Read Rade Y-Êsai 5 Bible Online

Y-Êsai 5 - Rade bible

Y-Êsai 5

¹Brei kâo mmuñ kơ pô kâo khăp sa klei mmuñ djŏ kơ đang boh kriăk ƀâo ñu. Pô kâo khăp mâo sa boh đang boh kriăk ƀâo ti kbuôn lăn jing snăk.

²Ñu klei lăn, mă hĕ boh tâo, leh anăn pla ana boh kriăk ƀâo jăk hĭn. Ñu mdơ̆ng sa boh sang tum ti krah gơ̆, leh anăn klei ƀăng djiêt boh. Ñu čang hmăng kơ gơ̆ srăng mâo boh jăk, ƀiădah mâo knŏng boh jhat.

³Snăn ară anei, Ơ phung dôk hlăm ƀuôn Yêrusalem leh anăn phung êkei čar Yuđa, phat kđi bĕ Kâo hŏng đang boh kriăk ƀâo Kâo.

⁴Ya klei yuôm ăt dôk kơ đang boh kriăk ƀâo Kâo, Kâo ka ngă brei kơ ñu ôh? Êjai Kâo čang hmăng kơ ñu srăng mâo boh jăk, si ñu mâo hĕ boh jhat lĕ?

⁵Snăn ară anei Kâo srăng hưn kơ diih klei Kâo srăng ngă kơ đang boh kriăk ƀâo Kâo: Kâo srăng buč hĕ mnư̆ ñu, leh anăn hlô dliê srăng ƀơ̆ng hĕ ñu jih. Kâo srăng bi klưh hĕ mnư̆ ñu, leh anăn arăng srăng juă hĕ ñu.

⁶Kâo srăng brei ñu rai, arăng amâo srăng lŏ mkra adhan ñu, amâo lŏ mbŭ phŭn ñu ôh; êruê hruĕ leh anăn êruê ana srăng čăt tinăn. Leh anăn Kâo srăng mtă kơ knam amâo lŏ brei êa hjan kơ ñu ôh.

⁷Đang boh kriăk ƀâo Yêhôwa kơ phung kahan jing sang Israel, leh anăn phung êkei Yuđa jing mnơ̆ng jăk Ñu pla. Ñu čang hmăng mâo klei kpă, ƀiădah nĕ anei, arăng tuh êrah leh; leh anăn Ñu čang hmăng kơ klei kpă ênô, biădah nĕ anei, mâo klei ur krao.

⁸Knap mñai yơh kơ phung mdơ̆ng sang giăm hŏng sang mkăn, leh anăn ngă hma giăm hŏng sa boh hma mkăn tơl amâo lŏ mâo anôk ôh, leh anăn arăng brei diih dôk hjăn ti krah čar.

⁹Yêhôwa kơ phung kahan kat asei leh kơ knga kâo: “Sĭt nik lu boh sang srăng jing ênguôl, sang prŏng leh anăn siam amâo lŏ mâo mnuih dôk ôh.

¹⁰Pluh hektar đang boh kriăk ƀâo srăng mâo sa ƀat êa kpiê, leh anăn sa ômer mjeh srăng mâo knŏng sa êpha boh dhan.”

¹¹Knap mñai yơh kơ phung mdih ưm čiăng tui duah kpiê, dôk mnăm tơl mlam tơl kpiê čuih diñu.

¹²Diñu mâo đĭng buôt, leh anăn brô̆, gông, leh anăn đĭng kliă, leh anăn kpiê hlăm klei diñu huă mnăm, ƀiădah diñu amâo uêñ kơ bruă Yêhôwa ôh, kăn ƀuh rei bruă kngan Gơ̆ ngă.

¹³Kyua kƀah klei thâo mĭn phung ƀuôn sang Kâo srăng nao jing mnă. Phung arăng mpŭ hlăm diñu djiê êwiêt, leh anăn phung lu diñu khuôt đŏk hŏng klei mhao.

¹⁴Kyuanăn Ƀuôn Phung Djiê kăp ƀơ̆ng diñu, leh anăn ha bi prŏng leh ƀăng êgei ñu êgao hnơ̆ng. Phung khua leh anăn phung ƀuôn sang ƀuôn Siôn trŭn nao tinăn, jih jang phung lu wăt phung mgao lĕ hlăm anăn.

¹⁵Phung ƀuôn sang điêt wăt prŏng srăng êdu ai, ală phung mgao arăng srăng mdlưh.

¹⁶Ƀiădah Yêhôwa kơ phung kahan mâo klei mdĭ kyua klei kpă, leh anăn Aê Diê Doh Jăk srăng bi êdah Ñu pô doh jăk hlăm klei kpă ênô.

¹⁷Hlăk anăn êđai biăp srăng ƀơ̆ng rơ̆k msĕ si ti kdrăn rơ̆k diñu pô, leh anăn phung tue srăng ƀơ̆ng ti krah anôk rai phung mdrŏng.

¹⁸Knap mñai yơh kơ phung ktŭng klei wê hŏng klei kuĭ klei luar leh anăn ktŭng klei soh hŏng klei bră đoh êdeh aseh,

¹⁹phung lač, “Brei Yêhôwa ruăt ngă, brei Ñu bi jêč bruă Ñu, čiăng kơ drei dưi ƀuh. Brei klei Pô Doh Jăk Israel čiăng srăng truh, čiăng kơ drei dưi thâo klei anăn.”

²⁰Knap mñai yơh kơ phung pia klei jhat jing jăk, leh anăn klei jăk jing jhat, phung yap klei mmăt hrô kơ klei mngač, leh anăn klei mngač hrô kơ klei mmăt, phung brei klei phĭ hrô kơ klei mmih, leh anăn klei mmih hrô kơ klei phĭ.

²¹Knap mñai yơh kơ phung yap mă diñu pô jing phung thâo mĭn, leh anăn yap mă diñu pô thâo săng.

²²Knap mñai yơh kơ phung kreh mnăm kpiê, leh anăn phung knhăk bi lŭk kpiê ktang,

²³phung yap kpă pô ƀai kyua ngăn sun, leh anăn hngah ngă klei djŏ kơ phung kpă.

²⁴Kyuanăn, msĕ si êlah pui ƀơ̆ng adrăng, leh anăn msĕ si êlah pui čuh rơ̆k krô, msĕ snăn mơh agha diñu srăng jing msĕ si mnơ̆ng brŭ rai, leh anăn mnga diñu srăng đung msĕ si ƀruih lăn; kyuadah diñu hngah leh klei bhiăn Yêhôwa kơ phung kahan, leh anăn bi êmut klei Pô Doh Jăk Israel blŭ.

²⁵Kyuanăn klei Yêhôwa ngêñ trơ̆ng hŏng phung ƀuôn sang Ñu; Ñu yơr leh kngan bi kdơ̆ng hŏng diñu leh anăn čăm diñu. Čư̆ ktư̆ mgei leh anăn asei mlei djiê diñu jing msĕ si djah ti krah êlan. Wăt jih klei anăn dưn, ăt klei Ñu ngêñ ka hlao ôh, kngan Ñu ăt dôk yơr ngă nanao.

²⁶Ñu srăng mđĭ čhiăm gru kơ phung găp djuê dôk kbưi, leh anăn Ñu hôč iêô digơ̆ mơ̆ng knhal lăn ala, leh anăn nĕ anei, digơ̆ hriê hŏng klei ruăt, pral snăk.

²⁷Amâo mâo sa čô diñu srăng êmăn, kăn mâo sa čô têč hnêč rei, amâo mâo pô srăng đih pĭt ôh. Hdrăng kơiêng diñu amâo srăng tlaih ôh, klei hdruôm jơ̆ng diñu kăn tloh rei.

²⁸Ƀrăm diñu knur, leh anăn jih jang hna diñu ƀêč leh. Kčuôp jơ̆ng aseh diñu jing msĕ si boh tâo pui, leh anăn pông êdeh diñu jing msĕ si angĭn đrŭng.

²⁹Klei diñu ur driâo jing msĕ si êmông gu ana gruh; diñu ur msĕ si êđai êmông gu. Diñu gruh leh anăn mă hlô diñu, diñu djă ba mnơ̆ng diñu mă leh, amâo mâo pô dưi bi mtlaih ôh.

³⁰Hlăm hruê anăn diñu srăng gruh kyua digơ̆, msĕ si ênai êa ksĭ. Tơdah arăng dlăng kơ lăn čar, nĕ anei, klei mmăt leh anăn klei rŭng răng, leh anăn knam guôm hĕ klei mngač ñu.