Read Rade Y-Ôsê 11 Bible Online

Y-Ôsê 11 - Rade bible

Y-Ôsê 11

¹“Êjai Israel jing hđeh, Kâo khăp leh kơ ñu, leh anăn Kâo iêô leh anak êkei Kâo kbiă mơ̆ng čar Êjip.

²Ktang Kâo iêô diñu, ktang hĭn mơh diñu đuĕ mơ̆ng Kâo. Diñu ăt ngă yang nanao kơ phung yang Baal, leh anăn myơr mnơ̆ng ƀâo mngưi kơ phung rup yang.

³Ƀiădah Kâo yơh bi hriăm leh Êphraim thâo êbat, Kâo krơ̆ng diñu ti păl Kâo, ƀiădah diñu amâo thâo ôh Kâo bi hlao diñu leh.

⁴Kâo atăt diñu leh hŏng bră klei pap, hŏng mnal hyuă klei khăp, leh anăn Kâo jing kơ diñu msĕ si sa čô bi hdjul knông ti ƀăng êgei diñu, leh anăn Kâo kkui čiêm diñu.

⁵Kyuadah diñu hngah leh lŏ wĭt kơ Kâo, diñu amâo srăng wĭt kơ čar Êjip ôh, mnuih Asiri srăng jing mtao diñu,

⁶Đao gưm srăng ngă jhat hlăm ƀuôn prŏng diñu, srăng bi rai giê kal ƀăng jang diñu, leh anăn bi mdjiê diñu kyua klei diñu mĭn ngă.

⁷Phung ƀuôn sang Kâo hung kơ klei lui wir Kâo; wăt tơdah diñu iêô kơ Pô Ti Dlông Hĭn, ƀiădah ñu amâo lŏ bi kgŭ diñu ôh.

⁸Si Kâo dưi lui ih, Ơ Êphraim? Si Kâo dưi jao ih kơ arăng, Ơ Israel? Si Kâo dưi brei ih jing msĕ si ƀuôn Adma? Si Kâo dưi ngă kơ ih msĕ si kơ ƀuôn Sêbôim? Ai tiê Kâo hngah ngă klei anăn, kyua klei Kâo khăp jing ktang hĭn êjai!

⁹Kâo amâo srăng ngă ôh tui si klei Kâo ngêñ hlơr, Kâo amâo srăng lŏ bi rai Êphraim ôh. Kyuadah Kâo jing Aê Diê, amâo djŏ mnuih ôh, Pô Doh Jăk ti krah ih, leh anăn Kâo amâo srăng hriê bi rai ôh.

¹⁰Diñu srăng tui ti tluôn Yêhôwa, Gơ̆ srăng gruh msĕ si sa drei êmông gu. Sĭt nik Gơ̆ srăng gruh, leh anăn phung anak Gơ̆ srăng hriê mơ̆ng yŭ hŏng klei ktư̆ yơ̆ng.

¹¹Diñu srăng hriê mơ̆ng čar Êjip ktư̆ yơ̆ng msĕ si čĭm, msĕ si mgăm mơ̆ng čar Asiri; leh anăn Kâo srăng bi wĭt diñu kơ sang diñu pô,” Yêhôwa lač.

¹²Êphraim wang Kâo hŏng klei luar, sang Israel wang Kâo hŏng klei mplư; ƀiădah Yuđa êbat mbĭt hŏng Aê Diê, leh anăn dôk sĭt suôr hŏng Pô Doh Jăk.