Read Rade Y-Êsai 40 Bible Online

Y-Êsai 40 - Rade bible

Y-Êsai 40

¹Aê Diê diih lač, “Bi juh bĕ, bi juh bĕ phung ƀuôn sang Kâo.

²Blŭ bĕ hŏng klei êdu kơ ƀuôn Yêrusalem leh anăn ur hưn kơ ñu klei ñu jing hlŭn ruê̆ leh, klei wê ñu pap brei leh, klei ñu mă tŭ leh mơ̆ng kngan Yêhôwa klei bi kmhal dua blư̆ lu hĭn kơ jih jang klei soh ñu.”

³Mâo asăp ur lač: Hlăm anôk dliê êhŏng, “Mkra bĕ êlan kơ Yêhôwa, ngă bi kpă sa bĭt êlan prŏng kơ Aê Diê drei hlăm kdrăn tač.

⁴Jih jang tlung srăng đĭ phă dlông, jih jang čư̆ leh anăn kbuôn srăng dlưh ti gŭ; anôk klĭng srăng dap, leh anăn anôk ƀlŭng hŭt srăng jing mtăp ƀhiăr.

⁵Klei guh kơang Yêhôwa srăng bi êdah, leh anăn jih jang mnuih mđrăm mbĭt srăng ƀuh klei guh kơang anăn, kyuadah ƀăng êgei Yêhôwa blŭ leh klei anăn.”

⁶Mâo asăp lač, “Ur bĕ!” Leh anăn kâo lač, “Ya klei kâo srăng ur?” “Jih jang mnuih jing msĕ si rơ̆k mda, leh anăn jih jang klei siam ñu jing msĕ si mnga hlăm hma.

⁷Rơ̆k krô, mnga dliu, tơdah êwa Yêhôwa thut ti dlông ñu. Sĭt nik mnuih jing knŏng msĕ si rơ̆k.

⁸Rơ̆k krô, mnga dliu, ƀiădah klei Aê Diê drei blŭ srăng dôk nanao hlŏng lar.”

⁹Đĭ bĕ ti čŏng čư̆ dlông, Ơ ƀuôn Siôn, ƀuôn hưn klei mrâo mrang jăk. Ur driâo bĕ hŏng klei ktang, Ơ Yêrusalem, ƀuôn hưn klei mrâo mrang jăk. Ur bĕ ih, đăm huĭ ôh; lač bĕ kơ jih jang ƀuôn čar Yuđa, “Nĕ anei, Aê Diê diih!”

¹⁰Nĕ anei, Khua Yang Yêhôwa hriê hŏng klei myang, leh anăn Ñu srăng kiă kriê hŏng păl Ñu. Nĕ anei, Ñu ba leh anăn srăng brei klei mưn.

¹¹Ñu srăng čiêm jih jang biăp Ñu msĕ si sa čô mgăt biăp; Ñu srăng kmiêk êđai biăp hlăm păl Ñu, pŭ digơ̆ ti đah da Ñu, leh anăn Ñu srăng atăt hŏng klei čung biăp ana bi mam êđai.

¹²Hlei pô mkă leh jih jang êa hlăm kngan ñu, mkă phung adiê hŏng plă kngan, mkăm ƀruih lăn hlăm sa hnơ̆ng mkă, tĭng leh boh ktrŏ čư̆ hŏng knuak leh anăn kbuôn hlăm knăng?

¹³Hlei pô gai Mngăt Myang Yêhôwa, amâodah jing pô kčĕ kơ Ñu, bi hriăm Ñu leh?

¹⁴Hŏng hlei pô Ñu trông čhai čiăng mâo klei thâo mngač, hlei mtô kơ Ñu êlan klei kpă? Hlei bi hriăm Ñu klei thâo mĭn, leh anăn ktrâo kơ Ñu êlan thâo săng?

¹⁵Nĕ anei, phung găp djuê mnuih jing msĕ si sa kdrah êa hlăm thŭng; arăng yap diñu msĕ si ƀruih lăn ti dlông knăng. Nĕ anei Ñu kdjŏng mă plao êa ksĭ msĕ si sa mnơ̆ng hdjul snăk.

¹⁶Čar Liƀan amâo djăp ôh djuh kơ pui ƀơ̆ng, leh anăn jih jang hlô mnơ̆ng ñu kăn djăp rei jing mnơ̆ng myơr čuh.

¹⁷Jih jang găp djuê mnuih jing msĕ si hơăi mang ti anăp Ñu, Ñu yap digơ̆ jing hơăi mang leh anăn êhŏng.

¹⁸Hŏng hlei pô ih čiăng bi msĕ Aê Diê, amâodah ya mnơ̆ng ih dưi bi mđơr hŏng Ñu?

¹⁹Bi rup yang, sa čô mnuih tuh ngă gơ̆ leh anăn pô tia mah luôm gơ̆ hŏng mah, leh anăn tuh ngă săng đai điêt aruăt hŏng prăk kơ gơ̆.

²⁰Pô ƀun ƀin êdi ruah sa ƀĕ kyâo amâo thâo brŭ ôh; ñu duah sa čô mnuih mbruă čiăng krah rup yang amâo thâo mgei ôh.

²¹Diih amâo tuôm thâo hĕ? Diih amâo tuôm hmư̆ hĕ? Arăng amâo tuôm hưn kơ diih hĕ klei anăn mơ̆ng mphŭn? Diih amâo tuôm thâo săng hĕ mơ̆ng ênuk mdơ̆ng tur lăn ala?

²²Ñu yơh dôk gŭ ti dlông kwang lăn ala, leh anăn phung dôk hlăm lăn ala jing msĕ si ktuôp. Ñu mblang phung adiê msĕ si sa blah čhiăm; Ñu mblang digơ̆ msĕ si sa blah sang čhiăm čiăng dôk.

²³Ñu yơh brei phung khua jing hơăi mang, leh anăn brei phung kiă kriê lăn ala amâo jing yuôm ôh.

²⁴Mrâo arăng pla, mrâo arăng rah, mrâo phŭn diñu mtrŭn agha hlăm lăn, Ñu ƀhur ti digơ̆ leh anăn digơ̆ dliu, leh anăn angĭn êbŭ kpuh mđung hĕ digơ̆ msĕ si adrăng.

²⁵Snăn Pô Doh Jăk lač, “Hŏng hlei pô diih srăng bi msĕ Kâo, čiăng jing mđơr hŏng Kâo?”

²⁶Kngưr ală diih phă dlông leh anăn dlăng bĕ: hlei pô hrih mnơ̆ng anăn? Ñu bi kbiă phung kahan anăn tui si dŭm mâo digơ̆; Ñu iêô jih jang digơ̆ hŏng anăn digơ̆. Hŏng klei myang Ñu prŏng leh anăn kyuadah Ñu jing ktang hlăm klei myang, amâo kƀah sa mta ôh.

²⁷Ơ Yakôp, si ngă ih lač, leh anăn Ơ Israel, si ngă ih blŭ, “Êlan kâo hgăm kơ Yêhôwa, leh anăn Aê Diê kâo amâo uêñ ôh kơ klei năng kơ kâo?”

²⁸Ih amâo thâo hĕ? Ih amâo hmư̆ hĕ? Yêhôwa jing Aê Diê dôk hlŏng lar, Pô Hrih leh knhal lăn ala. Ñu amâo hwăt ôh, kăn êmăn rei, arăng amâo dưi ksiêm ôh jih klei Ñu thâo săng.

²⁹Ñu brei klei mơai kơ pô hwăt leh, leh anăn Ñu mđĭ klei myang kơ hlei pô awăt.

³⁰Wăt phung hlăk ai srăng huăt leh anăn êmăn, leh anăn phung êkei êdam srăng lĕ buh;

³¹ƀiădah hlei phung čang guôn kơ Yêhôwa srăng lŏ bi mrâo klei ktang diñu, diñu srăng phiơr đĭ msĕ si tlang, diñu srăng êran leh anăn amâo êmăn ôh, diñu srăng êbat leh anăn amâo hwăt ôh.