Read Rade Y-Apđia 1 Bible Online

Y-Apđia 1 - Rade bible

Y-Apđia 1

¹Klei Y-Apđia bi ƀuh. Snei Khua Yang Yêhôwa lač djŏ kơ čar Êđôm: Drei hmư̆ leh klei hưn mơ̆ng Yêhôwa, leh anăn arăng tiŏ nao leh sa čô pô hưn ti krah phung găp djuê mnuih: “Kgŭ bĕ, brei drei kgŭ bi blah hŏng ñu!

²Nĕ anei, Kâo srăng brei ih jing điêt ti krah phung găp djuê mnuih, arăng srăng bi êmut kơ ih lu snăk.

³Klei mgao ai tiê ih mplư ih leh, Ơ pô dôk hlăm ƀăng ƀlŭng boh tâo, pô dôk ti anôk dlông, pô lač hlăm ai tiê ih pô, ‘Hlei dưi bi mtrŭn kâo truh ti lăn?’

⁴Wăt tơdah ih phiơr ti dlông msĕ si tlang, wăt tơdah ih ngă hruh ih mbĭt hŏng mtŭ, mơ̆ng anôk anăn Kâo srăng bi mtrŭn ih kơ gŭ,” Yêhôwa lač.

⁵Tơdah phung knĕ hriê kơ ih, tơdah phung tlĕ plah mă hriê mlam — Hƀơih, ih srăng rai êdi yơh! — amâo djŏ hĕ diñu srăng tlĕ knŏng djăp kơ diñu pô? Tơdah phung pĕ boh kriăk ƀâo hriê kơ ih, amâo djŏ hĕ diñu ăt lui mnơ̆ng kơ arăng duñ?

⁶Hƀơih, arăng plah mă leh jih dŏ Y-Êsâo, ngăn drăp ñu mdăp leh arăng ksur duah jih mơh!

⁷Jih jang phung bi mguôp hŏng ih mplư ih leh, diñu suôt ih leh truh ti knông čar; phung găp ih dưi leh hŏng ih, phung ƀơ̆ng leh kpŭng mbĭt hŏng ih ƀêč leh kđông kơ ih — ƀiădah ih amâo thâo săng kơ klei anăn ôh.

⁸Yêhôwa lač, “Amâo djŏ hĕ hlăm hruê anăn Kâo srăng bi rai phung thâo mĭn mơ̆ng čar Êđôm, leh anăn phung thâo săng mơ̆ng čư̆ Êsâo?

⁹Phung kahan jhŏng ktang ih srăng rŭng răng, Ơ čar Têman, snăn grăp čô êkei arăng srăng bi rai mơ̆ng čư̆ Êsâo hŏng klei bi mdjiê.

¹⁰Kyua klei măk ƀai ih ngă leh kơ adei ih Y-Yakôp, klei hêñ srăng guôm ih, leh anăn arăng srăng bi rai ih hlŏng lar.

¹¹Ti hruê ih ngă leh klei amâo uêñ ôh, ti hruê phung tue plah mă ngăn drăp ñu, leh anăn phung tue mŭt hlăm ƀăng jang ñu leh anăn ngă klei mđăo kơ ƀuôn Yêrusalem, ih jing msĕ si sa čô hlăm phung digơ̆.

¹²Ƀiădah đăm hơ̆k ôh hlăm hruê ayŏng ih mâo klei knap mñai; đăm mơak ôh kyua phung ƀuôn sang Yuđa hlăm hruê diñu rai tuč, đăm myuĭ ôh kơ diñu hlăm hruê diñu rŭng răng.

¹³Đăm ih mŭt hlăm ƀăng jang ƀuôn sang Kâo hlăm hruê diñu rai tuč; Đăm myuĭ kơ diñu ôh kyua klei knap mñai Yuđa, ti hruê diñu rai luč; Đăm plah mă dŏ dô diñu hlăm hruê Yuđa knap mñai;

¹⁴Đăm dôk ti êlan bi kkuh čiăng bi mdjiê phung diñu đuĕ; Đăm jao phung ñu tlaih hlăm hruê klei rŭng răng.

¹⁵Kyuadah hruê Yêhôwa giăm truh leh kơ jih jang găp djuê mnuih. Arăng srăng ngă kơ ih msĕ si ih ngă leh kơ arăng, bruă ih ngă leh srăng lŏ wĭt ti dlông boh kŏ ih pô.

¹⁶Kyuadah msĕ si ih mnăm leh ti dlông čư̆ doh jăk Kâo, msĕ snăn mơh jih jang găp djuê mnuih jŭm dar srăng mnăm. Diñu srăng mnăm leh anăn lŏ mnăm mơh, leh anăn srăng jing msĕ si diñu amâo tuôm jing ôh.

¹⁷Ƀiădah srăng mâo phung tlaih dôk ti čư̆ Siôn, čư̆ anăn srăng jing doh jăk; leh anăn sang Yakôp srăng lŏ mâo čar diñu pô.

¹⁸Sang Yakôp srăng jing pui, sang Yôsep êlah pui, leh anăn sang Êsâo srăng jing adrăng; diñu srăng čuh leh anăn ƀơ̆ng sang Êsâo, leh anăn amâo srăng adôk sa čô hdĭp ôh hlăm sang Êsâo,” kyuadah Yêhôwa blŭ leh klei anăn.

¹⁹Phung mơ̆ng čar dhŭng srăng mă bha čư̆ Êsâo, leh anăn phung mơ̆ng Lăn Dap srăng mă bha čar Philistin; diñu srăng mă bha čar Êphraim leh anăn čar Samari, leh anăn phung Benjamin srăng mă bha čar Galaat.

²⁰Phung Israel nao leh jing mnă hlăm čar Kanaan srăng mă bha čar truh ti ƀuôn Sarepta; leh anăn phung nao jing mnă mơ̆ng ƀuôn Yêrusalem dôk hlăm čar Sêpharat srăng mă bha ƀuôn hlăm čar dhŭng.

²¹Phung bi mtlaih srăng đĭ čư̆ Siôn čiăng kiă kriê čư̆ Êsâo. Leh anăn ƀuôn ala mtao srăng jing dŏ Yêhôwa.