Read Rade Y-Markôs 13 Bible Online

Y-Markôs 13 - Rade bible

Y-Markôs 13

¹Êjai Yêsu kbiă mơ̆ng Sang Kkuh Mpŭ, sa čô hlăm phung ƀĭng kna Ñu lač, “Dlăng bĕ, Ơ Nai, boh tâo leh anăn jih jang sang anei tloh ênoh êdi.”

²Yêsu lač kơ gơ̆, “Ih ƀuh mơ̆ jih jang sang prŏng anei? Amâo mâo sa klŏ boh tâo srăng dôk ti dlông boh tâo mkăn, ƀiădah jih jang srăng klưh jih.”

³Êjai Ñu dôk gŭ ti čư̆ Ôliwơ phă hŏng Sang Kkuh Mpŭ, Y-Pêtrôs, Y-Yakơ, Y-Yôhan, leh anăn Y-Andrê êmuh Yêsu hjăn,

⁴“Hưn kơ hmei hbĭl klei anăn srăng truh? Leh anăn ya srăng jing klei bi knăl tơdah jih klei anăn srăng truh?”

⁵Yêsu lač kơ diñu, “Răng bĕ, đăm brei arăng mplư diih ôh.

⁶Lu mnuih srăng hriê mgưt hŏng anăn Kâo, lač, ‘Kâo gơ̆ yơh,’ leh anăn diñu srăng mplư lu mnuih.

⁷Leh anăn tơdah diih hmư̆ ênai klei bi blah giăm leh anăn hmư̆ hing kơ klei bi blah kbưi, đăm rŭng răng ôh. Klei anăn srăng truh, ƀiădah ka truh hruê knhal tuč ôh.

⁸Sa găp djuê mnuih srăng bi kdơ̆ng hŏng sa găp djuê mkăn, leh anăn sa boh ƀuôn ala mtao srăng bi blah hŏng sa boh ƀuôn ala mtao mkăn. Srăng mâo klei yơ̆ng lăn ala hlăm lu bĭt anôk, leh anăn srăng mâo lu klei ư̆ êpa. Jih klei anăn jing knŏng klei mphŭn dơ̆ng kơ klei ruă kkiêng.

⁹Răng bĕ kơ diih pô, kyuadah arăng srăng jao diih kơ phung khua phat kđi, leh anăn arăng srăng čăm diih hlăm sang bi kƀĭn. Diih srăng dôk ti anăp phung khua čar leh anăn phung mtao kyua Kâo, čiăng jing phung hưn ti anăp diñu.

¹⁰Ƀiădah êlâo kơ hruê knhal tuč arăng srăng hưn klei mrâo mrang jăk kơ jih jang găp djuê mnuih.

¹¹Tơdah arăng mă jao diih kơ klei phat kđi, đăm diih uêñ êlâo ôh kơ ya klei diih srăng blŭ; ƀiădah blŭ bĕ ya klei bi êdah kơ diih ti mông anăn. Kyuadah amâo djŏ diih pô ôh srăng blŭ, ƀiădah Yang Mngăt Jăk yơh.

¹²Ayŏng srăng jao adei ñu pô brei arăng bi mdjiê, leh anăn ama srăng jao anak ñu pô. Phung anak srăng bi kdơ̆ng hŏng amĭ ama diñu, leh anăn brei arăng bi mdjiê hĕ digơ̆.

¹³Jih jang mnuih srăng bi êmut kơ diih kyua anăn Kâo. Ƀiădah hlei pô gĭr tơl knhal tuč srăng tlaih.”

¹⁴“Ƀiădah tơdah diih ƀuh klei bi êmut kheh mdơ̆ng ti anôk amâo dưi ngă ôh, (brei pô dlăng hră anei thâo săng) hlăk anăn brei phung dôk hlăm čar Yuđa đuĕ phă čư̆.

¹⁵Hlei pô dôk ti dlông čuôr sang đăm lŏ luč mông trŭn mŭt hlăm sang čiăng mă mđuĕ dŏ dô ñu ôh.

¹⁶Đăm brei pô dôk hlăm hma wĭt mă ao kpal ñu ôh.

¹⁷Leh anăn knap mñai yơh kơ phung mniê ba tian leh anăn kơ phung mâo anak dôk mam hlăm hruê anăn!

¹⁸Wah lač bĕ čiăng kơ jih klei anăn amâo truh ôh êjai yan puih.

¹⁹Kyuadah hlăm ênuk anăn srăng mâo klei knap mñai amâo tuôm mâo ôh msĕ snăn mơ̆ng ênuk Aê Diê hrih jih jang mnơ̆ng hlŏng kơ hruê anei, kăn srăng lŏ tuôm mâo rei.

²⁰Tơdah Khua Yang amâo bi hrŏ hruê ênuk anăn amâo mâo sa čô mnuih srăng tlaih ôh. Ƀiădah Ñu bi hrŏ leh hruê anăn kyua phung Ñu ruah leh.

²¹Hlăk anăn tơdah arăng lač kơ diih, ‘Nĕ tinei Krist,’ amâodah, ‘Dlăng, Ñu ti adih,’ đăm đăo kơ klei anăn ôh.

²²Srăng mâo lu Krist soh leh anăn lu khua pô hưn êlâo soh. Diñu srăng bi êdah klei bi knăl mdê leh anăn klei yuôm bhăn, čiăng mplư wăt phung Aê Diê ruah leh, tơdah dưi.

²³Snăn răng bĕ. Nĕ anei, Kâo hưn leh jih klei anăn kơ diih êlâo.”

²⁴“Ƀiădah hlăm ênuk leh êgao klei knap mñai anăn, yang hruê srăng jing mmăt, leh anăn mlan amâo lŏ mtrang mngač ôh.

²⁵Phung mtŭ srăng lĕ mơ̆ng adiê, leh anăn lu klei myang hlăm êngĭt adiê srăng kpư̆ mgei.

²⁶Hlăk anăn arăng srăng ƀuh Anak Mnuih hriê ti knam hŏng klei myang prŏng leh anăn klei guh kơang.

²⁷Leh anăn Ñu srăng tiŏ nao phung dĭng buăl jăk Ñu, bi kƀĭn phung Aê Diê ruah leh mơ̆ng pă bĭt kiêng lăn ala, mơ̆ng knhal anei truh kơ knhal adih.”

²⁸“Brei diih hriăm klei bi hriêng mơ̆ng ana boh hra: tơdah adhan ñu mda leh anăn dơ̆ng bi knăt, diih thâo yan bhang giăm truh leh.

²⁹Msĕ snăn mơh tơdah diih ƀuh jih jang klei anăn truh, diih srăng thâo kơ Anak Mnuih giăm truh leh, Ñu dôk ti ƀăng bhă leh.

³⁰Sĭt nik Kâo hưn kơ diih, phung mnuih ênuk anăn amâo srăng êgao tuč ôh êlâo kơ jih klei anăn truh.

³¹Adiê leh anăn lăn ala srăng êgao tuč, ƀiădah klei Kâo blŭ amâo srăng êgao tuč ôh.”

³²“Ƀiădah bi kơ hruê leh anăn mông anăn, amâo mâo sa čô thâo ôh, wăt phung dĭng buăl jăk hlăm adiê, wăt Anak kăn thâo rei, knŏng hjăn Ama thâo.

³³Răng bĕ, dôk kăp dlăng leh anăn wah lač, kyuadah diih amâo thâo hbĭl mông anăn srăng truh.

³⁴Klei anăn jing msĕ si sa čô mnuih đuĕ hiu čar kbưi. Tơdah ñu kbiă mơ̆ng sang, ñu jao bruă mdê mdê kơ grăp čô phung dĭng buăl ñu, leh anăn mtă kơ pô kiă ƀăng jang dôk răng nanao.

³⁵Snăn răng bĕ, kyuadah diih amâo thâo ôh hbĭl khua sang srăng truh, thâodah ti tlam, amâodah ti krah mlam, amâodah ti mnŭ kdjô̆, amâodah ti aguah,

³⁶huĭdah ñu truh hĕ bhiâo riâo rit leh anăn ƀuh diih dôk pĭt.

³⁷Klei Kâo lač kơ diih, Kâo lač kơ jih jang mơh: Dôk răng bĕ.”