Read Rade Y-Êsai 62 Bible Online

Y-Êsai 62 - Rade bible

Y-Êsai 62

¹Kyua ƀuôn Siôn kâo amâo srăng dôk ñăt ôh, kyua ƀuôn Yêrusalem kâo amâo srăng mdei ôh, tơl klei kpă ênô ñu mtrang msĕ si klei mngač, leh anăn klei bi mtlaih ñu msĕ si pui arôk dôk trơ̆ng.

²Phung găp djuê mnuih srăng ƀuh klei kpă ênô ih, leh anăn jih jang phung mtao srăng ƀuh klei guh kơang ih; leh anăn arăng srăng pia ih hŏng anăn mrâo, Yêhôwa pô srăng brei.

³Ih srăng jing sa boh đuôn klei siam hlăm kngan Yêhôwa, leh anăn đuôn mtao hlăm kngan Aê Diê ih.

⁴Arăng amâo srăng lŏ pia ôh ih Pô Arăng Lui, leh anăn arăng amâo srăng lŏ pia ôh čar ih Ênguôl; ƀiădah arăng srăng pia ih Kâo Mơak Hŏng Ñu, leh anăn arăng srăng pia lăn ih Bi Kuôl Leh; kyuadah Yêhôwa srăng mâo klei mơak hŏng ih, leh anăn lăn ih srăng mâo klei bi kuôl.

⁵Kyuadah msĕ si sa čô êkei hlăk ai dôk mô̆ sa čô mniê êra hrông, msĕ snăn mơh phung anak êkei ih srăng dôk ih; leh anăn msĕ si êkei dôk mô̆ hơ̆k mơak kyua mniê ñu dôk, msĕ snăn mơh Aê Diê ih srăng hơ̆k mơak kyua ih.

⁶Ơ ƀuôn Yêrusalem, Kâo dưm leh phung gak ti dlông mnư̆ ih, hruê mlam diñu amâo srăng dôk ñăt ôh. Ơ diih phung brei Yêhôwa hdơr, đăm dôk mdei ôh,

⁷leh anăn đăm brei Yêhôwa mdei ôh, tơl Ñu bi kjăp ƀuôn Yêrusalem, leh anăn mjing gơ̆ ƀuôn arăng bi mni hlăm lăn ala.

⁸Yêhôwa kat asei leh hŏng kngan hnuă Ñu leh anăn hŏng păl myang Ñu: “Kâo amâo srăng lŏ brei ôh mdiê ih jing mnơ̆ng ƀơ̆ng huă kơ phung roh ih, leh anăn phung tue amâo srăng lŏ mnăm ôh kpiê mrâo ih, boh mơ̆ng bruă ih.

⁹Ƀiădah phung mkăm pioh leh mdiê srăng huă gơ̆, leh anăn bi mni kơ Yêhôwa, leh anăn phung pĕ leh boh kriăk ƀâo srăng mnăm êa gơ̆ hlăm wăl sang adŭ doh jăk Kâo.”

¹⁰Găn bĕ, găn bĕ ƀăng jang! Mkra bĕ êlan kơ phung ƀuôn sang. Bi dap bĕ, bi dap bĕ êlan prŏng, mă mđuĕ hĕ boh tâo. Mđĭ bĕ čhiăm gru kơ phung găp djuê mnuih.

¹¹Nĕ anei, Yêhôwa hưn leh truh ti knhal lăn ala: “Lač bĕ kơ anak mniê ƀuôn Siôn, ‘Nĕ anei, Pô Bi Mtlaih ih hriê! Nĕ anei, Ñu djă ba klei mưn, leh anăn mnơ̆ng brei kơ arăng.’ ”

¹²Arăng srăng pia diñu Phung Ƀuôn Sang Doh Jăk, Phung Yêhôwa Bi Tui Leh; leh anăn arăng srăng pia ih Pô Arăng Duah, Ƀuôn Amâo Lŏ Dôk Ênguôl Ôh.