Read Rade Y-Mika 1 Bible Online

Y-Mika 1 - Rade bible

Y-Mika 1

¹Hlăm ênuk Y-Jôtham, Y-Ahas, leh anăn Y-Hêsêkia, phung mtao čar Yuđa, Yêhôwa blŭ kơ Y-Mika mnuih ƀuôn Môrêset klei ñu ƀuh djŏ kơ ƀuôn Samari leh anăn ƀuôn Yêrusalem.

²Hmư̆ bĕ, jih jang diih phung ƀuôn sang, hmư̆ bi nik bĕ, Ơ lăn ala leh anăn jih jang mnơ̆ng hlăm ñu, brei Khua Yang Yêhôwa, Khua Yang mơ̆ng sang yang doh jăk Ñu, jing Pô hưn bi kdơ̆ng hŏng diih.

³Kyuadah nĕ anei, Yêhôwa kbiă mơ̆ng anôk Ñu dôk; Ñu srăng trŭn juă ti jih anôk dlông hlăm lăn ala.

⁴Čư̆ srăng lik ti gŭ jơ̆ng ñu, tlung srăng kđang msĕ si hlĭn ti anăp pui, msĕ si êa đoh ti ping čư̆ dơ̆ng.

⁵Jih klei anei srăng truh kyua klei Yakôp gao klei bhiăn leh anăn kyua klei soh sang Israel. Ya jing klei Yakôp gao klei bhiăn? Amâo djŏ hĕ jing ƀuôn Samari? Ya jing anôk dlông Yuđa? Amâo djŏ hĕ jing ƀuôn Yêrusalem?

⁶Kyuanăn Kâo srăng brei ƀuôn Samari jing sa kăm djah hlăm dliê, sa bĭt anôk pioh ngă đang boh kriăk ƀâo; leh anăn Kâo srăng tuh hĕ boh tâo ñu hlăm tlung, leh anăn bi êdah tur ñu kơ tač.

⁷Jih jang rup krah ñu srăng mčah đơ điêt, jih jang ênoh mưn ñu arăng srăng čuh hĕ hlăm pui, leh anăn Kâo srăng bi rai hĕ jih jang rup yang ñu. Kyuadah ñu mă tŭ mnơ̆ng anăn hŏng ênoh mưn mơ̆ng klei knhông, leh anăn dŏ anăn srăng lŏ wĭt jing ênoh mưn sa čô mniê knhông.

⁸Kyuanăn kâo srăng ur krao leh anăn čŏk hia; kâo srăng êbat jơ̆ng mang leh anăn asei lưng. Kâo srăng čŏk hia msĕ si asâo tan, leh anăn krao msĕ si čĭm ôtrus.

⁹Kyuadah anôk êka ñu amâo dưi hlao ôh, leh anăn klei bi êka anăn truh leh ti čar Yuđa, truh leh ti ƀăng jang phung ƀuôn sang kâo ti ƀuôn Yêrusalem.

¹⁰Đăm hưn klei anei hlăm ƀuôn Gat ôh, đăm hia ôh; bi klŭng diih pô hlăm ƀruih lăn ti ƀuôn Bet-Lê-Aphra.

¹¹Găn bĕ ti êlan diih, Ơ phung dôk hlăm ƀuôn Saphir lưng mlŭn leh anăn hêñ; phung dôk hlăm ƀuôn Sanan amâo dưi tlaih ôh; arăng čŏk hia ti ƀuôn Bet-Êsel kyuadah arăng mă hĕ mơ̆ng diih anôk kđap.

¹²Kyuadah phung dôk hlăm ƀuôn Marôt jing awăt êjai guôn klei jăk, kyuadah klei knap mñai trŭn leh mơ̆ng Yêhôwa truh wăt ti ƀăng jang ƀuôn Yêrusalem.

¹³Kă bĕ aseh ti êdeh, Ơ phung dôk ti ƀuôn Lakis; diih jing phŭn klei soh kơ anak mniê ƀuôn Siôn, kyuadah hlăm ih yơh arăng ƀuh klei Israel gao klei bhiăn.

¹⁴Kyuanăn ih srăng myơr mnơ̆ng brei kơ ƀuôn Môrêset-Gat êjai ih đuĕ nao; phung ƀuôn sang Aksip srăng jing mnơ̆ng mplư kơ phung mtao Israel.

¹⁵Kâo srăng lŏ atăt sa čô khua mrâo truh ngă kơ ih, Ơ phung dôk hlăm ƀuôn Marêsa, klei guh kơang phung Israel srăng truh ti ƀuôn Adulam.

¹⁶Bi kla bĕ boh kŏ ih pô, khăt hĕ ƀŭk ih kyua phung anak ih khăp; bi kla bĕ boh kŏ ih msĕ si tlang, kyuadah diñu srăng đuĕ mơ̆ng diih nao jing mnă.