Read Rade Y-Markôs 14 Bible Online

Y-Markôs 14 - Rade bible

Y-Markôs 14

¹Adôk dua hruê tơl truh Knăm Klei Găn leh anăn Knăm Kpŭng Amâo Mâo Kpei. Phung knơ̆ng khua ngă yang leh anăn phung khua čih hră duah êlan dưi mă čăp Yêsu hŏng klei hgăm leh anăn bi mdjiê Gơ̆.

²Kyuadah diñu lač, “Đăm ngă ôh êjai hruê knăm, huĭdah phung ƀuôn sang ngă klei rŭng răng.”

³Hlăk Yêsu dôk ti ƀuôn Ƀêthani hlăm sang Y-Simôn pô djŏ phŭng, êjai Ñu dôk huă ƀơ̆ng, mâo sa čô mniê djă sa boh giêt ngă hŏng boh tâo siam mâo êa ƀâo mngưi nard phŭn yuôm snăk. Mniê anăn bi mčah giêt leh anăn hlĭng êa ƀâo mngưi ti dlông boh kŏ Yêsu.

⁴Ƀiădah mâo đa đa ăl, lač hdơ̆ng diñu, “Si ngă bi liê hơăi mang êa ƀâo mngưi msĕ snăn?

⁵Arăng dưi čhĭ êa ƀâo mngưi anei êbeh kơ tlâo êtuh đơniê leh anăn bi mbha kơ phung ƀun ƀin.” Leh anăn diñu ƀuah mniê anăn.

⁶Ƀiădah Yêsu lač, “Lui măng ai gơ̆. Si ngă diih bi rŭng gơ̆? Gơ̆ ngă klei jăk kơ Kâo.

⁷Diih mâo phung ƀun ƀin mbĭt hŏng diih nanao, leh anăn êla diih čiăng diih dưi ngă klei jăk kơ diñu. Ƀiădah Kâo amâo srăng dôk mbĭt hŏng diih nanao ôh.

⁸Mniê anei ngă tui si gơ̆ dưi. Gơ̆ trôč êa ƀâo mngưi ti asei mlei Kâo mprăp êlâo kơ klei arăng dơr Kâo.

⁹Kâo lač kơ diih sĭt nik, ti anôk arăng mtô klei mrâo mrang jăk tar ƀar lăn ala, arăng srăng yăl dliê klei mniê anei ngă leh, čiăng bi hdơr kơ ñu.”

¹⁰Leh anăn Y-Yuđas Iskariôt, sa čô hlăm phung pluh dua čô ƀĭng kna, nao kơ phung knơ̆ng khua ngă yang čiăng lhiăr leh anăn jao Yêsu kơ diñu.

¹¹Leh diñu hmư̆ klei anăn diñu hơ̆k mơak leh anăn ƀuăn brei prăk kơ Y-Yuđas. Snăn Y-Yuđas duah mông găl dưi lhiăr gơ̆.

¹²Hruê tal sa hlăm Knăm Ƀơ̆ng Kpŭng Amâo Mâo Kpei, hruê arăng koh bi mdjiê êđai biăp Knăm Klei Găn, phung ƀĭng kna êmuh kơ Yêsu, “Ti anôk Ih čiăng hmei nao mkra brei Ih ƀơ̆ng Knăm Klei Găn lĕ?”

¹³Ñu tiŏ nao dua čô ƀĭng kna Ñu leh anăn lač kơ digơ̆, “Nao mŭt hlăm ƀuôn, leh anăn sa čô êkei pŭ sa boh abŭ êa srăng tuôm hŏng diih. Tui hlue gơ̆,

¹⁴ti sang ñu mŭt, brei diih lač kơ pô sang anăn, ‘Nai lač, Ti adŭ Kâo srăng ƀơ̆ng Knăm Klei Găn mbĭt hŏng phung ƀĭng kna Kâo?’

¹⁵Mnuih anăn srăng ktrâo brei kơ diih sa boh adŭ prŏng ti tal dlông arăng mprăp mkra brei leh. Ti anôk anăn brei diih mkra kơ drei.”

¹⁶Phung ƀĭng kna anăn nao mŭt hlăm ƀuôn leh anăn ƀuh jih jang mnơ̆ng tui si Yêsu lač leh kơ diñu. Leh anăn diñu mkra Knăm Klei Găn.

¹⁷Tơdah adiê tlam leh, Yêsu hriê mbĭt hŏng phung pluh dua čô.

¹⁸Êjai diñu dôk ti jhưng huă ƀơ̆ng Yêsu lač, “Sĭt nik Kâo lač kơ diih, sa čô hlăm phung diih srăng lhiăr kơ Kâo, pô anăn dôk huă ƀơ̆ng mbĭt hŏng Kâo.”

¹⁹Diñu dơ̆ng ênguôt, leh anăn sa čô sa čô diñu lač kơ Yêsu, “Amâo djŏ kâo ôh yơ̆?”

²⁰Yêsu lač kơ diñu, “Pô anăn jing sa čô hlăm phung pluh dua čô, pô đrŭt kpŭng ñu hlăm jam mbĭt hŏng Kâo.

²¹Anak Mnuih srăng djiê tui si Klei Aê Blŭ čih leh djŏ kơ Ñu, ƀiădah knap mñai yơh kơ pô lhiăr kơ Anak Mnuih! Jăk hĭn arăng amâo tuôm kkiêng ôh kơ pô anăn.”

²²Êjai diñu dôk huă ƀơ̆ng, Yêsu mă kpŭng, wah lač klei bi mni, kjoh kpŭng anăn, leh anăn brei kơ digơ̆ leh anăn lač, “Mă bĕ; anei jing asei mlei Kâo.”

²³Leh anăn Ñu mă atŏ. Leh wah lač klei bi mni, Ñu brei atŏ anăn kơ digơ̆, leh anăn jih jang digơ̆ mnăm.

²⁴Yêsu lač kơ digơ̆, “Anei jing êrah Kâo, êrah kơ klei bi mguôp tuh brei kơ lu mnuih.

²⁵Sĭt nik Kâo lač kơ diih, Kâo amâo srăng lŏ mnăm ôh êa boh kriăk ƀâo tơl hruê Kâo srăng mnăm êa boh kriăk ƀâo mrâo hlăm ƀuôn ala mtao Aê Diê.”

²⁶Leh diñu mmuñ sa klei, diñu kbiă nao kơ čư̆ Ôliwơ.

²⁷Yêsu lač kơ diñu, “Jih jang diih srăng klah đuĕ lui Kâo; kyuadah Klei Aê Diê Blŭ čih leh, ‘Kâo srăng čăm mgăt biăp, leh anăn jih jang biăp srăng klah đuĕ mdê mdê.’

²⁸Ƀiădah leh Kâo kbiă lŏ hdĭp, Kâo srăng nao êlâo kơ diih kơ čar Galilê.”

²⁹Y-Pêtrôs lač kơ Ñu, “Wăt tơdah jih jang srăng lui Ih, kâo amâo srăng lui ôh.”

³⁰Yêsu lač kơ gơ̆, “Sĭt nik Kâo lač kơ ih, mlam anei yơh, êlâo kơ mnŭ knô kdjô̆ dua blư̆, ih srăng hngah kơ Kâo tlâo blư̆.”

³¹Ƀiădah Y-Pêtrôs lač hŏng klei ktang, “Wăt tơdah kâo djiê mbĭt hŏng Ih dưn, kâo amâo srăng hngah kơ Ih ôh.” Leh anăn jih jang diñu lač klei msĕ.

³²Diñu nao kơ anôk arăng pia Gêtsêmanê, leh anăn Yêsu lač kơ phung ƀĭng kna Ñu, “Dôk gŭ bĕ tinei êjai Kâo wah lač.”

³³Leh anăn Ñu jak ba Y-Pêtrôs, Y-Yakơ, leh anăn Y-Yôhan nao mbĭt hŏng Ñu, leh anăn Ñu dơ̆ng mâo klei ênguôt prŏng leh anăn klei rŭng răng.

³⁴Ñu lač kơ digơ̆, “Ai tiê Kâo ênguôt snăk păt čiăng djiê. Dôk tinei leh anăn kăp răng bĕ.”

³⁵Ñu nao kbưi ƀiă, klăm asei mlei ti lăn, leh anăn wah lač, čiăng kơ tơdah dưi mông anăn amâo truh kơ Ñu ôh.

³⁶Leh anăn Ñu lač, “Aba, Ơ Ama ơi, jih jang mnơ̆ng Ih dưi ngă sơăi. Mă mđuĕ hĕ atŏ anei mơ̆ng Kâo. Amâo djŏ tui si klei Kâo čiăng ôh, ƀiădah tui si klei Ih pô čiăng.”

³⁷Leh anăn Ñu lŏ hriê kơ phung ƀĭng kna Ñu leh anăn ƀuh digơ̆ dôk pĭt. Ñu lač kơ Y-Pêtrôs, “Ơ Y-Simôn, ih dôk pĭt hĕ? Ih amâo dưi hĕ dôk krŏng knŏng sa mông?

³⁸Brei diih kăp răng bĕ leh anăn wah lač, čiăng kơ diih amâo lĕ hlăm klei mplư ôh. Mngăt čiăng snăk, ƀiădah kđeh jing awăt.”

³⁹Yêsu lŏ nao leh anăn wah lač klei msĕ si êlâo.

⁴⁰Ñu lŏ hriê leh anăn ƀuh phung ƀĭng kna ăt dôk pĭt, kyuadah digơ̆ amâo lŏ dưi mblang ală ôh. Leh anăn digơ̆ amâo thâo ôh ya klei lŏ wĭt lač kơ Yêsu.

⁴¹Ñu lŏ hriê tal tlâo leh anăn lač kơ digơ̆, “Diih ăt dôk pĭt leh anăn dôk mdei hĕ? Man dŭm năn, mông truh leh. Arăng dơ̆ng jao Anak Mnuih hlăm kngan phung soh.

⁴²Kgŭ nao bĕ drei. Nĕ anei, pô lhiăr kơ Kâo truh leh.”

⁴³Êjai Yêsu ăt dôk blŭ, Y-Yuđas, sa čô hlăm phung pluh dua čô, truh mtam mbĭt hŏng sa phung lu djă đao gưm leh anăn giê mơ̆ng phung knơ̆ng khua ngă yang, phung khua čih hră, leh anăn phung khua mduôn.

⁴⁴Pô lhiăr brei leh sa klei bi knăl kơ phung lu, lač, “Pô kâo srăng čŭm, ñu yơh anăn. Čăp ñu leh anăn atăt ba ñu bi truh.”

⁴⁵Tơdah Y-Yuđas truh, gơ̆ nao kơ Yêsu mtam leh anăn lač, “Ơ Nai,” leh anăn čŭm Yêsu.

⁴⁶Phung anăn mă čăp Yêsu.

⁴⁷Ƀiădah sa čô dôk giăm suê̆ đao gưm ñu leh anăn koh tloh knga sa čô dĭng buăl khua ngă yang prŏng.

⁴⁸Yêsu lač kơ phung anăn, “Si ngă diih hriê djă đao gưm leh anăn giê čiăng mă čăp Kâo msĕ si sa čô knĕ?

⁴⁹Grăp hruê Kâo dôk mbĭt hŏng diih mtô hlăm Sang Kkuh Mpŭ, ƀiădah diih amâo mă čăp Kâo ôh. Ƀiădah anei jing klei bi sĭt Klei Aê Diê Blŭ čih leh.”

⁵⁰Hlăk anăn jih jang phung ƀĭng kna lui Yêsu leh anăn êran đuĕ.

⁵¹Mâo sa čô êkei hlăk ai guêč knŏng sa blah čhiăm kbuă tui hlue Yêsu.

⁵²Diñu mă êkei anăn, ƀiădah gơ̆ lui hĕ čhiăm kbuă anăn leh anăn êran đuĕ asei lưng.

⁵³Diñu atăt ba Yêsu kơ khua ngă yang prŏng. Jih jang phung knơ̆ng khua ngă yang, phung khua mduôn, leh anăn phung khua čih hră bi kƀĭn mbĭt.

⁵⁴Y-Pêtrôs tui hlue Yêsu mơ̆ng kbưi, mŭt hlăm wăl sang khua ngă yang prŏng. Ñu dôk gŭ mbĭt hŏng phung kahan gak leh anăn mdang pui tinăn.

⁵⁵Phung knơ̆ng khua ngă yang leh anăn jih jang phung khua gai gĭt ƀuôn sang duah klei kčŭt kơ Yêsu čiăng bi mdjiê Gơ̆, ƀiădah diñu amâo ƀuh ôh.

⁵⁶Kyuadah lu mnuih kčŭt mčeh kơ Yêsu, ƀiădah klei digơ̆ mčeh anăn amâo sa ai ôh.

⁵⁷Mâo đa đa kgŭ dơ̆ng leh anăn mčeh kơ Yêsu, lač,

⁵⁸“Hmei hmư̆ leh ñu lač, ‘Kâo srăng bi rai hĕ Sang Kkuh Mpŭ anei kngan mnuih ngă, leh anăn hlăm tlâo hruê Kâo srăng lŏ mdơ̆ng sa boh sang yang mkăn, amâo djŏ kngan mnuih ngă ôh.’ ”

⁵⁹Ƀiădah wăt klei digơ̆ hưn anăn ăt kăn jing msĕ rei.

⁶⁰Khua ngă yang prŏng kgŭ dơ̆ng ti anăp diñu leh anăn êmuh Yêsu, “Ih amâo mâo klei lŏ wĭt lač hĕ kơ ya klei phung anei kčŭt kơ ih?”

⁶¹Ƀiădah Yêsu dôk ñăt, amâo blŭ sa boh ôh. Lŏ sa blư̆ khua ngă yang prŏng êmuh kơ Yêsu, “Ih jing Yang Krist, Anak Aê Diê Pô arăng hơêč hmưi mơ̆?”

⁶²Yêsu lač, “Kâo gơ̆ yơh, leh anăn diih srăng ƀuh Anak Mnuih dôk gŭ tĭng hnuă kơ Pô Myang leh anăn lŏ hriê ti knam hlăm adiê.”

⁶³Khua ngă yang prŏng hiêk ao jhung ñu leh anăn lač, “Ya drei lŏ čiăng kơ phung hưn?

⁶⁴Diih hmư̆ leh klei ñu blŭ mgao hŏng Aê Diê. Ya klei diih mĭn?” Jih jang diñu phat kđi Yêsu jing năng kơ klei djiê.

⁶⁵Đa đa dơ̆ng kčuh êa bah kơ Gơ̆, guôm ƀô̆ mta Gơ̆, tŭk Gơ̆, leh anăn lač, “Hưn êlâo bĕ!” Leh anăn phung kahan kiă mă Gơ̆ leh anăn pah miêng Gơ̆.

⁶⁶Êjai Y-Pêtrôs dôk anôk ti gŭ hlăm wăl sang, sa čô dĭng buăl mniê khua ngă yang prŏng hriê.

⁶⁷Êjai Y-Pêtrôs dôk mdang pui, mniê anăn dlăng kơ ñu leh anăn lač, “Ih msĕ mơh dôk leh mbĭt hŏng Yêsu ƀuôn Nasaret.”

⁶⁸Ƀiădah Y-Pêtrôs hngah klei anăn leh anăn lač, “Kâo amâo thâo ôh, kăn thâo săng rei ya klei ih lač anăn.” Y-Pêtrôs kbiă nao kơ ƀăng jang. Hlăk anăn sa drei mnŭ knô kdjô̆.

⁶⁹Dĭng buăl mniê anăn lŏ ƀuh ñu leh anăn lŏ dơ̆ng lač kơ phung mnuih dôk giăm, “Êkei anei jing sa čô hlăm phung diñu.”

⁷⁰Ƀiădah Y-Pêtrôs lŏ hngah klei anăn. Ƀiăriă tinăn phung dôk giăm lač kơ Y-Pêtrôs, “Sĭt nik ih jing sa čô hlăm phung anăn, kyuadah ih jing mnuih čar Galilê.”

⁷¹Ƀiădah Y-Pêtrôs dơ̆ng tăm pah kơ ñu pô leh anăn kat asei, “Kâo amâo thâo kral ôh mnuih diih lač anăn.”

⁷²Hlăk anăn mtam mnŭ knô kdjô̆ tal dua. Y-Pêtrôs hdơr kơ klei Yêsu lač leh kơ ñu, “Êlâo kơ mnŭ knô kdjô̆ tal dua ih srăng hngah kơ Kâo tlâo blư̆.” Leh anăn ñu ênguôt snăk kơ klei anăn, ñu hia mtam yơh.