Read Rade Y-Ôsê 3 Bible Online

Y-Ôsê 3 - Rade bible

Y-Ôsê 3

¹Yêhôwa lač kơ kâo, “Lŏ nao bĕ, khăp bĕ kơ sa čô mniê jing mniê knhông mâo sa čô piu khăp kơ ñu; msĕ si Yêhôwa khăp kơ phung ƀuôn sang Israel, wăt tơdah diñu wir kơ phung yang mkăn leh anăn khăp kơ ƀêñ boh kriăk ƀâo.”

²Snăn kâo blei ñu leh hŏng pluh êma sêkel prăk, sa hômer mkrah mdiê ôrgơ.

³Leh anăn kâo lač kơ ñu, “Brei ih dôk mbĭt hŏng kâo êjai lu hruê; đăm ngă klei knhông ôh, kăn dôk hŏng êkei mkăn rei; msĕ snăn mơh kâo srăng jing hŏng ih.”

⁴Kyuadah phung anak čô Israel srăng dôk lu hruê amâo mâo ôh mtao amâodah khua, amâo mâo klei ngă yang amâodah kmeh, amâo mâo êphôt amâodah têraphim.

⁵Êdei kơ klei anăn phung anak čô Israel srăng lŏ wĭt leh anăn tui duah Yêhôwa Aê Diê diñu, leh anăn Y-Đawit mtao diñu. Diñu srăng hriê hŏng klei huĭ mpŭ kơ Yêhôwa leh anăn hriê mă tŭ klei jăk jĭn Ñu hlăm ênuk knhal tuč.