Read Rade Y-Mika 5 Bible Online

Y-Mika 5 - Rade bible

Y-Mika 5

¹Ară anei dăp bĕ phung kahan ih, Ơ anak mniê phung kahan, kyuadah arăng wang ngă kơ drei. Diñu srăng čăm khua gai gĭt phung Israel ti miêng hŏng giê.

²Ƀiădah ih, Ơ ƀuôn Betlêhem Êphrata, wăt tơdah ih jing ƀuôn điêt ti krah phung găp djuê čar Yuđa, mơ̆ng ih srăng kbiă hriê kơ Kâo sa čô srăng jing khua gai gĭt hlăm phung Israel, Pô mâo phŭn mơ̆ng ênuk đưm, mơ̆ng ênuk hlŏng lar.

³Kyuanăn Yêhôwa srăng jao digơ̆ tơl truh ênuk mniê ruă kkiêng truh tian leh; hlăk anăn phung ayŏng adei Ñu adôk srăng lŏ wĭt kơ phung ƀuôn sang Israel.

⁴Ñu srăng dôk dơ̆ng leh anăn kiă jih jang biăp Ñu hŏng klei ktang Yêhôwa, hŏng klei kdrăm anăn Yêhôwa Aê Diê ñu. Leh anăn diñu srăng dôk hơĭt, kyuadah hlăk anăn Ñu srăng jing prŏng truh ti knhal lăn ala.

⁵Leh anăn Pô anăn srăng jing klei êđăp ênang kơ drei. Tơdah mnuih Asiri srăng mŭt hlăm čar drei, leh anăn juă ti kđông drei, drei srăng brei kjuh čô mgăt biăp, leh anăn sa păn čô phung khua kgŭ bi kdơ̆ng hŏng gơ̆.

⁶Diñu srăng kiă kriê čar Asiri hŏng đao gưm, leh anăn čar Nimrôt hŏng đao gưm hliê. Ñu srăng bi mtlaih drei mơ̆ng phung Asiri tơdah phung anăn mŭt čar drei, leh anăn juă ti lam knông drei.

⁷Hlăk anăn kdrêč adôk mơ̆ng Yakôp srăng dôk ti krah lu phung ƀuôn sang msĕ si êa nguôm mơ̆ng Yêhôwa, msĕ si êa hjan ti rơ̆k mda, msĕ si mnơ̆ng amâo guôn kơ mnuih ôh, kăn bi kdung hruê kơ phung anak mnuih rei.

⁸Leh anăn kdrêč adôk mơ̆ng Yakôp srăng dôk ti krah phung găp djuê mnuih, ti krah lu phung ƀuôn sang, msĕ si sa drei êmông gu ti krah hlô dliê, msĕ si sa drei êđai êmông gu ti krah lu biăp, tơdah ñu găn, ñu juă leh anăn hiêk đơ điêt, leh anăn amâo mâo pô dưi bi mtlaih ôh.

⁹Kngan Khua Yang srăng yơr ngă kơ phung roh ñu, leh anăn jih jang phung roh ñu srăng rai tuč.

¹⁰“Leh anăn hlăm hruê anăn,” Yêhôwa lač, “Kâo srăng bi rai hĕ aseh, leh anăn êdeh aseh ih mơ̆ng ti krah ih.

¹¹Kâo srăng bi rai ƀuôn prŏng hlăm čar ih, leh anăn bi klưh jih jang kđông kjăp ih.

¹²Kâo srăng bi rai hĕ klei thâo mdian mơ̆ng ih, leh anăn ih amâo srăng lŏ mâo phung mjâo ôh.

¹³Kâo srăng bi rai hĕ rup yang leh anăn kmeh krah mơ̆ng ih, leh anăn diih amâo srăng lŏ buôn kkuh ôh ti anăp bruă kngan ih.

¹⁴Kâo srăng buč hĕ phung rup yang Asêra ih mơ̆ng krah ih leh anăn bi rai jih jang ƀuôn prŏng ih.

¹⁵Kâo srăng ngă klei rŭ ênua hŏng klei ăl leh anăn ngêñ kơ phung găp djuê mnuih amâo gưt asăp Kâo ôh.”