Read Rade Y-Êsai 50 Bible Online

Y-Êsai 50 - Rade bible

Y-Êsai 50

¹Snei Yêhôwa lač: “Ti hră klei bi lui ung mô̆ amĭ diih, hŏng hră anăn Kâo lui ñu leh? Amâodah kơ hlei pô hlăm phung Kâo đuôm nư Kâo čhĭ diih leh? Nĕ anei, kyua klei wê ih yơh arăng čhĭ leh diih, leh anăn kyua klei diih gao klei bhiăn arăng lui leh amĭ diih.

²Si ngă tơdah Kâo hriê, amâo mâo mnuih ôh? Tơdah Kâo iêô, amâo mâo mnuih lŏ wĭt lač ôh hĕ? Kngan Kâo jing đŭt đei mơ̆ tơl ñu amâo dưi bi tui? Amâodah Kâo amâo mâo klei myang dưi bi mtlaih mơ̆? Nĕ anei, hŏng klei Kâo ƀuah Kâo bi khuôt êa ksĭ, Kâo brei lu êa krông jing kdrăn tač; kan diñu ƀâo brŭ kyua amâo mâo êa ôh, leh anăn djiê kyua mhao êa.

³Kâo bi hơô phung adiê hŏng klei mmăt jŭ, leh anăn brei klŭng jing mnơ̆ng guôm diñu.”

⁴Khua Yang Yêhôwa brei leh kơ kâo êlah phung hriăm leh, čiăng kơ hŏng klei kâo blŭ kâo dưi krơ̆ng pô êmăn. Grăp aguah Ñu pŏk knga kâo čiăng kơ kâo dôk hmư̆ msĕ si pô hriăm.

⁵Khua Yang Yêhôwa pŏk leh ƀăng knga kâo, kâo amâo bi kdơ̆ng ôh, kâo amâo wir phă tluôn ôh.

⁶Kâo jao leh rŏng kâo kơ phung čăm, leh anăn miêng kâo kơ phung buč mlâo kang kâo; kâo amâo tuôm mdăp ƀô̆ kâo ôh kơ klei arăng bi hêñ leh anăn kčuh êa bah.

⁷Kyuadah Khua Yang Yêhôwa đru kâo, kâo amâo mâo klei hêñ ôh; kyuanăn hŏng jih ai tiê kâo čuăn dôk kjăp msĕ si boh tâo, leh anăn kâo thâo arăng amâo srăng bi hêñ kâo ôh.

⁸Pô yap kâo kpă dôk giăm. Hlei pô srăng bi kdơ̆ng hŏng kâo? Brei drei kgŭ dơ̆ng mđrăm mbĭt. Hlei jing pô kčŭt kơ kâo? Brei ñu hriê giăm kâo.

⁹Nĕ anei, Khua Yang Yêhôwa đru kâo; hlei pô srăng hưn kâo jing soh? Nĕ anei, jih jang diñu srăng tĭ sô msĕ si čhiăm ao; muôr srăng ƀơ̆ng diñu.

¹⁰Hlei pô hlăm phung diih huĭ mpŭ kơ Yêhôwa, leh anăn gưt asăp kơ dĭng buăl Ñu, pô êbat hlăm klei mmăt leh anăn amâo mâo klei mngač ôh? Brei ñu knang kơ anăn Yêhôwa, băng kơ Aê Diê ñu.

¹¹Nĕ anei, jih jang phung diih răm pui, čuh pui arôk, êbat bĕ hlăm klei mngač pui leh anăn pui arôk diih čuh leh! Mơ̆ng kngan kâo yơh diih srăng mâo klei anei: diih srăng đih hŏng klei knap mñai.