Read Rade Y-Êsêkiêl 18 Bible Online

Y-Êsêkiêl 18 - Rade bible

Y-Êsêkiêl 18

¹Yêhôwa lŏ blŭ kơ kâo:

²“Ya diih mĭn êjai răk klei bi hriêng anei djŏ kơ čar Israel: ‘Phung ama ƀơ̆ng leh boh kriăk ƀâo msăm, leh anăn êgei phung anak tĭng leh’?

³‘Tui si Kâo dôk hdĭp,’ Yêhôwa Aê Diê lač, ‘diih amâo srăng lŏ yua ôh klei bi hriêng anei hlăm čar Israel.’

⁴Nĕ anei, jih jang mngăt jing dŏ Kâo; mngăt ama wăt mngăt anak êkei jing dŏ Kâo. Hlei mngăt ngă soh mngăt anăn srăng djiê.

⁵Tơdah sa čô mnuih jing kpă ênô ngă tui si klei bhiăn leh anăn klei djŏ:

⁶ñu amâo ƀơ̆ng ôh mnơ̆ng ti anôk dlông amâodah kngưr ală phă phung rup yang sang Israel, amâo bi čhŏ ôh mô̆ riêng gah ñu amâodah amâo dôk ôh hŏng sa čô mniê êjai hruê gơ̆ jhat mơiêng,

⁷amâo ktư̆ juă arăng ôh, ƀiădah lŏ bi wĭt kơ pô čan dŏ gơ̆ mgơ̆ng, amâo tlĕ ôh, brei kpŭng ñu kơ phung êpa leh anăn bi hơô phung lưng mlŭn hŏng čhiăm ao,

⁸amâo brei arăng čan prăk čiăng ƀơ̆ng mnga amâodah ƀơ̆ng đĭ ôh, kơ̆ng kngan ñu amâo ngă klei wê ôh, ngă klei kpă sĭt hdơ̆ng phung mnuih,

⁹êbat tui hlue klei Kâo mtă, leh anăn sĭt suôr djă pioh klei bhiăn Kâo — ñu jing kpă ênô yơh, sĭt nik ñu srăng dôk hdĭp, Yêhôwa Aê Diê lač.

¹⁰Tơdah ñu kkiêng kơ sa čô anak êkei jing sa čô ƀai, jing pô tuh êrah amâodah ngă klei soh anăn,

¹¹wăt tơdah ñu pô amâo tuôm ngă klei anăn ôh, ƀiădah anak êkei ñu: ƀơ̆ng mnơ̆ng ti anôk dlông, bi čhŏ mô̆ riêng gah gơ̆,

¹²ktư̆ juă phung ƀun ƀin leh anăn phung kƀah mnơ̆ng, tlĕ dŏ dô arăng, amâo tla nư ôh, kngưr ală phă phung rup yang, ngă klei jhat Kâo bi êmut kheh,

¹³brei arăng čan čiăng ƀơ̆ng mnga leh anăn čiăng ƀơ̆ng đĭ; snăn gơ̆ srăng hdĭp mơ̆? Gơ̆ amâo srăng dôk hdĭp ôh. Kyuadah gơ̆ ngă leh jih jang klei jhat Kâo bi êmut kheh anei, sĭt nik gơ̆ srăng djiê, êrah gơ̆ srăng lĕ ti dlông gơ̆ pô.

¹⁴Ƀiădah tơdah êkei soh anei kkiêng kơ sa čô anak êkei leh anăn anak êkei anăn ƀuh jih jang klei soh ama ñu ngă leh, leh anăn amâo ngă msĕ snăn ôh:

¹⁵Amâo ƀơ̆ng mnơ̆ng ti anôk dlông, amâodah kngưr ală phă phung rup yang sang Israel ôh, amâo bi čhŏ mô̆ riêng gah ñu ôh,

¹⁶amâo ktư̆ juă arăng ôh, amâo mă dŏ arăng mgơ̆ng ôh, amâo tlĕ dŏ dô arăng ôh, ƀiădah brei kpŭng ñu kơ phung êpa leh anăn bi hơô phung lưng mlŭn hŏng čhiăo ao,

¹⁷kơ̆ng kngan ñu amâo ngă klei wê ôh, amâo ƀơ̆ng mnga amâodah ƀơ̆ng đĭ ôh, djă pioh klei bhiăn Kâo leh anăn êbat tui hlue klei Kâo mtă. Ñu amâo srăng djiê ôh kyua klei soh ama ñu; sĭt nik ñu srăng dôk hdĭp.

¹⁸Bi kơ ama ñu srăng djiê kyua klei soh gơ̆, kyuadah gơ̆ ngă klei arưp aram čiăng ƀơ̆ng prăk, tlĕ dŏ dô ayŏng adei gơ̆, leh anăn ngă klei amâo jăk ti krah phung ƀuôn sang gơ̆.

¹⁹Ƀiădah ăt diih lač, ‘Si ngă anak êkei amâo klam ôh hĕ klei soh ama ñu?’ Tơdah anak êkei ngă leh tui si klei bhiăn leh anăn klei djŏ, leh anăn djă pioh hŏng klei răng jih jang klei Kâo mtă, sĭt nik ñu srăng dôk hdĭp.

²⁰Mngăt ngă soh srăng djiê. Anak êkei amâo srăng klam ôh klei soh ama ñu, kăn ama srăng klam rei klei soh anak êkei ñu; klei kpă ênô sa čô kpă ênô srăng pioh kơ ñu pô, leh anăn klei ƀai sa čô ƀai srăng lĕ kơ ñu pô.”

²¹“Ƀiădah tơdah sa čô ƀai lui jih jang klei soh ñu ngă leh, djă pioh jih jang klei bhiăn Kâo, leh anăn ngă tui si klei bhiăn leh anăn klei djŏ, sĭt nik ñu srăng dôk hdĭp, ñu amâo srăng djiê ôh.

²²Kâo amâo srăng lŏ hdơr bi lĕ kơ ñu ôh sa mta hlăm klei soh ñu ngă leh; ñu srăng dôk hdĭp kyua klei kpă ênô ñu ngă leh.

²³Kâo mâo klei mơak mơ̆ hlăm klei sa čô ƀai djiê? Yêhôwa Aê Diê lač. Boh nik nak Kâo čiăng kơ ñu kmhal leh anăn dôk hdĭp.

²⁴Ƀiădah tơdah sa čô êkei kpă ênô lui klei kpă ênô ñu leh anăn ngă klei wê leh anăn ngă klei jhat Kâo bi êmut kheh msĕ si mnuih soh ngă, ñu srăng dôk hdĭp mơ̆? Kâo amâo srăng hdơr ôh sa mta bruă kpă ñu ngă leh; ñu srăng djiê kyua ñu jing soh leh kyua klei amâo sĭt suôr ñu ngă leh.

²⁵Ƀiădah ăt diih lač, ‘Êlan Yêhôwa amâo kpă ôh.’ Hmư̆ bĕ ară anei, Ơ sang Israel: ‘Êlan Kâo amâo kpă ôh hĕ? Amâo djŏ hĕ êlan diih yơh amâo kpă ôh?

²⁶Tơdah sa čô mnuih kpă ênô wir lui klei kpă ênô ñu leh anăn ngă klei wê, ñu srăng djiê kyua klei anăn; ñu srăng djiê kyua klei wê ñu ngă leh.

²⁷Ƀiădah tơdah sa čô ƀai wir lui klei ƀai ñu ngă leh anăn ngă tui si klei bhiăn leh anăn klei djŏ, ñu srăng bi mtlaih mngăt ñu.

²⁸Kyuadah ñu ksiêm mĭn leh anăn wir lui jih jang klei soh ñu ngă leh, sĭt nik ñu srăng dôk hdĭp, ñu amâo srăng djiê ôh.’

²⁹Ƀiădah ăt sang Israel lač, ‘Êlan Yêhôwa amâo jing kpă ôh.’ Ơ sang Israel, êlan Kâo amâo kpă ôh hĕ? Amâo djŏ hĕ êlan diih yơh amâo kpă ôh?

³⁰Kyuanăn Kâo srăng phat kđi diih, ‘Ơ sang Israel, grăp čô tui si êlan ñu êbat, Yêhôwa Aê Diê lač. Kmhal bĕ leh anăn lui wir hĕ jih jang klei soh diih, huĭdah klei wê diih bi rai diih.

³¹Mă hwiê hĕ jih jang klei soh diih ngă leh hŏng Kâo, leh anăn mă bĕ kơ diih pô ai tiê mrâo leh anăn mngăt myang mrâo! Ya diih čiăng djiê lĕ, Ơ sang Israel?’

³²‘Kyuadah Kâo amâo mơak ôh hlăm klei sa čô mnuih djiê,’ Yêhôwa Aê Diê lač, ‘snăn wĭt bĕ leh anăn dôk hdĭp.’ ”