Read Rade Klei Čŏk Hia 5 Bible Online

Klei Čŏk Hia 5 - Rade bible

Klei Čŏk Hia 5

¹Ơ Yêhôwa, hdơr bĕ kơ klei truh kơ hmei; dlăng leh anăn ƀuh klei hêñ hmei!

²Ngăn dưn hmei bha leh phung tue, phung tue plah mă leh sang hmei.

³Hmei jing leh anak êrĭt, amâo mâo ama ôh; amĭ hmei jing mniê djiê ung.

⁴Hmei blei êa čiăng mnăm, hmei blei wăt djuh mơh.

⁵Phung tiŏ hmei hmao leh hmei! Hmei êmăn, amâo mâo mdei ôh.

⁶Hmei mŭt leh phung Êjip leh anăn phung Asiri, čiăng bi mâo djăp mnơ̆ng ƀơ̆ng huă.

⁷Phung aê hmei ngă soh leh, diñu djiê leh, leh anăn hmei gui klei wê diñu.

⁸Phung hlŭn jing khua kơ hmei; amâo mâo pô bi mtlaih hmei mơ̆ng kngan diñu ôh.

⁹Hmei săn asei mlei čiăng bi mâo mnơ̆ng ƀơ̆ng huă, kyua arăng kăp bi mdjiê hmei hŏng đao gưm hlăm kdrăn tač.

¹⁰Klĭt hmei hlơr msĕ si kpur kyua ư̆ êpa tơl êngoh.

¹¹Arăng gô̆ phung mniê hlăm ƀuôn Siôn, wăt phung mniê êra hrông hlăm ƀuôn čar Yuđa.

¹²Arăng kă yuôl phung khua ti kngan digơ̆, arăng amâo mpŭ ôh kơ phung mduôn.

¹³Arăng mgô̆ phung êkei hlăk ai kwă êsŭng; leh anăn phung êkei êdam êbat ting ring rang kyua klam djuh ktrŏ đei.

¹⁴Phung êkei mduôn đuĕ amâo lŏ nao kơ ƀăng jang ƀuôn ôh, phung êkei êdam amâo lŏ mmuñ ôh.

¹⁵Klei mơak hlăm ai tiê hmei đuĕ leh, klei hmei kdŏ jing hĕ leh klei kơŭ kyăm.

¹⁶Đuôn mtao lĕ leh mơ̆ng boh kŏ hmei; knap mñai yơh kơ hmei, kyuadah hmei ngă soh leh!

¹⁷Kyua klei anei ai tiê hmei djiê hwăt, kyua klei anei ală hmei dliu leh,

¹⁸kyua čư̆ Siôn jing ênguôl leh, phung asâo tan êrô hiu tinăn.

¹⁹Ƀiădah Ih, Ơ Yêhôwa, kiă kriê nanao hlŏng lar; jhưng mtao Ih ăt dôk nanao hlăm jih jang ênuk.

²⁰Si ngă Ih wơr bĭt hĕ hmei nanao? Si ngă Ih hngah kơ hmei sui leh?

²¹Lŏ bi wĭt hmei bĕ, Ơ Yêhôwa, čiăng kơ hmei dưi lŏ wĭt; lŏ bi mrâo bĕ hruê hmei msĕ si mphŭn dô!

²²Amâodah Ih tuôm hngah kơ hmei hlŏng lar mơ̆? Ih ăl kơ hmei êgao hnơ̆ng mơ̆?