Read Rade Klei Yap 14 Bible Online

Klei Yap 14 - Rade bible

Klei Yap 14

¹Jih jang phung bi kƀĭn ur kraih; leh anăn phung ƀuôn sang hia mlam anăn.

²Jih jang phung ƀuôn sang Israel blŭ dŭñ dŭñ bi kdơ̆ng hŏng Y-Môis leh anăn Y-Arôn. Jih jang phung bi kƀĭn lač kơ diñu, “Jăk hĭn hmei djiê hĕ leh hlăm čar Êjip! Amâodah jăk hĭn hmei djiê hĕ leh hlăm kdrăn tač anei.

³Si ngă Yêhôwa brei hmei mŭt hlăm čar anei čiăng brei hmei djiê hĕ hŏng đao gưm? Phung mô̆ anak hmei srăng jing mnơ̆ng diñu plah mă. Amâo djŏ hĕ jing jăk hĭn hmei lŏ wĭt kơ čar Êjip?”

⁴Diñu bi lač hdơ̆ng diñu, “Brei drei ruah sa čô khua leh anăn lŏ wĭt kơ čar Êjip.”

⁵Hlăk anăn Y-Môis leh anăn Y-Arôn buôn kŭp ƀô̆ ti lăn ti anăp jih jang phung ƀuôn sang Israel bi kƀĭn.

⁶Leh anăn đơ phung nao ksiêm dlăng leh ala čar, Y-Yôsuê anak êkei Y-Nun leh anăn Y-Kalep anak êkei Y-Jêphunê, hiêk čhiăm ao diñu pô,

⁷leh anăn lač kơ jih jang phung ƀuôn sang Israel bi kƀĭn, “Ala čar hmei hiu čiăng ksiêm dlăng jing sa boh ala čar jăk snăk sơưn.

⁸Tơdah Yêhôwa mơak hŏng drei, Ñu srăng atăt drei mŭt hlăm ala čar anăn leh anăn brei gơ̆ kơ drei, sa boh ala čar mâo mnơ̆ng ƀơ̆ng huă mnăm êbeh dlai.

⁹Knŏng đăm bi kdơ̆ng hŏng Yêhôwa ôh; leh anăn đăm huĭ ôh kơ mnuih ƀuôn sang hlăm ala čar anăn, kyuadah diñu jing mnơ̆ng ƀơ̆ng huă kơ drei; arăng mă hĕ leh klei mgang mơ̆ng diñu, leh anăn Yêhôwa dôk mbĭt hŏng drei; đăm huĭ kơ diñu ôh.”

¹⁰Ƀiădah jih jang phung bi kƀĭn trông čhai čiăng bhĭr diñu hŏng boh tâo. Hlăk anăn klei guh kơang Yêhôwa bi êdah ti sang čhiăm klei bi kƀĭn kơ jih jang phung ƀuôn sang Israel.

¹¹Leh anăn Yêhôwa lač kơ Y-Môis, “Dŭm boh sui phung ƀuôn sang anei srăng bi êmut kơ Kâo? Leh anăn dŭm boh sui diñu amâo srăng đăo kơ Kâo ôh, wăt tơdah jih jang klei bi knăl Kâo ngă leh ti krah diñu dưn?

¹²Kâo srăng čăm diñu djiê hŏng klei ruă tưp leh anăn srăng sua mơ̆ng diñu ngăn dưn, leh anăn Kâo srăng mjing mơ̆ng ih sa găp djuê prŏng hĭn leh anăn ktang hĭn kơ diñu.”

¹³Ƀiădah Y-Môis lač kơ Yêhôwa, “Phung Êjip srăng hmư̆ klei anăn, kyuadah Ih bi kbiă leh phung ƀuôn sang anei hŏng klei myang Ih mơ̆ng krah diñu,

¹⁴leh anăn diñu srăng hưn kơ phung ƀuôn sang čar anei. Ơ Yêhôwa, diñu hmư̆ leh kơ Ih dôk ti krah phung ƀuôn sang anei; kyuadah Ih bi êdah leh brei arăng ƀuh Ih, Ơ Yêhôwa, knam Ih dôk ti dlông diñu leh anăn Ih êbat ti anăp diñu hlăm kmeh knam êjai hruê leh anăn hlăm kmeh pui êjai mlam.

¹⁵Tơdah Ih bi mdjiê hĕ phung ƀuôn sang anei msĕ si bi mdjiê sa čô mnuih, phung găp djuê mnuih hmư̆ leh klei hing ang Ih srăng lač,

¹⁶‘Kyuadah Yêhôwa amâo dưi ôh atăt phung ƀuôn sang anei kơ čar Ñu kat asei leh čiăng brei kơ digơ̆, kyua anăn Ñu bi mdjiê leh digơ̆ hlăm kdrăn tač.’

¹⁷Ară anei, kâo kwưh kơ Ih, brei klei myang Yêhôwa jing prŏng msĕ si Ih ƀuăn leh êjai lač,

¹⁸‘Yêhôwa amâo djăl ăl ôh, leh anăn mdrŏng hŏng klei khăp sĭt suôr, pap brei klei wê leh anăn klei gao klei bhiăn, ƀiădah hơăi Ñu amâo yap kpă ôh pô soh leh, leh anăn bi lĕ klei wê phung ama kơ phung anak tơl truh ti ênuk tal tlâo leh anăn tal pă.’

¹⁹Pap brei kơ klei wê phung ƀuôn sang anei, kâo kwưh kơ Ih, tui si klei prŏng klei Ih khăp sĭt suôr, leh anăn tui si klei Ih pap brei leh kơ phung ƀuôn sang anei mơ̆ng čar Êjip truh kơ ară anei.”

²⁰Leh anăn Yêhôwa lač, “Kâo pap brei leh tui si klei ih akâo.

²¹Ƀiădah sĭt nik, kyua Kâo dôk hdĭp, leh anăn jih lăn ala srăng bŏ hŏng klei guh kơang Yêhôwa,

²²amâo mâo sa čô hlăm phung ƀuh leh klei guh kơang Kâo leh anăn klei bi knăl Kâo ngă leh hlăm čar Êjip leh anăn hlăm kdrăn tač, ƀiădah ăt lông dlăng leh Kâo pluh blư̆ anei leh anăn amâo dôk hmư̆ asăp Kâo ôh,

²³srăng ƀuh čar Kâo kat asei leh čiăng brei kơ phung aê diñu; leh anăn amâo mâo sa čô ôh hlăm phung bi êmut leh kơ Kâo srăng ƀuh čar anăn.

²⁴Ƀiădah dĭng buăl Kâo Y-Kalep, kyuadah Ñu mâo klei mĭn mdê leh anăn tui hlue Kâo hŏng jih ai tiê, Kâo srăng atăt ñu mŭt hlăm čar ñu nao leh, leh anăn phung anak čô ñu srăng mă bha čar anăn.

²⁵Ară anei kyua phung Amalek leh anăn phung Kanaan dôk hlăm tlung, mgi brei diih wir leh anăn đuĕ nao bĕ kơ kdrăn tač tui êlan nao kơ Êa Ksĭ Hrah.”

²⁶Yêhôwa lač kơ Y-Môis leh anăn kơ Y-Arôn,

²⁷“Dŭm boh sui phung bi kƀĭn jhŏng ƀai anei srăng blŭ dŭñ dŭñ bi kdơ̆ng hŏng Kâo? Kâo hmư̆ leh klei phung ƀuôn sang Israel blŭ dŭñ dŭñ, klei diñu blŭ dŭñ dŭñ bi kdơ̆ng hŏng Kâo.

²⁸Lač bĕ kơ diñu, ‘Yêhôwa lač, Kyua Kâo dôk hdĭp, ya klei diih blŭ leh kơ knga Kâo, Kâo srăng ngă kơ diih:

²⁹asei mlei diih djiê srăng êbuh hlăm kdrăn tač anei; leh anăn hlăm jih jang ênoh yap diih arăng yap leh mơ̆ng pô mâo dua pluh thŭn kơ dlông, phung blŭ dŭñ dŭñ bi kdơ̆ng leh hŏng Kâo,

³⁰amâo mâo sa čô srăng mŭt ôh hlăm čar Kâo kat asei leh čiăng brei diih dôk, knŏng Y-Kalep anak êkei Y-Jêphunê leh anăn Y-Yôsuê anak êkei Y-Nun.

³¹Ƀiădah phung anak điêt diih, phung diih lač leh srăng jing mnơ̆ng plah mă, Kâo srăng atăt digơ̆ mŭt, leh anăn digơ̆ srăng thâo kral čar diih bi êmut leh.

³²Bi diih, asei mlei diih djiê srăng êbuh hlăm kdrăn tač anei.

³³Leh anăn phung anak diih srăng jing phung mgăt biăp hlăm kdrăn tač êjai pă pluh thŭn, leh anăn srăng tŭ klei knap mñai kyua klei diih amâo đăo ôh, tơl asei mlei pô knhal tuč hlăm phung diih êbuh leh hlăm kdrăn tač.

³⁴Tui si dŭm hruê diih ksiêm dlăng leh ala čar anăn, jing pă pluh hruê, snăn diih srăng klam klei wê diih êjai pă pluh thŭn, sa thŭn kơ grăp hruê, leh anăn diih srăng thâo kral klei Kâo amâo mơak ôh hŏng diih.’

³⁵Kâo gơ̆ Yêhôwa blŭ leh! Sĭt nik, msĕ snei Kâo srăng ngă kơ jih jang phung bi kƀĭn jhŏng ƀai anei, phung dôk bi kƀĭn mbĭt bi kdơ̆ng hŏng Kâo; hlăm kdrăn tač anei diñu srăng rai tuč jih, leh anăn tinăn diñu srăng djiê.”

³⁶Phung mnuih Y-Môis tiŏ nao leh brei ksiêm dlăng ala čar anăn leh anăn wĭt leh brei jih jang phung bi kƀĭn blŭ dŭñ dŭñ bi kdơ̆ng hŏng ñu êjai yăl dliê klei jhat kơ čar anăn,

³⁷phung mnuih yăl dliê klei jhat kơ čar anăn djiê hŏng klei truh jhat ti anăp Yêhôwa.

³⁸Knŏng Y-Yôsuê anak êkei Y-Nun leh anăn Y-Kalep anak êkei Y-Jêphunê ăt dôk hdĭp đơ phung mnuih nao leh ksiêm dlăng čar anăn.

³⁹Y-Môis blŭ klei anei kơ jih jang phung ƀuôn sang Israel, leh anăn phung ƀuôn sang čŏk hia lu snăk.

⁴⁰Diñu kgŭ aguah ưm leh anăn đĭ ti anôk dlông čar kngư, lač, “Dlăng bĕ, hmei tinei, hmei srăng đĭ nao kơ anôk Yêhôwa ƀuăn leh; kyuadah hmei ngă soh leh.”

⁴¹Ƀiădah Y-Môis lač, “Si ngă ară anei diih gao klei Yêhôwa mtă, kyuadah klei anăn amâo srăng dưi ôh?

⁴²Đăm đĭ nao ôh huĭdah diih lĕ buh ti anăp phung roh diih, kyuadah Yêhôwa amâo dôk ti krah diih ôh.

⁴³Kyuadah tinăn phung Amalek leh anăn phung Kanaan dôk ti anăp diih, leh anăn diih srăng êbuh hŏng đao gưm; kyuadah diih lui wir amâo lŏ tui hlue Yêhôwa ôh, Yêhôwa amâo srăng dôk mbĭt hŏng diih ôh.”

⁴⁴Ăt diñu đĭ nao ti anôk dlông čar kngư, wăt tơdah hip klei bi mguôp Yêhôwa wăt Y-Môis amâo kbiă ôh mơ̆ng wăl.

⁴⁵Snăn phung Amalek leh anăn phung Kanaan dôk hlăm čar kngư anăn trŭn hriê leh anăn dưi hŏng diñu leh anăn tiŏ diñu truh ti ƀuôn Hôrma.