Read Rade Y-Êsêkiêl 15 Bible Online

Y-Êsêkiêl 15 - Rade bible

Y-Êsêkiêl 15

¹Yêhôwa blŭ kơ kâo:

²“Ơ anak mnuih, si ngă ana boh kriăk ƀâo jing yuôm hĭn kơ ana kyâo mkăn mơ̆, leh anăn adhan ñu jing yuôm hĭn kơ adhan kyâo mkăn hlăm kmrơ̆ng mơ̆?

³Dưi mơ̆ mă hruĕ ñu mjing sa mnơ̆ng? Phung mnuih tuôm mă dŏ pơ̆ng mơ̆ mơ̆ng ñu čiăng yuôl sa mnơ̆ng ti ñu?

⁴Nĕ anei, arăng yua ñu kơ djuh; tơdah pui ƀơ̆ng mơ̆ng dua êdŭk leh anăn ti krah jing hdăng, ñu jing yuôm kơ sa mnơ̆ng mơ̆?

⁵Nĕ anei, tơdah pui ka ƀơ̆ng ñu arăng amâo yua ñu kơ sa mnơ̆ng ôh, ƀiă hĭn kơ anăn tơdah pui ƀơ̆ng ñu leh, leh anăn jing hdăng, arăng amâo dưi yua ñu kơ sa mnơ̆ng mkăn!

⁶Kyuanăn Yêhôwa Aê Diê lač snei: Msĕ si ana boh kriăk ƀâo mbĭt hŏng kyâo hlăm kmrơ̆ng, Kâo dlăm leh hlăm pui, msĕ snăn mơh Kâo srăng ngă kơ phung dôk hlăm ƀuôn Yêrusalem.

⁷Kâo srăng bi kdơ̆ng hŏng diñu; wăt tơdah diñu tlaih mơ̆ng pui dưn, ăt pui srăng ƀơ̆ng diñu mơh; leh anăn diih srăng thâo kơ Kâo jing Yêhôwa, tơdah Kâo bi kdơ̆ng hŏng diñu.

⁸Kâo srăng brei čar jing ênguôl kyuadah diñu amâo jing sĭt suôr ôh, Yêhôwa Aê Diê lač.”