Read Rade Klei Yap 2 Bible Online

Klei Yap 2 - Rade bible

Klei Yap 2

¹Yêhôwa lač kơ Y-Môis leh anăn Y-Arôn,

²“Phung ƀuôn sang Israel srăng dôk grăp čô giăm čhiăm gru ñu pô, hŏng mnơ̆ng bi knăl kơ sang ama diñu; diñu srăng dôk phă sang čhiăm klei bi kƀĭn ti djăp tĭng.

³Phung dôk tĭng ngŏ phă anôk yang hruê ƀlĕ srăng mâo čhiăm gru anôk Yuđa tui si phung diñu. Khua kơ phung ƀuôn sang Yuđa jing Y-Nahsôn anak êkei Y-Aminadap,

⁴phung kahan ñu arăng yap leh mâo kjuh pluh pă êbâo năm êtuh čô.

⁵Phung dôk giăm ñu jing găp djuê Isakar, khua kơ phung ƀuôn sang Isakar jing Y-Nêthanel anak êkei Y-Suar,

⁶phung kahan ñu arăng yap leh mâo êma pluh pă êbâo pă êtuh čô.

⁷Leh anăn găp djuê Sabulôn, khua kơ phung ƀuôn sang Sabulôn jing Y-Êliap anak êkei Y-Hêlôn,

⁸phung kahan ñu arăng yap leh mâo êma pluh kjuh êbâo pă êtuh čô.

⁹Jih jang phung hlăm anôk Yuđa tui si phung diñu mâo sa êtuh sa păn pluh năm êbâo pă êtuh čô. Diñu jing phung ba êlan êlâo êjai diñu êbat.

¹⁰Tĭng dhŭng srăng mâo čhiăm gru anôk Ruben tui si phung diñu, khua phung ƀuôn sang Ruben jing Y-Êlisur anak êkei Y-Sêdur,

¹¹phung kahan ñu arăng yap leh mâo pă pluh năm êbâo êma êtuh čô.

¹²Phung dôk giăm ñu jing găp djuê Simêôn, khua phung buôn sang Simêôn jing Y-Sêlumiel anak êkei Y-Surisadai,

¹³phung kahan ñu arăng yap leh mâo êma pluh dua păn êbâo tlâo êtuh čô.

¹⁴Leh anăn găp djuê Gat, khua kơ phung ƀuôn sang Gat jing Y-Êliasap anak êkei Y-Rêuel,

¹⁵phung kahan ñu arăng yap leh mâo pă pluh êma êbâo năm êtuh êma pluh čô.

¹⁶Jih jang hlăm anôk Ruben tui si phung diñu mâo sa êtuh êma pluh sa êbâo pă êtuh êma pluh čô. Diñu srăng jing phung êbat tal dua.

¹⁷Leh anăn sang čhiăm klei bi kƀĭn srăng đuĕ nao mbĭt hŏng phung Lêwi ti krah phung mkăn. Tui si anôk diñu dôk leh, snăn diñu srăng đuĕ nao, grăp phung hlăm anôk diñu, tui si čhiăm gru diñu.

¹⁸Tĭng yŭ srăng mâo čhiăm gru anôk Êphraim tui si phung diñu, khua phung ƀuôn sang Êphraim jing Y-Êlisama anak êkei Y-Amihut,

¹⁹phung kahan ñu arăng yap leh mâo pă pluh êbâo êma êtuh čô.

²⁰Phung dôk giăm ñu jing găp djuê Manasê, khua phung ƀuôn sang Manasê jing Y-Gamaliêl anak êkei Y-Pêdasur,

²¹phung kahan ñu arăng yap leh mâo tlâo pluh dua êbâo dua êtuh čô.

²²Leh anăn găp djuê Benjamin, khua phung ƀuôn sang Benjamin jing Y-Abidan anak êkei Y-Gidêôni,

²³phung kahan ñu arăng yap leh mâo tlâo pluh êma êbâo pă êtuh čô.

²⁴Jih jang hlăm anôk Êphraim tui si phung diñu mâo sa êtuh sa păn êbâo sa êtuh čô. Diñu srăng jing phung êbat tal tlâo.

²⁵Tĭng dưr srăng mâo čhiăm gru anôk Dan tui si phung diñu, khua phung ƀuôn sang Dan jing Y-Ahiêser anak êkei Y-Amisadai,

²⁶phung kahan ñu arăng yap leh mâo năm pluh dua êbâo kjuh êtuh čô.

²⁷Phung dôk giăm ñu jing găp djuê Aser, khua phung ƀuôn sang Aser jing Y-Pagiel anak êkei Y-Ôkran,

²⁸phung kahan ñu arăng yap leh mâo pă pluh sa êbâo êma êtuh čô.

²⁹Leh anăn găp djuê Naptali, khua phung ƀuôn sang Naptali jing Y-Ahira anak êkei Y-Ênan,

³⁰phung kahan ñu arăng yap leh mâo êma pluh tlâo êbâo pă êtuh čô.

³¹Jih jang hlăm anôk Dan mâo sa êtuh êma pluh kjuh êbâo năm êtuh čô. Diñu srăng jing phung êbat knhal tuč tui si čhiăm gru diñu.

³²Dŭm anăn phung ƀuôn sang Israel arăng yap leh tui si sang ama diñu; jih jang phung hlăm anôk diñu dôk yap leh tui si phung diñu mâo năm êtuh tlâo êbâo êma êtuh êma pluh čô.

³³Ƀiădah arăng amâo yap ôh phung Lêwi mbĭt hŏng phung ƀuôn sang Israel, tui si Yêhôwa mtă leh kơ Y-Môis.

³⁴Snăn phung ƀuôn sang Israel ngă leh. Tui si jih klei Yêhôwa mtă leh kơ Y-Môis, snăn diñu dôk tui si čhiăm gru diñu, msĕ snăn diñu êbat, grăp čô tui si djuê ñu, tui si sang ama ñu.”