Read Rade Y-Êsai 22 Bible Online

Y-Êsai 22 - Rade bible

Y-Êsai 22

¹Klei blŭ djŏ kơ tlung klei bi ƀuh: Ya klei truh bi rŭng diih tơl jih jang diih đĭ leh ti dlông čuôr găp?

²Ơ ƀuôn bŏ hŏng klei hao hao, bŏ hŏng ênai ur ngă klei hơ̆k mơak? Phung djiê ih arăng amâo bi mdjiê hŏng đao gưm ôh, kăn diñu djiê hlăm klei bi blah rei.

³Jih jang phung khua kiă kriê diih êran đuĕ mđrăm mbĭt; arăng mă čăp diñu amâo yua hna ôh. Arăng mă čăp leh jih jang hlăm phung ƀuôn sang diih arăng ƀuh, wăt tơdah diñu đuĕ leh kbưi.

⁴Kyuanăn kâo lač, “Đăm dlăng kơ kâo ôh, lui kâo hia ênguôt snăk. Đăm duah bi juh kâo ôh, kyua klei bi rai anak mniê phung ƀuôn sang kâo.”

⁵Kyuadah Khua Yang Yêhôwa kơ phung kahan bi truh hruê klei rŭng răng, klei ktư̆ juă, leh anăn klei mĭn lŭk lăk hlăm tlung klei bi ƀuh; klei bi klưh mnư̆ leh anăn klei ur truh kơ čư̆.

⁶Phung Êlam čiêng đĭng tiông mbĭt hŏng lu êdeh aseh leh anăn phung kahan đĭ aseh. Phung Kir djă khil.

⁷Jih jang tlung ih siam hĭn bŏ hŏng êdeh aseh, leh anăn phung kahan đĭ aseh dăp leh kơ klei bi blah ti ƀăng jang ƀuôn.

⁸Ñu mă hĕ leh mnơ̆ng mgang čar Yuđa. Hlăm hruê anăn diih knang kơ mnơ̆ng bi blah hlăm Sang Kmrơ̆ng.

⁹Diih ƀuh lu ƀăng hluh hlăm ƀuôn Y-Đawit; diih bi kƀĭn mbĭt êa mơ̆ng êa ênao ti gŭ.

¹⁰Diih yap sang hlăm ƀuôn Yêrusalem, leh anăn diih bi klưh hĕ phung sang anăn čiăng bi kjăp mnư̆.

¹¹Diih ngă sa êa ênao prŏng plah wah dua tal mnư̆ čiăng pioh êa mơ̆ng ênao hđăp, ƀiădah diih amâo knang ôh kơ Pô ngă klei anăn, kăn diih uêñ rei kơ Pô čuăn leh klei anăn mơ̆ng sui.

¹²Hlăm hruê anăn Khua Yang Yêhôwa kơ phung kahan iêô diih kơ klei hia, kơ klei kơŭ kyăm, kơ klei kuêh kŏ, leh anăn kơ klei hơô klŭng.

¹³Ƀiădah lĕ nĕ anei, mâo klei hơ̆k leh anăn klei mơak, arăng koh êmô leh anăn bi mdjiê biăp, arăng ƀơ̆ng kđeh čĭm leh anăn mnăm kpiê. “Brei drei ƀơ̆ng huă leh anăn mnăm, kyuadah mgi drei srăng djiê.”

¹⁴Yêhôwa kơ phung kahan bi êdah leh ñu pô blŭ kơ knga kâo, “Sĭt nik arăng amâo srăng pap brei kơ diih klei wê anei ôh tơl diih djiê,” Khua Yang Yêhôwa kơ phung kahan lač.

¹⁵Snei Khua Yang Yêhôwa kơ phung kahan lač, “Nao lač bĕ kơ pô kiă ngăn, Y-Sêpna, pô jing khua sang mtao:

¹⁶Ya ih dôk ngă tinei, leh anăn hlei jing găp djuê leh tơl ih ngă kơ ih pô sa boh msat tinei? Ih klei kơ ih pô sa boh msat ti anôk dlông, ih krah anôk dôk kơ ih pô hlăm boh tâo.

¹⁷Nĕ anei, Ơ mnuih ktang, Yêhôwa srăng hwiê ih ktang kơ anôk kbưi. Ñu srăng djă păn ih kjăp,

¹⁸Ñu srăng mdar ih pral leh anăn bhĭr ih msĕ si bhĭr boh čưng kơ sa bĭt anôk ƀai. Tinăn ih srăng djiê, tinăn jih êdeh aseh guh kơang ih srăng dôk, Ơ pô bi hêñ sang khua ih.

¹⁹Kâo srăng suôt ih mơ̆ng bruă ih; arăng srăng dlăm ih mơ̆ng anôk ih dôk.

²⁰Hlăm hruê anăn Kâo srăng iêô dĭng buăl Kâo, Y-Êliakim anak êkei Y-Hilkia.

²¹Kâo srăng bi hơô ñu hŏng ao ih, Kâo srăng hyuă ñu hŏng hdrăng kơiêng ih, leh anăn Kâo srăng jao klei ih kiă kriê hlăm kngan ñu. Ñu srăng jing sa čô ama kơ phung dôk hlăm ƀuôn Yêrusalem leh anăn kơ sang Yuđa.

²²Kâo srăng dưm kliăng sang Y-Đawit ti dlông mra ñu; ñu srăng pŏk leh anăn amâo mâo pô dưi kđăl ôh; ñu srăng kđăl leh anăn amâo mâo pô dưi pŏk ôh.

²³Kâo srăng pơ̆ng ñu msĕ si msei kđĭn hlăm anôk kjăp, leh anăn ñu srăng jing sa boh jhưng mtao guh kơang kơ sang ama ñu.

²⁴Arăng srăng yuôl kă ti ñu jih klei guh kơang sang ama ñu, phung čô čĕ wăt phung hlăm sang, jih jang čhiên mngan đơ điêt mơ̆ng hmăm hlao hlŏng kơ čeh điêt.

²⁵Hlăm hruê anăn, Yêhôwa kơ phung kahan lač, hnim pơ̆ng leh hlăm anôk kjăp srăng kbuč hĕ; arăng srăng bi joh ñu, leh anăn ñu lĕ ti gŭ, leh anăn mnơ̆ng ktrŏ ti ñu arăng srăng bi rai hĕ.” Kyua Yêhôwa lač leh klei anăn.