Read Rade Y-Markôs 15 Bible Online

Y-Markôs 15 - Rade bible

Y-Markôs 15

¹Ti aguah ưm, phung knơ̆ng khua ngă yang prŏng, phung khua mduôn, phung khua čih hră, leh anăn jih jang phung khua phat kđi bi trông čhai. Diñu kă Yêsu leh anăn atăt ba jao Gơ̆ kơ Aê Pilat.

²Aê Pilat êmuh kơ Yêsu, “Ih jing Mtao phung Yuđa mơ̆?” Yêsu lŏ wĭt lač kơ ñu, “Ơ, ih lač leh klei anăn.”

³Leh anăn phung knơ̆ng khua ngă yang kčŭt kơ Yêsu lu mta klei.

⁴Aê Pilat lŏ êmuh kơ Yêsu, “Ih amâo lŏ wĭt lač ôh hĕ? Hmư̆ bĕ klei diñu kčŭt kơ ih lu snăk.”

⁵Ƀiădah Yêsu amâo lŏ wĭt lač ôh. Snăn Aê Pilat bi kngăr.

⁶Grăp hruê Knăm Klei Găn Aê Pilat bhiăn pŏk kơ phung ƀuôn sang sa čô mnă hlei pô diñu akâo.

⁷Hlăm phung bi kdơ̆ng arăng krư̆ leh, mâo sa čô mnuih, anăn gơ̆ Y-Barabas bi mdjiê mnuih êjai mâo klei bi kdơ̆ng anăn.

⁸Phung lu hriê dơ̆ng akâo kơ Aê Pilat brei ñu ngă msĕ si ñu khăng ngă.

⁹Aê Pilat lŏ wĭt lač kơ diñu, “Diih čiăng mơ̆ kâo phưi kơ diih Mtao phung Yuđa?”

¹⁰Kyuadah ñu thâo leh kơ phung knơ̆ng khua ngă yang jao Yêsu leh kyua klei nač.

¹¹Ƀiădah phung knơ̆ng khua ngă yang mčhur phung lu čiăng kơ Aê Pilat pŏk Y-Barabas kơ diñu hrô kơ Yêsu.

¹²Leh anăn Aê Pilat lŏ lač kơ diñu, “Snăn ya kâo srăng ngă hŏng mnuih pô diih pia Mtao phung Yuđa?”

¹³Diñu lŏ ur, “Pơ̆ng hĕ ñu ti kyâo bi kal.”

¹⁴Aê Pilat lač kơ diñu, “Si ngă, ya klei jhat ñu ngă leh?” Ƀiădah diñu ur ktang hĭn êjai, “Pơ̆ng hĕ ñu ti kyâo bi kal!”

¹⁵Snăn kyua Aê Pilat čiăng bi mơak kơ phung lu anăn, ñu pŏk Y-Barabas kơ diñu. Leh ñu brei arăng čăm Yêsu hŏng giê, ñu jao Yêsu brei phung kahan pơ̆ng ti kyâo bi kal.

¹⁶Phung kahan atăt Yêsu mŭt hlăm wăl sang khua čar (čiăng lač sang phat kđi), leh anăn diñu iêô bi kƀĭn jih jang êpul kahan mđrăm mbĭt.

¹⁷Diñu bi hơô ao jhung hrah jŭ kơ Yêsu, leh anăn diñu mñam sa boh đuôn mtao êruê leh anăn bi mđua ti boh kŏ Gơ̆.

¹⁸Diñu dơ̆ng kkuh kơ Gơ̆, “Kkuh kơ Ih, Ơ Mtao phung Yuđa ah!”

¹⁹Diñu čăm boh kŏ Gơ̆ hŏng giê mbô, kčuh êa bah ti Gơ̆, leh anăn čuôn kơŭt kkuh kơ Gơ̆.

²⁰Leh diñu mưč kơ Gơ̆, diñu toh hĕ ao hrah jŭ, lŏ bi hơô ao Gơ̆ pô. Leh anăn diñu atăt ba Gơ̆ čiăng pơ̆ng ti kyâo bi kal.

²¹Mâo sa čô mnuih, anăn gơ̆ Y-Simôn mơ̆ng čar Siren, ama Y-Aleksanđơr leh anăn Y-Ruphus, hriê mơ̆ng êngao ƀuôn găn tinăn. Diñu mgô̆ gơ̆ klam kyâo bi kal Yêsu.

²²Diñu atăt ba Yêsu kơ anôk arăng pia Gôlgôtha, (čiăng lač Anôk Klang Kŏ).

²³Diñu myơr brei Yêsu mnăm kpiê bi lŭk hŏng êa drao phĭ ƀâo mngưi, ƀiădah Gơ̆ amâo mnăm ôh.

²⁴Diñu pơ̆ng Gơ̆ ti kyâo bi kal, leh anăn bi mbha čhiăm ao Gơ̆ hdơ̆ng diñu hŏng klei mđăo, čiăng bi thâo ya grăp čô srăng mă.

²⁵Ti dua păn mông aguah diñu pơ̆ng Yêsu ti kyâo bi kal.

²⁶Arăng čih klei phat kđi kơ Gơ̆ snei: “MTAO KƠ PHUNG YUĐA.”

²⁷Diñu pơ̆ng ti kyâo bi kal mbĭt hŏng Yêsu dua čô mnuih knĕ, sa čô tĭng hnuă, sa čô tĭng điâo Yêsu.

²⁸

²⁹Phung găn tinăn mưč kơ Yêsu, kteh kŏ, leh anăn lač, “Ah hah! Ơ pô čiăng bi rai Sang Kkuh Mpŭ leh anăn lŏ mdơ̆ng gơ̆ hlăm tlâo hruê,

³⁰bi mtlaih bĕ ih pô, leh anăn trŭn mơ̆ng kyâo bi kal.”

³¹Phung knơ̆ng khua ngă yang mbĭt hŏng phung khua čih hră msĕ mơh mưč kơ Yêsu êjai lač hdơ̆ng diñu snei, “Ñu bi mtlaih leh phung mkăn, ƀiădah ñu amâo dưi bi mtlaih ñu pô ôh.

³²Kăp dlăng lăng Krist, Mtao phung Israel, trŭn ară anei mơ̆ng kyâo bi kal, čiăng kơ drei dưi ƀuh leh anăn đăo.” Phung arăng pơ̆ng ti kyâo bi kal mbĭt hŏng Yêsu dlao wač kơ Ñu msĕ mơh.

³³Tơdah truh leh yang hrê dơ̆ng mâo klei mmăt tar ƀar čar tơl truh tlâo mông tlam.

³⁴Ti tlâo mông tlam Yêsu ur kraih ktang, “Êloi, Êloi, lama sabaktani?” čiăng lač, “Ơ Aê Diê Kâo, Ơ Aê Diê Kâo, si ngă Ih lui hĕ Kâo?”

³⁵Đa đa hlăm phung dôk giăm tinăn hmư̆ klei anăn leh anăn lač, “Nĕ anei, ñu iêô Y-Êli.”

³⁶Mâo sa čô mnuih êran nao mă djao, đrŭt hlăm kpiê msăm, kă ti sa ƀĕ giê mbô, yơr ti ƀăng êgei Yêsu, leh anăn lač, “Guôn bĕ, brei drei kăp dlăng thâodah Y-Êli srăng hriê mtrŭn ñu.”

³⁷Yêsu ur kraih ktang leh anăn tuč êwa.

³⁸Leh anăn čhiăm păng hlăm Sang Kkuh Mpŭ kơhiêk mdua mơ̆ng dlông truh ti gŭ.

³⁹Tơdah khua kahan dôk phă anăp Yêsu ƀuh si Gơ̆ tuč êwa, ñu lač, “Sĭt nik êkei anei jing Anak Aê Diê!”

⁴⁰Mâo mơh phung mniê dôk dlăng mơ̆ng kbưi. Hlăm phung anăn mâo H'Mari Madala, H'Mari amĭ Y-Yakơ điêt leh anăn Y-Yôsê, mbĭt hŏng H'Salômê.

⁴¹Tlâo čô anei hlue leh Yêsu hlăm čar Galilê leh anăn mă bruă kơ Ñu. Msĕ mơh mâo lu phung mniê mkăn hriê mbĭt hŏng Yêsu kơ ƀuôn Yêrusalem.

⁴²Tơdah adiê tlam leh, kyuadah jing hruê mkra Knăm Klei Găn, čiăng lač hruê êlâo kơ hruê sabat,

⁴³Y-Yôsep ƀuôn Arimathê, jing sa čô hlăm phung khua phat kđi arăng mpŭ, ñu pô mơh jing pô čang guôn kơ ƀuôn ala mtao Aê Diê, jhŏng nao kơ Aê Pilat leh anăn akâo asei mlei Yêsu.

⁴⁴Ƀiădah Aê Pilat bi kngăr kyua hmư̆ Yêsu djiê leh. Ñu iêô khua kahan leh anăn êmuh kơ gơ̆ thâodah Yêsu djiê leh sui.

⁴⁵Leh ñu thâo sĭt tui si khua kahan hưn, ñu brei asei mlei Gơ̆ kơ Y-Yôsep.

⁴⁶Y-Yôsep blei sa blah čhiăm kbuă, mtrŭn asei mlei Yêsu, păn hruôm Gơ̆ hŏng čhiăm kbuă anăn, leh anăn bi mđih Gơ̆ hlăm msat arăng ƀoh leh hlăm boh tâo. Leh klei anăn ñu bi klŭng boh tâo ti mbah ƀăng msat.

⁴⁷H'Mari Madala leh anăn H'Mari amĭ Y-Yôsê ƀuh anôk arăng bi mđih leh asei mlei Yêsu.