Read Rade Klei Čŏk Hia 2 Bible Online

Klei Čŏk Hia 2 - Rade bible

Klei Čŏk Hia 2

¹Hƀơih, Yêhôwa guôm anak mniê ƀuôn Siôn hŏng biut knam klei Ñu ngêñ! Ñu dlăm leh klei guh kơang Israel mơ̆ng adiê truh ti lăn ala; Ñu amâo lŏ hdơr ôh kơ anôk Ñu trông jơ̆ng hlăm hruê klei Ñu ngêñ.

²Yêhôwa bi rai leh amâo mâo klei pap ôh jih jang anôk dôk phung Yakôp; hlăm klei Ñu ngêñ Ñu bi klưh leh kđông kjăp anak mniê Yuđa, Ñu dlăm ti lăn leh anăn bi hêñ ƀuôn ala mtao mbĭt hŏng phung khua kiă kriê gơ̆.

³Ñu bi êbuh leh hŏng klei ngêñ hlơr jih jang klei ktang Israel; Ñu lŏ hrui leh mơ̆ng digơ̆ kngan hnuă Ñu ti anăp phung roh; Ñu bi rai leh čar Yakôp msĕ si pui trơ̆ng ƀơ̆ng jih jang mnơ̆ng jŭm dar.

⁴Ñu ƀêč leh hna Ñu msĕ si sa čô roh, hŏng kngan hnuă Ñu, Ñu ngă msĕ si roh; Ñu bi mdjiê leh jih jang mnơ̆ng ală hmei ƀuh siam, hlăm sang čhiăm anak mniê ƀuôn Siôn, Ñu tuh leh klei Ñu ngêñ msĕ si pui.

⁵Yêhôwa jing leh msĕ si sa čô roh, Ñu bi rai leh Israel; Ñu bi rai leh jih jang sang mtao gơ̆, brei kđông kjăp gơ̆ jing kăm mnơ̆ng rai; Ñu bi lar leh kơ anak mniê Yuđa klei kơŭ kyăm leh anăn klei čŏk hia.

⁶Ñu bi klưh leh sang yang Ñu msĕ si pưk hlăm war djam, Ñu bi rai leh anôk Ñu pioh kơ klei bi kƀĭn; Yêhôwa brei leh ƀuôn Siôn wơr bĭt klei huă mnăm leh anăn hruê sabat bi kčah leh, hŏng klei Ñu ngêñ ktang Ñu hngah leh mtao leh anăn khua ngă yang.

⁷Yêhôwa hngah leh kơ knưl ngă yang Ñu, leh anăn lui leh adŭ doh jăk Ñu; Ñu jao leh mnư̆ sang mtao ƀuôn Siôn kơ kngan phung roh, phung anăn bi ênai hao hao hlăm sang Yêhôwa msĕ si hlăm hruê knăm.

⁸Yêhôwa čuăn leh bi rai mnư̆ anak mniê ƀuôn Siôn; Ñu dăng leh klei mkă gơ̆, Ñu amâo kơ̆ng ôh kngan Ñu kơ klei bi rai gơ̆, Ñu brei mnư̆ mgang leh anăn mnư̆ ƀuôn čŏk hia, ênguôt hnĭng mđrăm mbĭt.

⁹Ƀăng jang gơ̆ klŭn leh hlăm lăn; Ñu bi joh leh anăn bi rai leh giê kal gơ̆, mtao leh anăn phung khua gơ̆ arăng mă ba leh ti krah phung găp djuê mnuih; amâo lŏ mâo klei bhiăn ôh, phung khua pô hưn êlâo gơ̆ amâo lŏ mâo klei bi ƀuh mơ̆ng Yêhôwa ôh.

¹⁰Phung khua mduôn anak mniê ƀuôn Siôn dôk gŭ ti lăn ñăt kriêp, digơ̆ ƀui ƀruih lăn ti boh kŏ leh anăn hơô klŭng; phung mniê êra hrông ƀuôn Yêrusalem kkui kŏ truh ti lăn.

¹¹Ală kâo dliu leh hŏng klei hia, mngăt kâo mâo klei rŭng răng êdi; ai tiê kâo tuh leh ti lăn kyuadah klei bi rai phung ƀuôn sang kâo, kyuadah phung hđeh ĭ leh anăn phung hđeh điêt djiê hwăt hlăm êlan ƀuôn.

¹²Digơ̆ lač kơ amĭ digơ̆, “Ti kpŭng leh anăn kpiê?” êjai digơ̆ hwăt msĕ si phung êkei êka leh hlăm êlan ƀuôn prŏng, êjai digơ̆ tuč ai ti đah da amĭ digơ̆.

¹³Ya kâo dưi lač kơ ih? Hŏng kâo dưi bi msĕ ih, Ơ anak mniê ƀuôn Yêrusalem? Hŏng kâo dưi bi msĕ ih, tơl kâo dưi bi juh ih, Ơ anak mniê êra hrông ƀuôn Siôn? Kyuadah klei bi rai ih jing prŏng msĕ si êa ksĭ, hlei pô dưi bi hlao ih?

¹⁴Phung khua pô hưn êlâo ih ƀuh leh klei bi ƀuh luar leh anăn mplư; diñu amâo tuôm bi êdah klei wê ih ôh, čiăng kơ ih amâo đuĕ jing mnă ôh, ƀiădah bi ƀuh leh kơ ih klei bi êdah luar leh anăn mplư.

¹⁵Jih jang phung găn ktuê êlan pah kngan kyua ih, diñu mƀhơi leh anăn kteh kŏ kyua anak mniê ƀuôn Yêrusalem; “Djŏ mơ̆ anei jing ƀuôn arăng pia klei siam klă, klei hơ̆k mơak kơ jih lăn ala?”

¹⁶Jih jang phung roh ih ƀuah ih, diñu mƀhơi, diñu kriêt êgei, diñu ur: “Drei bi rai ñu leh! Ơ, hruê anei drei čang guôn leh, ară anei truh leh sĭt, drei ƀuh klei anei!”

¹⁷Yêhôwa bi sĭt leh klei Ñu čuăn ngă, bi truh leh klei Ñu arưp aram, tui si Ñu mtă leh mơ̆ng sui; Ñu mdlưh ih leh amâo mâo klei pap ôh, Ñu brei leh phung roh hơ̆k mơak kyua ih, leh anăn bi mđĭ klei ktang phung roh ih.

¹⁸Ai tiê phung ƀuôn sang ur kraih kơ Yêhôwa! Ơ mnư̆ anak mniê ƀuôn Siôn, brei êa ală rôč đoh msĕ si êa hnoh êjai hruê leh anăn mlam! Đăm ih dôk mdei ôh, đăm brei ală ih pĭt ôh!

¹⁹Kgŭ ur hia bĕ êjai mlam, tơdah arăng dơ̆ng gak mlam! Tuh ai tiê ih msĕ si êa ti anăp Yêhôwa! Yơr kngan ih phă Ñu čiăng akâo klei hdĭp kơ phung anak ih, digơ̆ djiê hwăt kyua êpa ti akŏ grăp êlan dơ̆ng.

²⁰“Dlăng bĕ, Ơ Yêhôwa, leh anăn ksiêm! Kơ hlei pô Ih tuôm ngă snei? Djŏ mơ̆ phung mniê ƀơ̆ng anak diñu pô, phung anak diñu khăp hơiêng? Djŏ mơ̆ arăng bi mdjiê khua ngă yang leh anăn khua pô hưn êlâo hlăm adŭ doh jăk Yêhôwa?

²¹Phung hlăk ai leh anăn phung mduôn dôk đih mđrăm mbĭt hlăm ƀruih ti êlan dơ̆ng; phung mniê êra leh anăn phung êkei êdam kâo êbuh djiê leh hŏng đao gưm. Hlăm hruê Ih ngêñ Ih bi mdjiê diñu leh, bi mdjiê amâo mâo klei pap ôh.

²²Ih bi truh klei bi huĭ jŭm gah găn kâo, msĕ si Ih jak mnuih kơ klei knăm; ti hruê Yêhôwa ngêñ amâo mâo pô tlaih kăn mâo pô hdĭp rei; phung kâo pŭ ti pha leh anăn čiêm rông, phung roh bi mdjiê leh.”