Read Rade Y-Êsai 16 Bible Online

Y-Êsai 16 - Rade bible

Y-Êsai 16

¹Mơĭt bĕ lu êđai biăp myơr kơ khua kiă kriê čar, mơ̆ng ƀuôn Sêla ti êlan găn kdrăn tač, kơ čư̆ Anak Mniê Siôn.

²Phung mniê Môap ti ênhă anôk dưi găn êa krông Arnôn jing msĕ si čĭm phiơr đuĕ, msĕ si êđai čĭm arăng prŭng đuĕ mơ̆ng hruh.

³Bi kčĕ brei, ngă klei kpă. Ti yang hruê dơ̆ng brei êyui ih jing msĕ si êjai mlam; mdăp hĕ phung arăng suôt, đăm lhiăr ôh kơ pô đuĕ.

⁴Brei phung Môap arăng suôt leh dôk mbĭt hŏng ih; brei ih jing anôk đuĕ dăp kơ diñu mơ̆ng pô bi rai. Pô ktư̆ juă srăng luč, klei bi rai srăng mdei; leh anăn pô ktư̆ juă srăng đuĕ mơ̆ng lăn čar.

⁵Arăng srăng mdơ̆ng sa boh jhưng mtao hŏng klei jăk, leh anăn sa čô srăng dôk gŭ ti jhưng anăn hŏng klei sĭt suôr, sa čô mơ̆ng sang čhiăm Y-Đawit, sa čô phat kđi duah klei djŏ, leh anăn djăl ngă klei kpă ênô.

⁶Hmei hmư̆ leh klei Môap mgao, klei ñu mgao snăk, klei ñu krưh, leh anăn klei ñu mưč, ƀiădah klei ñu mgao jing hơăi mang.

⁷Kyuanăn phung Môap čŏk hia, jih jang čŏk hia kơ čar Môap. Brei diih kơŭ kyăm knap êdi, kyua ƀêñ boh kriăk ƀâo ƀuôn Kir-Harêsat.

⁸Lăn hma ƀuôn Hêsbôn leh anăn phŭn boh kriăk ƀâo ƀuôn Sipma krô dliu. Phung khua phung găp djuê mnuih juă hĕ leh adhan siam hĭn ñu, adhan anăn truh leh kơ ƀuôn Jaser, bra truh kơ kdrăn tač. Kƀiêng ñu ksuă dlông, hlŏng truh ti hang êa ksĭ.

⁹Kyuanăn Kâo srăng hia kơ phŭn boh kriăk ƀâo ƀuôn Sipma msĕ si ƀuôn Jaser hia. Ơ buôn Hêsbôn leh anăn ƀuôn Êlêala, Kâo srăng bi msah ih hŏng êa ală, klei arăng ur hơ̆k kyua boh ksă ih leh anăn boh yan wiă ih dôk kriêp.

¹⁰Klei hơ̆k leh anăn klei mơak arăng bi luč hĕ leh mơ̆ng đang ana kyâo boh; arăng amâo mmuñ ôh hlăm đang boh kriăk ƀâo, kăn mâo klei ur hơ̆k rei. Amâo mâo ôh pô juă boh kriăk ƀâo hlăm thŭng, kyuadah Kâo bi tuč leh klei arăng ur hơ̆k.

¹¹Kyuanăn ai tiê Kâo krao msĕ si brô̆ kyua čar Môap, leh anăn kyua ƀuôn Kir-Hêres.

¹²Tơdah phung Môap nao kơ anôk dlông diñu, ñu knŏng bi êmăn ñu pô tơdah ñu mŭt hlăm anôk doh jăk ñu čiăng wah lač, ñu amâo srăng mâo klei tŭ dưn ôh.

¹³Anei yơh jing klei Yêhôwa blŭ leh djŏ kơ Môap.

¹⁴Ƀiădah ară anei Yêhôwa lač, “Hlăm tlâo thŭn msĕ si thŭn mnuih arăng mưn, klei guh kơang Môap leh anăn phung mnuih ñu jing lu srăng bliư̆ jing mnơ̆ng arăng bi êmut, leh anăn phung adôk srăng jing ƀiă snăk leh anăn awăt.”