđai mdua.

⁴Kkuê ih jing msĕ si sang tum ngă hŏng mla. Ală ih jing msĕ si ƀlŭng êa ênao ti ƀuôn Hêsbôn, giăm ƀăng jang Bat-Rabim. Adŭng ih jing msĕ si sang tum čar Liƀan, dlăng phă ƀuôn Damas.

⁵Boh kŏ ih jing msĕ si čư̆ Karmel, leh anăn ƀŭk ih dlông dlăng msĕ si čhiăm hrah jŭ. Êjai mtao dlăng kơ ƀŭk siam ih, ai tiê ñu bha ih leh.

⁶Ih jing siam snăk leh anăn bi mơak kơ arăng, Ơ pô arăng khăp, Ơ mniê êra siam dlăng!

⁷Awan ih kdrăm msĕ si sa ƀĕ ana boh đung, leh anăn ksâo ih jing msĕ si kmrŭ boh ñu.

⁸Kâo lač kâo srăng đĭ ana boh đung anăn leh anăn djă kơ̆ng ti boh ñu. Ơ, čiăng snăk kơ ksâo ih jing msĕ si kmrŭ boh kriăk ƀâo, leh anăn mnâo êwa ih msĕ si mnâo boh pom,

⁹leh anăn klei ih čŭm jing msĕ si kpiê jăk hĭn, rôč ênưih pưih ti ƀăng kƀông phung dôk pĭt.

¹⁰Kâo jing dŏ pô kâo khăp, leh anăn ñu čiăng knŏng kơ kâo mơh.

¹¹Hriê bĕ, Ơ pô kâo khăp, brei drei nao kơ hma leh anăn đăm hlăm ƀuôn điêt;

¹²brei drei nao ưm kơ đang boh kriăk ƀâo, čiăng ƀuh thâodah phŭn boh kriăk ƀâo bi knăt leh, thâodah mnga boh kriăk ƀâo blang leh, leh anăn thâodah boh pomgranat dôk bi mnga. Tinăn kâo srăng jao kâo pô kơ ih kyua klei khăp.

¹³Boh mandragôr bi đung mnâo ƀâo mngưi, leh anăn ti dlông ƀăng bhă drei mâo jih jang boh jăk hĭn, boh mrâo wăt boh hđăp, boh anăn kâo pioh leh kơ ih, Ơ pô kâo khăp.