Read Rade Klei Yap 34 Bible Online

Klei Yap 34 - Rade bible

Klei Yap 34

¹Yêhôwa lač kơ Y-Môis,

²“Mtă bĕ kơ phung ƀuôn sang Israel leh anăn lač kơ diñu, ‘Tơdah diih mŭt leh hlăm ala čar Kanaan (čar anei srăng lĕ kơ diih jing ngăn dưn, jih ala čar Kanaan mâo knông ti gŭ anei):

³tĭng dhŭng srăng dơ̆ng mơ̆ng kdrăn tač Sin hlue knông ala čar Êđôm, leh anăn knông dhŭng diih srăng dơ̆ng mơ̆ng knhal Êa Ksĭ Djiê ti ngŏ.

⁴Knông diih srăng wir phă dhŭng đĭ čư̆ Akrabim leh anăn găn truh ti Sin, leh anăn knhal tuč ñu srăng truh ti dhŭng Kadês-Barnê; mơ̆ng anăn ñu hlŏng truh ti Hasar-Adar hlŏng truh ti Asmôn,

⁵knông lăn srăng dar mơ̆ng Asmôn truh ti Hnoh Êa Êjip leh anăn tuč ti êa ksĭ Prŏng.

⁶Bi kơ knông yŭ diih srăng mâo Êa Ksĭ Prŏng leh anăn hang ñu; anăn srăng jing knông diih tĭng yŭ.

⁷Anei srăng jing knông diih tĭng dưr: mơ̆ng Êa Ksĭ Prŏng diih srăng bi kčah kdriêl truh ti čư̆ Hor;

⁸mơ̆ng čư̆ Hor diih srăng bi kčah truh ti anôk mŭt ƀuôn Hamat, truh ti Sêdat.

⁹Leh anăn knông srăng hlŏng nao truh ti Siphrôn, leh anăn knhal srăng truh ti Hasar-Ênan. Anăn srăng jing knông diih tĭng dưr.

¹⁰Brei diih bi kčah knông ngŏ mơ̆ng Hasar-Ênan truh ti Sêpham;

¹¹knông srăng trŭn mơ̆ng Sêpham truh ti Ribla tĭng ngŏ Ain; leh anăn knông srăng truh ti hang êa ksĭ Kinêret ti ngŏ;

¹²leh anăn knông srăng trŭn truh ti êa krông Yurdan, leh anăn knhal knông srăng truh ti Êa Ksĭ Djiê. Anăn srăng jing ala čar diih mbĭt hŏng knông ñu jŭm dar.’ ”

¹³Y-Môis mtă kơ phung ƀuôn sang Israel, lač, “Anei čar diih srăng dưn hŏng klei mđăo, čar Yêhôwa mtă leh čiăng brei kơ dua păn găp djuê leh anăn mkrah găp djuê;

¹⁴kyuadah găp djuê phung anak êkei Ruben tui si sang ama diñu leh anăn găp djuê phung anak êkei Gat tui si sang ama diñu mă tŭ leh ngăn dưn diñu, leh anăn msĕ mơh mkrah găp djuê Manasê.

¹⁵Phung dua găp djuê anăn leh anăn mkrah găp djuê mă tŭ leh ngăn dưn nah anei êa krông Yurdan phă anăp hŏng ƀuôn Yêrikô, tĭng nah ngŏ, phă yang hruê ƀlĕ.”

¹⁶Yêhôwa lač kơ Y-Môis,

¹⁷“Anei anăn phung êkei srăng bi mbha čar kơ diih jing ngăn dưn: Y-Êlêasar khua ngă yang leh anăn Y-Yôsuê anak êkei Y-Nun.

¹⁸Brei ih mă sa čô khua kơ grăp găp djuê čiăng bi mbha čar jing ngăn dưn.

¹⁹Anei anăn phung êkei anăn: mơ̆ng găp djuê Yuđa, Y-Kalep anak êkei Y-Jêphunê;

²⁰mơ̆ng găp djuê phung anak êkei Simêôn, Y-Semuel anak êkei Y-Amihut;

²¹mơ̆ng găp djuê Benjamin, Y-Êlidat anak êkei Y-Kislon;

²²mơ̆ng găp djuê phung anak êkei Dan sa čô khua, Y-Buki anak êkei Y-Jôgli;

²³mơ̆ng phung anak êkei Yôsep, mơ̆ng găp djuê phung anak êkei Manasê sa čô khua, Y-Haniel anak êkei Y-Êphôt;

²⁴mơ̆ng găp djuê phung anak êkei Êphraim sa čô khua Y-Kêmuêl anak êkei Y-Siptan;

²⁵mơ̆ng găp djuê phung anak êkei Sabulôn sa čô khua Y-Êlisaphan anak êkei Y-Parnak;

²⁶mơ̆ng găp djuê phung anak êkei Isakar sa čô khua Y-Paltiel anak êkei Y-Asan;

²⁷mơ̆ng găp djuê phung anak êkei Aser sa čô khua Y-Ahihut anak êkei Y-Sêlômi;

²⁸mơ̆ng găp djuê phung anak êkei Naptali sa čô khua Y-Pêdahel anak êkei Y-Amihut.”

²⁹Kơ phung anei Yêhôwa mtă brei bi mbha ngăn dưn kơ phung ƀuôn sang Israel hlăm čar Kanaan.