Read Rade Y-Mathiơ 7 Bible Online

Y-Mathiơ 7 - Rade bible

Y-Mathiơ 7

¹“Đăm phat kđi arăng ôh, čiăng kơ arăng amâo phat kđi diih.

²Kyuadah tui si diih phat kđi arăng, arăng srăng phat kđi diih msĕ mơh; leh anăn hnơ̆ng diih mkă kơ arăng, arăng srăng mkă kơ diih msĕ mơh.

³Si ngă ih ƀuh hlăm ală ayŏng adei ih, ƀiădah ih amâo ƀuh ôh sa ƀĕ êda hlăm ală ih pô?

⁴Amâodah si ih dưi lač kơ ayŏng adei ih, ‘Brei kâo mă hĕ ƀruih mơ̆ng ală ih,’ êjai mâo sa ƀĕ êda hlăm ală ih pô?

⁵Ơ mnuih ai ngăm, mă hĕ êda mơ̆ng ală ih êlâo, leh anăn ih srăng ƀuh mngač dưi mă ƀruih mơ̆ng ală ayŏng adei ih.

⁶Đăm brei mnơ̆ng doh jăk kơ asâo ôh; leh anăn đăm hwiê añŭ diih ti anăp ŭn ôh, huĭdah diñu juă hĕ mnơ̆ng anăn leh anăn wir kĕ diih.”

⁷“Akâo bĕ, leh anăn arăng srăng brei kơ diih; duah bĕ, leh anăn diih srăng ƀuh; khŏk bĕ, leh anăn arăng srăng pŏk brei kơ diih.

⁸Kyuadah grăp čô hlei pô akâo, mă tŭ; hlei pô duah, ƀuh; leh anăn arăng pŏk brei kơ hlei pô khŏk.

⁹Amâodah hlei hlăm phung diih, tơdah anak êkei ñu akâo kpŭng, srăng brei boh tâo kơ gơ̆?

¹⁰Amâodah tơdah gơ̆ akâo kan, ñu srăng brei ala kơ gơ̆ mơ̆?

¹¹Snăn tơdah diih jing phung jhat thâo brei mnơ̆ng jăk kơ phung anak diih, ƀai hĭn Ama diih hlăm adiê srăng brei mnơ̆ng jăk kơ hlei pô akâo kơ Ñu.

¹²Snăn ya klei diih čiăng phung mnuih ngă kơ diih, brei diih ngă msĕ snăn mơh kơ digơ̆; kyuadah klei anăn jing djŏ tui si klei bhiăn leh anăn klei phung khua pô hưn êlâo čih leh.”

¹³“Mŭt bĕ ti ƀăng jang kniă; kyuadah ƀăng jang ƀai leh anăn êlan prŏng atăt ba kơ klei rai luč, leh anăn phung mŭt tinăn jing lu.

¹⁴Bi ƀăng jang điêt leh anăn êlan kniă atăt ba kơ klei hdĭp, leh anăn jing ƀiă phung thâo bĭt ƀăng jang leh anăn êlan anăn.”

¹⁵“Răng bĕ kơ phung khua pô hưn êlâo soh. Diñu hriê kơ diih hơô klĭt biăp, ƀiădah ti lam diñu jing asâo tan ră.

¹⁶Diih srăng thâo kral diñu tui si boh diñu. Arăng pĕ mơ̆ boh kriăk ƀâo mơ̆ng êruê, amâodah boh hra mơ̆ng hruĕ êruê?

¹⁷Snăn grăp ana kyâo jăk mâo boh jăk, ƀiădah ana kyâo jhat mâo boh jhat.

¹⁸Sa ƀĕ ana kyâo jăk amâo dưi mâo boh jhat ôh; kăn sa ƀĕ ana kyâo jhat dưi mâo boh jăk rei.

¹⁹Grăp ƀĕ ana kyâo amâo mâo boh jăk ôh arăng druôm hĕ leh anăn hwiê hlăm pui.

²⁰Snăn diih srăng thâo kral diñu tui si boh diñu.”

²¹“Amâo djŏ ôh grăp čô hlei pô lač kơ Kâo, ‘Ơ Khua Yang, Ơ Khua Yang’ srăng mŭt hlăm ƀuôn ala mtao adiê, ƀiădah knŏng hlei pô ngă tui si Ama Kâo hlăm adiê čiăng.

²²Hlăm hruê anăn srăng mâo lu mnuih lač kơ Kâo, ‘Ơ Khua Yang, Ơ Khua Yang, amâo djŏ hĕ hmei tuôm hưn êlâo leh hlăm anăn Ih, suôt yang jhat hlăm anăn Ih, leh anăn ngă lu bruă myang hlăm anăn Ih?’

²³Hlăk anăn Kâo srăng lač klă kơ diñu, ‘Kâo amâo tuôm thâo kral diih ôh; đuĕ bĕ mơ̆ng Kâo, Ơ phung soh jhat.’ ”

²⁴“Snăn yơh hlei pô hmư̆ klei Kâo blŭ anei leh anăn gưt srăng jing msĕ si sa čô mnuih thâo mĭn mdơ̆ng sang ñu ti dlông boh tâo.

²⁵Mâo adiê hjan, êa lip, leh anăn angĭn êbŭ ktang thut ngă kơ sang anăn, ƀiădah sang anăn amâo êbuh ôh, kyuadah arăng mdơ̆ng ñu leh ti dlông boh tâo.

²⁶Ƀiădah hlei pô hmư̆ klei Kâo blŭ anei leh anăn amâo gưt ôh srăng jing msĕ si sa čô mnuih mluk mdơ̆ng sang ñu ti dlông lăn čuah.

²⁷Mâo adiê hjan, êa lip, leh anăn angĭn êbŭ ktang thut ngă kơ sang anăn, sang anăn êbuh, leh anăn rai jih.”

²⁸Tơdah leh Yêsu ruê̆ blŭ klei anăn, phung lu bi kngăr kơ klei Ñu mtô,

²⁹kyuadah Ñu mtô kơ digơ̆ hŏng klei kơhưm, amâo djŏ msĕ si phung khua čih hră digơ̆ ôh.